| Library / Tipiṭaka / තිපිටක • Tipiṭaka / කඞ්ඛාවිතරණී-පුරාණ-ටීකා • Kaṅkhāvitaraṇī-purāṇa-ṭīkā |
4. පුරාණචීවරසික්ඛාපදවණ්ණනා
4. Purāṇacīvarasikkhāpadavaṇṇanā
‘‘සාකියානියො විය සුද්ධභික්ඛුසඞ්ඝෙ වා’’ති ඉදං ‘‘භික්ඛුනී නාම උභතොසඞ්ඝෙ උපසම්පන්නා’’ති (පාරා. 505) ඉමිනා විරුජ්ඣතීති චෙ? න, අධිප්පායාජානනතො . භික්ඛූනං සන්තිකෙ උපසම්පදාය පටික්ඛිත්තත්තා තදනුප්පසඞ්ගභයා එවං වුත්තන්ති වෙදිතබ්බං.
‘‘Sākiyāniyo viya suddhabhikkhusaṅghe vā’’ti idaṃ ‘‘bhikkhunī nāma ubhatosaṅghe upasampannā’’ti (pārā. 505) iminā virujjhatīti ce? Na, adhippāyājānanato . Bhikkhūnaṃ santike upasampadāya paṭikkhittattā tadanuppasaṅgabhayā evaṃ vuttanti veditabbaṃ.
එකෙන වත්ථුනාති යෙන කෙනචි පඨමෙන. අවුත්තා වා ධොවතීති අවුත්තා ධොවති, රජති ආකොටෙතීති අත්ථො. ‘‘‘අවුත්තා’ති වචනතො අවාදාපෙත්වා ධොවනාදීසු අනාපත්තී’’ති ලිඛිතං. ඉධ චීවරං නාම නිවාසනපාරුපනූපගමෙව. යදි එවං ‘‘නිවාසනපාරුපනූපගමෙව වත්තබ්බ’’න්ති චෙ? තං න වත්තබ්බං ‘‘පුරාණචීවර’’න්ති ඉමිනාව සිද්ධත්තා. වුත්තඤ්හෙතං ‘‘පුරාණචීවරං නාම සකිං නිවත්ථම්පි සකිං පාරුතම්පී’’ති (පාරා. 505).
Ekena vatthunāti yena kenaci paṭhamena. Avuttā vā dhovatīti avuttā dhovati, rajati ākoṭetīti attho. ‘‘‘Avuttā’ti vacanato avādāpetvā dhovanādīsu anāpattī’’ti likhitaṃ. Idha cīvaraṃ nāma nivāsanapārupanūpagameva. Yadi evaṃ ‘‘nivāsanapārupanūpagameva vattabba’’nti ce? Taṃ na vattabbaṃ ‘‘purāṇacīvara’’nti imināva siddhattā. Vuttañhetaṃ ‘‘purāṇacīvaraṃ nāma sakiṃ nivatthampi sakiṃ pārutampī’’ti (pārā. 505).
පුරාණචීවරසික්ඛාපදවණ්ණනා නිට්ඨිතා.
Purāṇacīvarasikkhāpadavaṇṇanā niṭṭhitā.
