| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
২. পুরিমকোটিপঞ্হো
2. Purimakoṭipañho
২. রাজা আহ ‘‘ভন্তে নাগসেন, যং পনেতং ব্রূসি ‘পুরিমা কোটি ন পঞ্ঞাযতী’তি, তস্স ওপম্মং করোহী’’তি। ‘‘যথা, মহারাজ, পুরিসো পরিত্তং 1 বীজং পথৰিযং নিক্খিপেয্য, ততো অঙ্কুরো উট্ঠহিত্ৰা অনুপুব্বেন ৰুড্ঢিং ৰিরূল়্হিং ৰেপুল্লং আপজ্জিত্ৰা ফলং দদেয্য। ততো বীজং গহেত্ৰা পুন রোপেয্য, ততোপি অঙ্কুরো উট্ঠহিত্ৰা অনুপুব্বেন ৰুড্ঢিং ৰিরূল়্হিং ৰেপুল্লং আপজ্জিত্ৰা ফলং দদেয্য। এৰমেতিস্সা সন্ততিযা অত্থি অন্তো’’তি? ‘‘নত্থি ভন্তে’’তি। ‘‘এৰমেৰ খো, মহারাজ, অদ্ধানস্সাপি পুরিমা কোটি ন পঞ্ঞাযতী’’তি।
2. Rājā āha ‘‘bhante nāgasena, yaṃ panetaṃ brūsi ‘purimā koṭi na paññāyatī’ti, tassa opammaṃ karohī’’ti. ‘‘Yathā, mahārāja, puriso parittaṃ 2 bījaṃ pathaviyaṃ nikkhipeyya, tato aṅkuro uṭṭhahitvā anupubbena vuḍḍhiṃ virūḷhiṃ vepullaṃ āpajjitvā phalaṃ dadeyya. Tato bījaṃ gahetvā puna ropeyya, tatopi aṅkuro uṭṭhahitvā anupubbena vuḍḍhiṃ virūḷhiṃ vepullaṃ āpajjitvā phalaṃ dadeyya. Evametissā santatiyā atthi anto’’ti? ‘‘Natthi bhante’’ti. ‘‘Evameva kho, mahārāja, addhānassāpi purimā koṭi na paññāyatī’’ti.
‘‘ভিয্যো ওপম্মং করোহী’’তি। ‘‘যথা, মহারাজ, কুক্কুটিযা অণ্ডং ভৰেয্য, অণ্ডতো কুক্কুটী কুক্কুটিযা অণ্ডন্তি। এৰমেতিস্সা সন্ততিযা অত্থি অন্তো’’তি? ‘‘নত্থি ভন্তে’’তি। ‘‘এৰমেৰ খো, মহারাজ, অদ্ধানস্সাপি পুরিমা কোটি ন পঞ্ঞাযতী’’তি।
‘‘Bhiyyo opammaṃ karohī’’ti. ‘‘Yathā, mahārāja, kukkuṭiyā aṇḍaṃ bhaveyya, aṇḍato kukkuṭī kukkuṭiyā aṇḍanti. Evametissā santatiyā atthi anto’’ti? ‘‘Natthi bhante’’ti. ‘‘Evameva kho, mahārāja, addhānassāpi purimā koṭi na paññāyatī’’ti.
‘‘ভিয্যো ওপম্মং করোহী’’তি। থেরো পথৰিযা চক্কং লিখিত্ৰা মিলিন্দং রাজানং এতদৰোচ ‘‘অত্থি, মহারাজ, ইমস্স চক্কস্স অন্তো’’তি? ‘‘নত্থি ভন্তে’’তি। ‘‘এৰমেৰ খো, মহারাজ, ইমানি চক্কানি ৰুত্তানি ভগৰতা ‘চক্খুঞ্চ পটিচ্চ রূপে চ উপ্পজ্জতি চক্খুৰিঞ্ঞাণং, তিণ্ণং সঙ্গতি ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা কম্মং, কম্মতো পুন চক্খুং জাযতী’তি। এৰমেতিস্সা সন্ততিযা অত্থি অন্তো’’তি? ‘‘নত্থি ভন্তে’’তি।
‘‘Bhiyyo opammaṃ karohī’’ti. Thero pathaviyā cakkaṃ likhitvā milindaṃ rājānaṃ etadavoca ‘‘atthi, mahārāja, imassa cakkassa anto’’ti? ‘‘Natthi bhante’’ti. ‘‘Evameva kho, mahārāja, imāni cakkāni vuttāni bhagavatā ‘cakkhuñca paṭicca rūpe ca uppajjati cakkhuviññāṇaṃ, tiṇṇaṃ saṅgati phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā kammaṃ, kammato puna cakkhuṃ jāyatī’ti. Evametissā santatiyā atthi anto’’ti? ‘‘Natthi bhante’’ti.
‘‘‘সোতঞ্চ পটিচ্চ সদ্দে চ…পে॰… মনঞ্চ পটিচ্চ ধম্মে চ উপ্পজ্জতি মনোৰিঞ্ঞাণং, তিণ্ণং সঙ্গতি ফস্সো, ফস্সপচ্চযা ৰেদনা, ৰেদনাপচ্চযা তণ্হা, তণ্হাপচ্চযা উপাদানং, উপাদানপচ্চযা কম্মং, কম্মতো পুন মনো জাযতী’তি। এৰমেতিস্সা সন্ততিযা অত্থি অন্তো’’তি? ‘‘নত্থি ভন্তে’’তি। ‘‘এৰমেৰ খো, মহারাজ, অদ্ধানস্সাপি পুরিমা কোটি ন পঞ্ঞাযতী’’তি।
‘‘‘Sotañca paṭicca sadde ca…pe… manañca paṭicca dhamme ca uppajjati manoviññāṇaṃ, tiṇṇaṃ saṅgati phasso, phassapaccayā vedanā, vedanāpaccayā taṇhā, taṇhāpaccayā upādānaṃ, upādānapaccayā kammaṃ, kammato puna mano jāyatī’ti. Evametissā santatiyā atthi anto’’ti? ‘‘Natthi bhante’’ti. ‘‘Evameva kho, mahārāja, addhānassāpi purimā koṭi na paññāyatī’’ti.
‘‘কল্লোসি, ভন্তে নাগসেনা’’তি।
‘‘Kallosi, bhante nāgasenā’’ti.
পুরিমকোটিপঞ্হো দুতিযো।
Purimakoṭipañho dutiyo.
Footnotes:
