| Library / Tipiṭaka / តិបិដក • Tipiṭaka / អបទានបាឡិ • Apadānapāḷi |
៣. បុន្នាគបុប្ផិយត្ថេរអបទានំ
3. Punnāgapupphiyattheraapadānaṃ
១៤.
14.
‘‘កាននំ វនមោគយ្ហ, វសាមិ លុទ្ទកោ អហំ;
‘‘Kānanaṃ vanamogayha, vasāmi luddako ahaṃ;
បុន្នាគំ បុប្ផិតំ ទិស្វា, ពុទ្ធសេដ្ឋំ អនុស្សរិំ។
Punnāgaṃ pupphitaṃ disvā, buddhaseṭṭhaṃ anussariṃ.
១៥.
15.
‘‘តំ បុប្ផំ ឱចិនិត្វាន, សុគន្ធំ គន្ធិតំ សុភំ;
‘‘Taṃ pupphaṃ ocinitvāna, sugandhaṃ gandhitaṃ subhaṃ;
ថូបំ កត្វាន បុលិនេ, ពុទ្ធស្ស អភិរោបយិំ។
Thūpaṃ katvāna puline, buddhassa abhiropayiṃ.
១៦.
16.
‘‘ទ្វេនវុតេ ឥតោ កប្បេ, យំ បុប្ផមភិបូជយិំ;
‘‘Dvenavute ito kappe, yaṃ pupphamabhipūjayiṃ;
ទុគ្គតិំ នាភិជានាមិ, ពុទ្ធបូជាយិទំ ផលំ។
Duggatiṃ nābhijānāmi, buddhapūjāyidaṃ phalaṃ.
១៧.
17.
‘‘ឯកម្ហិ នវុតេ កប្បេ, ឯកោ អាសិំ តមោនុទោ;
‘‘Ekamhi navute kappe, eko āsiṃ tamonudo;
សត្តរតនសម្បន្នោ, ចក្កវត្តី មហព្ពលោ។
Sattaratanasampanno, cakkavattī mahabbalo.
១៨.
18.
‘‘បដិសម្ភិទា ចតស្សោ…បេ.… កតំ ពុទ្ធស្ស សាសនំ’’។
‘‘Paṭisambhidā catasso…pe… kataṃ buddhassa sāsanaṃ’’.
ឥត្ថំ សុទំ អាយស្មា បុន្នាគបុប្ផិយោ ថេរោ ឥមា គាថាយោ អភាសិត្ថាតិ។
Itthaṃ sudaṃ āyasmā punnāgapupphiyo thero imā gāthāyo abhāsitthāti.
បុន្នាគបុប្ផិយត្ថេរស្សាបទានំ តតិយំ។
Punnāgapupphiyattherassāpadānaṃ tatiyaṃ.
