| Library / Tipiṭaka / तिपिटक • Tipiṭaka / कङ्खावितरणी-पुराण-टीका • Kaṅkhāvitaraṇī-purāṇa-ṭīkā |
४. पुराणचीवरसिक्खापदवण्णना
4. Purāṇacīvarasikkhāpadavaṇṇanā
‘‘साकियानियो विय सुद्धभिक्खुसङ्घे वा’’ति इदं ‘‘भिक्खुनी नाम उभतोसङ्घे उपसम्पन्ना’’ति (पारा॰ ५०५) इमिना विरुज्झतीति चे? न, अधिप्पायाजाननतो । भिक्खूनं सन्तिके उपसम्पदाय पटिक्खित्तत्ता तदनुप्पसङ्गभया एवं वुत्तन्ति वेदितब्बं।
‘‘Sākiyāniyo viya suddhabhikkhusaṅghe vā’’ti idaṃ ‘‘bhikkhunī nāma ubhatosaṅghe upasampannā’’ti (pārā. 505) iminā virujjhatīti ce? Na, adhippāyājānanato . Bhikkhūnaṃ santike upasampadāya paṭikkhittattā tadanuppasaṅgabhayā evaṃ vuttanti veditabbaṃ.
एकेन वत्थुनाति येन केनचि पठमेन। अवुत्ता वा धोवतीति अवुत्ता धोवति, रजति आकोटेतीति अत्थो। ‘‘‘अवुत्ता’ति वचनतो अवादापेत्वा धोवनादीसु अनापत्ती’’ति लिखितं। इध चीवरं नाम निवासनपारुपनूपगमेव। यदि एवं ‘‘निवासनपारुपनूपगमेव वत्तब्ब’’न्ति चे? तं न वत्तब्बं ‘‘पुराणचीवर’’न्ति इमिनाव सिद्धत्ता। वुत्तञ्हेतं ‘‘पुराणचीवरं नाम सकिं निवत्थम्पि सकिं पारुतम्पी’’ति (पारा॰ ५०५)।
Ekena vatthunāti yena kenaci paṭhamena. Avuttā vā dhovatīti avuttā dhovati, rajati ākoṭetīti attho. ‘‘‘Avuttā’ti vacanato avādāpetvā dhovanādīsu anāpattī’’ti likhitaṃ. Idha cīvaraṃ nāma nivāsanapārupanūpagameva. Yadi evaṃ ‘‘nivāsanapārupanūpagameva vattabba’’nti ce? Taṃ na vattabbaṃ ‘‘purāṇacīvara’’nti imināva siddhattā. Vuttañhetaṃ ‘‘purāṇacīvaraṃ nāma sakiṃ nivatthampi sakiṃ pārutampī’’ti (pārā. 505).
पुराणचीवरसिक्खापदवण्णना निट्ठिता।
Purāṇacīvarasikkhāpadavaṇṇanā niṭṭhitā.
