| Library / Tipiṭaka / တိပိဋက • Tipiṭaka / ကင္ခာဝိတရဏီ-ပုရာဏ-ဋီကာ • Kaṅkhāvitaraṇī-purāṇa-ṭīkā |
၄. ပုရာဏစီဝရသိက္ခာပဒဝဏ္ဏနာ
4. Purāṇacīvarasikkhāpadavaṇṇanā
‘‘သာကိယာနိယော ဝိယ သုဒ္ဓဘိက္ခုသင္ဃေ ဝာ’’တိ ဣဒံ ‘‘ဘိက္ခုနီ နာမ ဥဘတောသင္ဃေ ဥပသမ္ပန္နာ’’တိ (ပာရာ. ၅၀၅) ဣမိနာ ဝိရုဇ္ဈတီတိ စေ? န, အဓိပ္ပာယာဇာနနတော ။ ဘိက္ခူနံ သန္တိကေ ဥပသမ္ပဒာယ ပဋိက္ခိတ္တတ္တာ တဒနုပ္ပသင္ဂဘယာ ဧဝံ ဝုတ္တန္တိ ဝေဒိတဗ္ဗံ။
‘‘Sākiyāniyo viya suddhabhikkhusaṅghe vā’’ti idaṃ ‘‘bhikkhunī nāma ubhatosaṅghe upasampannā’’ti (pārā. 505) iminā virujjhatīti ce? Na, adhippāyājānanato . Bhikkhūnaṃ santike upasampadāya paṭikkhittattā tadanuppasaṅgabhayā evaṃ vuttanti veditabbaṃ.
ဧကေန ဝတ္ထုနာတိ ယေန ကေနစိ ပဌမေန။ အဝုတ္တာ ဝာ ဓောဝတီတိ အဝုတ္တာ ဓောဝတိ, ရဇတိ အာကောဋေတီတိ အတ္ထော။ ‘‘‘အဝုတ္တာ’တိ ဝစနတော အဝာဒာပေတ္ဝာ ဓောဝနာဒီသု အနာပတ္တီ’’တိ လိခိတံ။ ဣဓ စီဝရံ နာမ နိဝာသနပာရုပနူပဂမေဝ။ ယဒိ ဧဝံ ‘‘နိဝာသနပာရုပနူပဂမေဝ ဝတ္တဗ္ဗ’’န္တိ စေ? တံ န ဝတ္တဗ္ဗံ ‘‘ပုရာဏစီဝရ’’န္တိ ဣမိနာဝ သိဒ္ဓတ္တာ။ ဝုတ္တဉ္ဟေတံ ‘‘ပုရာဏစီဝရံ နာမ သကိံ နိဝတ္ထမ္ပိ သကိံ ပာရုတမ္ပီ’’တိ (ပာရာ. ၅၀၅)။
Ekena vatthunāti yena kenaci paṭhamena. Avuttā vā dhovatīti avuttā dhovati, rajati ākoṭetīti attho. ‘‘‘Avuttā’ti vacanato avādāpetvā dhovanādīsu anāpattī’’ti likhitaṃ. Idha cīvaraṃ nāma nivāsanapārupanūpagameva. Yadi evaṃ ‘‘nivāsanapārupanūpagameva vattabba’’nti ce? Taṃ na vattabbaṃ ‘‘purāṇacīvara’’nti imināva siddhattā. Vuttañhetaṃ ‘‘purāṇacīvaraṃ nāma sakiṃ nivatthampi sakiṃ pārutampī’’ti (pārā. 505).
ပုရာဏစီဝရသိက္ခာပဒဝဏ္ဏနာ နိဋ္ဌိတာ။
Purāṇacīvarasikkhāpadavaṇṇanā niṭṭhitā.
