| Library / Tipiṭaka / តិបិដក • Tipiṭaka / កង្ខាវិតរណី-បុរាណ-ដីកា • Kaṅkhāvitaraṇī-purāṇa-ṭīkā |
៤. បុរាណចីវរសិក្ខាបទវណ្ណនា
4. Purāṇacīvarasikkhāpadavaṇṇanā
‘‘សាកិយានិយោ វិយ សុទ្ធភិក្ខុសង្ឃេ វា’’តិ ឥទំ ‘‘ភិក្ខុនី នាម ឧភតោសង្ឃេ ឧបសម្បន្នា’’តិ (បារា. ៥០៥) ឥមិនា វិរុជ្ឈតីតិ ចេ? ន, អធិប្បាយាជាននតោ ។ ភិក្ខូនំ សន្តិកេ ឧបសម្បទាយ បដិក្ខិត្តត្តា តទនុប្បសង្គភយា ឯវំ វុត្តន្តិ វេទិតព្ពំ។
‘‘Sākiyāniyo viya suddhabhikkhusaṅghe vā’’ti idaṃ ‘‘bhikkhunī nāma ubhatosaṅghe upasampannā’’ti (pārā. 505) iminā virujjhatīti ce? Na, adhippāyājānanato . Bhikkhūnaṃ santike upasampadāya paṭikkhittattā tadanuppasaṅgabhayā evaṃ vuttanti veditabbaṃ.
ឯកេន វត្ថុនាតិ យេន កេនចិ បឋមេន។ អវុត្តា វា ធោវតីតិ អវុត្តា ធោវតិ, រជតិ អាកោដេតីតិ អត្ថោ។ ‘‘‘អវុត្តា’តិ វចនតោ អវាទាបេត្វា ធោវនាទីសុ អនាបត្តី’’តិ លិខិតំ។ ឥធ ចីវរំ នាម និវាសនបារុបនូបគមេវ។ យទិ ឯវំ ‘‘និវាសនបារុបនូបគមេវ វត្តព្ព’’ន្តិ ចេ? តំ ន វត្តព្ពំ ‘‘បុរាណចីវរ’’ន្តិ ឥមិនាវ សិទ្ធត្តា។ វុត្តញ្ហេតំ ‘‘បុរាណចីវរំ នាម សកិំ និវត្ថម្បិ សកិំ បារុតម្បី’’តិ (បារា. ៥០៥)។
Ekena vatthunāti yena kenaci paṭhamena. Avuttā vā dhovatīti avuttā dhovati, rajati ākoṭetīti attho. ‘‘‘Avuttā’ti vacanato avādāpetvā dhovanādīsu anāpattī’’ti likhitaṃ. Idha cīvaraṃ nāma nivāsanapārupanūpagameva. Yadi evaṃ ‘‘nivāsanapārupanūpagameva vattabba’’nti ce? Taṃ na vattabbaṃ ‘‘purāṇacīvara’’nti imināva siddhattā. Vuttañhetaṃ ‘‘purāṇacīvaraṃ nāma sakiṃ nivatthampi sakiṃ pārutampī’’ti (pārā. 505).
បុរាណចីវរសិក្ខាបទវណ្ណនា និដ្ឋិតា។
Purāṇacīvarasikkhāpadavaṇṇanā niṭṭhitā.
