| Library / Tipiṭaka / ติปิฎก • Tipiṭaka / เปตวตฺถุปาฬิ • Petavatthupāḷi |
๗. ราชปุตฺตเปตวตฺถุ
7. Rājaputtapetavatthu
๗๕๓.
753.
ปุเพฺพ กตานํ กมฺมานํ, วิปาโก มถเย มนํ;
Pubbe katānaṃ kammānaṃ, vipāko mathaye manaṃ;
รูเป สเทฺท รเส คเนฺธ, โผฎฺฐเพฺพ จ มโนรเมฯ
Rūpe sadde rase gandhe, phoṭṭhabbe ca manorame.
๗๕๔.
754.
นจฺจํ คีตํ รติํ ขิฑฺฑํ, อนุภุตฺวา อนปฺปกํ;
Naccaṃ gītaṃ ratiṃ khiḍḍaṃ, anubhutvā anappakaṃ;
อุยฺยาเน ปริจริตฺวา, ปวิสโนฺต คิริพฺพชํฯ
Uyyāne paricaritvā, pavisanto giribbajaṃ.
๗๕๕.
755.
อปฺปิจฺฉํ หิริสมฺปนฺนํ, อุเญฺฉ ปตฺตคเต รตํฯ
Appicchaṃ hirisampannaṃ, uñche pattagate rataṃ.
๗๕๖.
756.
หตฺถิกฺขนฺธโต โอรุยฺห, ลทฺธา ภเนฺตติ จาพฺรวิ;
Hatthikkhandhato oruyha, laddhā bhanteti cābravi;
ตสฺส ปตฺตํ คเหตฺวาน, อุจฺจํ ปคฺคยฺห ขตฺติโยฯ
Tassa pattaṃ gahetvāna, uccaṃ paggayha khattiyo.
๗๕๗.
757.
ถณฺฑิเล ปตฺตํ ภินฺทิตฺวา, หสมาโน อปกฺกมิ;
Thaṇḍile pattaṃ bhinditvā, hasamāno apakkami;
‘‘รโญฺญ กิตวสฺสาหํ ปุโตฺต, กิํ มํ ภิกฺขุ กริสฺสสิ’’ฯ
‘‘Rañño kitavassāhaṃ putto, kiṃ maṃ bhikkhu karissasi’’.
๗๕๘.
758.
ตสฺส กมฺมสฺส ผรุสสฺส, วิปาโก กฎุโก อหุ;
Tassa kammassa pharusassa, vipāko kaṭuko ahu;
ยํ ราชปุโตฺต เวเทสิ, นิรยมฺหิ สมปฺปิโตฯ
Yaṃ rājaputto vedesi, nirayamhi samappito.
๗๕๙.
759.
ฉเฬว จตุราสีติ, วสฺสานิ นวุตานิ จ;
Chaḷeva caturāsīti, vassāni navutāni ca;
ภุสํ ทุกฺขํ นิคจฺฉิโตฺถ, นิรเย กตกิพฺพิโสฯ
Bhusaṃ dukkhaṃ nigacchittho, niraye katakibbiso.
๗๖๐.
760.
อุตฺตาโนปิ จ ปจฺจิตฺถ, นิกุโชฺช วามทกฺขิโณ;
Uttānopi ca paccittha, nikujjo vāmadakkhiṇo;
อุทฺธํปาโท ฐิโต เจว, จิรํ พาโล อปจฺจถฯ
Uddhaṃpādo ṭhito ceva, ciraṃ bālo apaccatha.
๗๖๑.
761.
พหูนิ วสฺสสหสฺสานิ, ปูคานิ นหุตานิ จ;
Bahūni vassasahassāni, pūgāni nahutāni ca;
ภุสํ ทุกฺขํ นิคจฺฉิโตฺถ, นิรเย กตกิพฺพิโสฯ
Bhusaṃ dukkhaṃ nigacchittho, niraye katakibbiso.
๗๖๒.
762.
เอตาทิสํ โข กฎุกํ, อปฺปทุฎฺฐปฺปโทสินํ;
Etādisaṃ kho kaṭukaṃ, appaduṭṭhappadosinaṃ;
ปจฺจนฺติ ปาปกมฺมนฺตา, อิสิมาสชฺช สุพฺพตํฯ
Paccanti pāpakammantā, isimāsajja subbataṃ.
๗๖๓.
763.
โส ตตฺถ พหุวสฺสานิ, เวทยิตฺวา พหุํ ทุขํ;
So tattha bahuvassāni, vedayitvā bahuṃ dukhaṃ;
๗๖๔.
764.
ปหาย อิสฺสรมทํ, นิวาตมนุวตฺตเยฯ
Pahāya issaramadaṃ, nivātamanuvattaye.
๗๖๕.
765.
ทิเฎฺฐว ธเมฺม ปาสํโส, โย พุเทฺธสุ สคารโว;
Diṭṭheva dhamme pāsaṃso, yo buddhesu sagāravo;
กายสฺส เภทา สปฺปโญฺญ, สคฺคํ โส อุปปชฺชตีติฯ
Kāyassa bhedā sappañño, saggaṃ so upapajjatīti.
ราชปุตฺตเปตวตฺถุ สตฺตมํฯ
Rājaputtapetavatthu sattamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เปตวตฺถุ-อฎฺฐกถา • Petavatthu-aṭṭhakathā / ๗. ราชปุตฺตเปตวตฺถุวณฺณนา • 7. Rājaputtapetavatthuvaṇṇanā
