| Library / Tipiṭaka / ತಿಪಿಟಕ • Tipiṭaka / ಖುದ್ದಸಿಕ್ಖಾ-ಮೂಲಸಿಕ್ಖಾ • Khuddasikkhā-mūlasikkhā |
೪. ರಜನನಿದ್ದೇಸವಣ್ಣನಾ
4. Rajananiddesavaṇṇanā
೫೮. ಮೂಲಞ್ಚ ಖನ್ಧೋ ಚ ತಚೋ ಚ ಪತ್ತಞ್ಚ ಫಲಞ್ಚ ಪುಪ್ಫಞ್ಚ, ತೇಸಂ ಪಭೇದೋತಿ ಛಟ್ಠೀತಪ್ಪುರಿಸೋ। ಅಥ ವಾ ಪಭೇದ-ಸದ್ದಸ್ಸ ಕಮ್ಮಸಾಧನತ್ತೇ ತಾನಿಯೇವ ಪಭೇದೋತಿ ಕಮ್ಮಧಾರಯೋ, ತತೋ। ರಜನ್ತಿ ಏತೇಹೀತಿ ರಜನಾನಿ, ಮೂಲಾದೀನಿ। ‘‘ಅನುಜಾನಾಮಿ, ಭಿಕ್ಖವೇ, ಛ ರಜನಾನಿ ಮೂಲರಜನ’’ನ್ತಿಆದಿನಾ (ಮಹಾವ॰ ೩೪೪) ಭಗವತಾ ಅನುಞ್ಞಾತತ್ತಾ ವುತ್ತಂ ‘‘ರಜನಾ ಛಪ್ಪಕಾರಾನಿ, ಅನುಞ್ಞಾತಾನಿ ಸತ್ಥುನಾ’’ತಿ।
58. Mūlañca khandho ca taco ca pattañca phalañca pupphañca, tesaṃ pabhedoti chaṭṭhītappuriso. Atha vā pabheda-saddassa kammasādhanatte tāniyeva pabhedoti kammadhārayo, tato. Rajanti etehīti rajanāni, mūlādīni. ‘‘Anujānāmi, bhikkhave, cha rajanāni mūlarajana’’ntiādinā (mahāva. 344) bhagavatā anuññātattā vuttaṃ ‘‘rajanā chappakārāni, anuññātāni satthunā’’ti.
೫೯. ಮೂಲೇತಿ ಮೂಲರಜನೇ ಹಲಿದ್ದಿಂ ವಿವಜ್ಜಿಯ ಸಬ್ಬಂ ಲಬ್ಭನ್ತಿ ಸಮ್ಬನ್ಧೋ। ಏವಂ ಸಬ್ಬತ್ಥ। ಮಞ್ಜೇಟ್ಠಿ ಚ ತುಙ್ಗಹಾರಕೋ ಚಾತಿ ದ್ವನ್ದೋ। ಅಲ್ಲಿ-ಸದ್ದೇನ ನೀಲಿ-ಸದ್ದೇನ ಚ ತೇಸಂ ಗಚ್ಛಜಾತೀನಂ ಪತ್ತಾನಿ ಗಹಿತಾನಿ ಉಪಚಾರೇನ, ತಥಾ ಲೋದ್ದ-ಸದ್ದೇನ ಕಣ್ಡುಲ-ಸದ್ದೇನ ಚ ತಚೋ, ಕುಸುಮ್ಭ-ಸದ್ದೇನ ಕಿಂ ಸುಕ-ಸದ್ದೇನ ಚ ಪುಪ್ಫಾನಿ। ತೇನೇವ ಚ ತಾನಿ ನಪುಂಸಕಾನಿ। ತುಙ್ಗಹಾರಕೋ ನಾಮ ಏಕೋ ಕಣ್ಟಕರುಕ್ಖೋ, ತಸ್ಸ ಹರಿತಾಲವಣ್ಣಂ ಖನ್ಧರಜನಂ ಹೋತಿ। ಅಲ್ಲಿಪತ್ತೇನ ಏಕವಾರಂ ಗಿಹಿಪರಿಭುತ್ತಂ ರಜಿತುಂ ವಟ್ಟತಿ। ಫಲರಜನೇ ಸಬ್ಬಮ್ಪಿ ವಟ್ಟತಿ।
59.Mūleti mūlarajane haliddiṃ vivajjiya sabbaṃ labbhanti sambandho. Evaṃ sabbattha. Mañjeṭṭhi ca tuṅgahārako cāti dvando. Alli-saddena nīli-saddena ca tesaṃ gacchajātīnaṃ pattāni gahitāni upacārena, tathā lodda-saddena kaṇḍula-saddena ca taco, kusumbha-saddena kiṃ suka-saddena ca pupphāni. Teneva ca tāni napuṃsakāni. Tuṅgahārako nāma eko kaṇṭakarukkho, tassa haritālavaṇṇaṃ khandharajanaṃ hoti. Allipattena ekavāraṃ gihiparibhuttaṃ rajituṃ vaṭṭati. Phalarajane sabbampi vaṭṭati.
ರಜನನಿದ್ದೇಸವಣ್ಣನಾ ನಿಟ್ಠಿತಾ।
Rajananiddesavaṇṇanā niṭṭhitā.
