| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. ရဟောဂတဝဂ္ဂော
2. Rahogatavaggo
၁. ရဟောဂတသုတ္တဝဏ္ဏနာ
1. Rahogatasuttavaṇṇanā
၂၅၉. ယံကိဉ္စိ ဝေဒယိတန္တိ ‘‘သုခံ ဒုက္ခံ အဒုက္ခမသုခ’’န္တိ ဝုတ္တံ ဝေဒယိတံ ဒုက္ခသ္မိံ အန္တောဂဓံ, ဒုက္ခန္တိ ဝတ္တဗ္ဗတံ လဘတိ ပရိယာယေနာတိ အတ္ထော။ တေနာဟ ‘‘တံ သဗ္ဗံ ဒုက္ခန္တိ အတ္ထော’’တိ။ ယာ ဧသာတိအာဒီသု ယော သင္ခာရာနံ အနိစ္စတာသင္ခာတော ဟုတ္ဝာ အဘာဝာကာရော, ယာ ခယသဘာဝတာ ဝိနသ္သနသဘာဝတာ ဇရာယ မရဏေန စာတိ ဒ္ဝိဓာ ဝိပရိဏာမနသဘာဝတာ, ဧတံ သန္ဓာယ ဥဒ္ဒိသ္သ သဗ္ဗံ ဝေဒယိတံ ဒုက္ခန္တိ မယာ ဝုတ္တန္တိ အယံ သင္ခေပတ္ထော။ သာတိ သင္ခာရာနံ အနိစ္စတာ ။ ဝေဒနာနမ္ပိ အနိစ္စတာ ဧဝ သင္ခာရသဘာဝတ္တာ။ တာသံ အနိစ္စတာ စ နာမ မရဏံ ဘင္ဂောတိ ကတ္ဝာ တတော ဥတ္တရိ ဒုက္ခံ နာမ နတ္ထီတိ သဗ္ဗာ ဝေဒနာ ‘‘ဒုက္ခာ’’တိ ဝုတ္တာ, ယထာ ‘‘ယဒနိစ္စံ တံ ဒုက္ခ’’န္တိ စ, ‘‘ပဉ္စုပာဒာနက္ခန္ဓာ ဒုက္ခာ’’တိ စ ဝုတ္တံ။ ဣဒံ သုတ္တပဒံ။ စတ္တာရော အာရုပ္ပာတိ စတသ္သော အရူပသမာပတ္တိယော။ ဧတ္ထာတိ စ ဧတသ္မိံ ပဋိပ္ပသ္သဒ္ဓိဝာရေ။
259.Yaṃkiñci vedayitanti ‘‘sukhaṃ dukkhaṃ adukkhamasukha’’nti vuttaṃ vedayitaṃ dukkhasmiṃ antogadhaṃ, dukkhanti vattabbataṃ labhati pariyāyenāti attho. Tenāha ‘‘taṃ sabbaṃ dukkhanti attho’’ti. Yā esātiādīsu yo saṅkhārānaṃ aniccatāsaṅkhāto hutvā abhāvākāro, yā khayasabhāvatā vinassanasabhāvatā jarāya maraṇena cāti dvidhā vipariṇāmanasabhāvatā, etaṃ sandhāya uddissa sabbaṃ vedayitaṃ dukkhanti mayā vuttanti ayaṃ saṅkhepattho. Sāti saṅkhārānaṃ aniccatā . Vedanānampi aniccatā eva saṅkhārasabhāvattā. Tāsaṃ aniccatā ca nāma maraṇaṃ bhaṅgoti katvā tato uttari dukkhaṃ nāma natthīti sabbā vedanā ‘‘dukkhā’’ti vuttā, yathā ‘‘yadaniccaṃ taṃ dukkha’’nti ca, ‘‘pañcupādānakkhandhā dukkhā’’ti ca vuttaṃ. Idaṃ suttapadaṃ. Cattāro āruppāti catasso arūpasamāpattiyo. Etthāti ca etasmiṃ paṭippassaddhivāre.
ရဟောဂတသုတ္တဝဏ္ဏနာ နိဋ္ဌိတာ။
Rahogatasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. ရဟောဂတသုတ္တံ • 1. Rahogatasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. ရဟောဂတသုတ္တဝဏ္ဏနာ • 1. Rahogatasuttavaṇṇanā
