| Library / Tipiṭaka / တိပိဋက • Tipiṭaka / ခုဒ္ဒသိက္ခာ-မူလသိက္ခာ • Khuddasikkhā-mūlasikkhā |
၄. ရဇနနိဒ္ဒေသဝဏ္ဏနာ
4. Rajananiddesavaṇṇanā
၅၈. ဣဒာနိ တေသံ စီဝရာနံ ရဇနဝိဓာနံ ဒသ္သေတုံ ‘‘ရဇနာနိ စာ’’တိ ဝုတ္တံ။ တတ္ထ ‘‘အနုဇာနာမိ, ဘိက္ခဝေ, ဆ ရဇနာနိ မူလရဇနံ ခန္ဓရဇနံ တစရဇနံ ပတ္တရဇနံ ပုပ္ဖရဇနံ ဖလရဇန’’န္တိ (မဟာဝ. ၃၄၄) ဧဝံ ဘဂဝတာ အနုညာတတ္တာ ‘‘ဆပ္ပကာရာနိ အနုညာတာနိ သတ္ထုနာ’’တိ ဝုတ္တံ။
58. Idāni tesaṃ cīvarānaṃ rajanavidhānaṃ dassetuṃ ‘‘rajanāni cā’’ti vuttaṃ. Tattha ‘‘anujānāmi, bhikkhave, cha rajanāni mūlarajanaṃ khandharajanaṃ tacarajanaṃ pattarajanaṃ puppharajanaṃ phalarajana’’nti (mahāva. 344) evaṃ bhagavatā anuññātattā ‘‘chappakārāni anuññātāni satthunā’’ti vuttaṃ.
၅၉. တတ္ထ မူလေတိ မူလရဇနေတိ အတ္ထော။ ဟလိဒ္ဒိံ ဝိဝဇ္ဇိယ သဗ္ဗံ လဗ္ဘန္တိ သမ္ဗန္ဓော။ ဧဝံ သေသေသုပိ။ တုင္ဂဟာရကော နာမ ဧကော သကဏ္ဋကရုက္ခော, တသ္သ ဟရိတာလဝဏ္ဏံ ခန္ဓရဇနံ ဟောတိ။ ဂိဟိပရိဘုတ္တံ ပန အလ္လိပတ္တေန ဧကဝာရံ ရဇိတုံ ဝဋ္ဋတိ။ ဖလရဇနေ အကပ္ပိယံ နာမ နတ္ထိ, သဗ္ဗံ ဝဋ္ဋတီတိ။ ရဇနဝိနိစ္ဆယော။
59. Tattha mūleti mūlarajaneti attho. Haliddiṃ vivajjiya sabbaṃ labbhanti sambandho. Evaṃ sesesupi. Tuṅgahārako nāma eko sakaṇṭakarukkho, tassa haritālavaṇṇaṃ khandharajanaṃ hoti. Gihiparibhuttaṃ pana allipattena ekavāraṃ rajituṃ vaṭṭati. Phalarajane akappiyaṃ nāma natthi, sabbaṃ vaṭṭatīti. Rajanavinicchayo.
ရဇနနိဒ္ဒေသဝဏ္ဏနာ နိဋ္ဌိတာ။
Rajananiddesavaṇṇanā niṭṭhitā.
