| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā |
၂. ပုဂ္ဂလဝိသေသနိဒ္ဒေသဝဏ္ဏနာ
2. Puggalavisesaniddesavaṇṇanā
၈. ဒ္ဝေ ပုဂ္ဂလာတိအာဒီဟိ ပဋိသမ္ဘိဒပ္ပတ္တပုဂ္ဂလဝိသေသပဋိပာဋိံ ဒသ္သေတိ။ တတ္ထ ပုဗ္ဗယောဂောတိ အတီတဇာတီသု ပဋိသမ္ဘိဒပ္ပတ္တိဟေတုဘူတော ပုညပယောဂော။ တေနာတိ တေန ပုဗ္ဗယောဂကာရဏေန။ ဧဝံ သေသေသုပိ။ အတိရေကော ဟောတီတိ အတိရိတ္တော ဟောတိ, အတိရေကယောဂတော ဝာ ‘‘အတိရေကော’’တိ ဝုတ္တော။ အဓိကော ဟောတီတိ အဂ္ဂော ဟောတိ။ ဝိသေသော ဟောတီတိ ဝိသိဋ္ဌော ဟောတိ, ဝိသေသယောဂတော ဝာ ဝိသေသော။ ဉာဏံ ပဘိဇ္ဇတီတိ ပဋိသမ္ဘိဒာဉာဏပ္ပဘေဒံ ပာပုဏာတိ။
8.Dvepuggalātiādīhi paṭisambhidappattapuggalavisesapaṭipāṭiṃ dasseti. Tattha pubbayogoti atītajātīsu paṭisambhidappattihetubhūto puññapayogo. Tenāti tena pubbayogakāraṇena. Evaṃ sesesupi. Atireko hotīti atiritto hoti, atirekayogato vā ‘‘atireko’’ti vutto. Adhiko hotīti aggo hoti. Viseso hotīti visiṭṭho hoti, visesayogato vā viseso. Ñāṇaṃ pabhijjatīti paṭisambhidāñāṇappabhedaṃ pāpuṇāti.
ဗဟုသ္သုတောတိ ဗုဒ္ဓဝစနဝသေန။ ဒေသနာဗဟုလောတိ ဓမ္မဒေသနာဝသေန။ ဂရူပနိသ္သိတောတိ ပညာယ အဓိကံ ဂရုံ ဥပနိသ္သိတော။ ဝိဟာရဗဟုလောတိ ဝိပသ္သနာဝိဟာရဗဟုလော, ဖလသမာပတ္တိဝိဟာရဗဟုလော ဝာ။ ပစ္စဝေက္ခဏာဗဟုလောတိ ဝိပသ္သနာဝိဟာရေ သတိ ဝိပသ္သနာပစ္စဝေက္ခဏာဗဟုလော, ဖလသမာပတ္တိဝိဟာရေ သတိ ဖလသမာပတ္တိပစ္စဝေက္ခဏာဗဟုလော။ သေခပဋိသမ္ဘိဒပ္ပတ္တောတိ သေခော ဟုတ္ဝာ ပဋိသမ္ဘိဒပ္ပတ္တော။ ဧဝံ အသေခပဋိသမ္ဘိဒပ္ပတ္တော။ သာဝကပာရမိပ္ပတ္တောတိ ဧတ္ထ မဟာပညာနံ အဂ္ဂသ္သ မဟာသာဝကသ္သ သတ္တသဋ္ဌိယာ သာဝကဉာဏာနံ ပာရဂမနံ ပာရမီ, သာဝကသ္သ ပာရမီ သာဝကပာရမီ, တံ သာဝကပာရမိံ ပတ္တောတိ သာဝကပာရမိပ္ပတ္တော။ သာဝကပာရမိတာပ္ပတ္တောတိ ဝာ ပာဌော။ သတ္တသဋ္ဌိယာ သာဝကဉာဏာနံ ပာလကော ပူရကော စ သော မဟာသာဝကော ပရမော, တသ္သ ပရမသ္သ အယံ သတ္တသဋ္ဌိဘေဒာ ဉာဏကိရိယာ ပရမသ္သ ဘာဝော, ကမ္မံ ဝာတိ ပာရမီ, တသ္သ သာဝကသ္သ ပာရမီ သာဝကပာရမီ , တံ ပတ္တောတိ သာဝကပာရမိပ္ပတ္တော။ သာဝကပာရမိပ္ပတ္တောတိ မဟာမောဂ္ဂလ္လာနတ္ထေရာဒိကော ယော ကောစိ သာဝကော။ သာဝကပာရမိပ္ပတ္တသာဝကတော အတိရေကသ္သ အညသ္သ သာဝကသ္သ အဘာဝာ ဧကော ပစ္စေကသမ္ဗုဒ္ဓောတိ အာဟ။ ပုန ပညာပဘေဒကုသလောတိအာဒီဟိ ဝုတ္တတ္ထမေဝ နိဂမေတ္ဝာ ဒသ္သေသီတိ။ ဉာဏကထာယ ယေဘုယ္ယေန အနေကာနိ ဉာဏာနိ နိဒ္ဒိဋ္ဌာနိ။ ပညာကထာယ ယေဘုယ္ယေန ဧကာပိ ပညာ နာနာကာရဝသေန နာနာကတ္ဝာ ဝုတ္တာတိ အယံ ဝိသေသော။
Bahussutoti buddhavacanavasena. Desanābahuloti dhammadesanāvasena. Garūpanissitoti paññāya adhikaṃ garuṃ upanissito. Vihārabahuloti vipassanāvihārabahulo, phalasamāpattivihārabahulo vā. Paccavekkhaṇābahuloti vipassanāvihāre sati vipassanāpaccavekkhaṇābahulo, phalasamāpattivihāre sati phalasamāpattipaccavekkhaṇābahulo. Sekhapaṭisambhidappattoti sekho hutvā paṭisambhidappatto. Evaṃ asekhapaṭisambhidappatto. Sāvakapāramippattoti ettha mahāpaññānaṃ aggassa mahāsāvakassa sattasaṭṭhiyā sāvakañāṇānaṃ pāragamanaṃ pāramī, sāvakassa pāramī sāvakapāramī, taṃ sāvakapāramiṃ pattoti sāvakapāramippatto. Sāvakapāramitāppattoti vā pāṭho. Sattasaṭṭhiyā sāvakañāṇānaṃ pālako pūrako ca so mahāsāvako paramo, tassa paramassa ayaṃ sattasaṭṭhibhedā ñāṇakiriyā paramassa bhāvo, kammaṃ vāti pāramī, tassa sāvakassa pāramī sāvakapāramī , taṃ pattoti sāvakapāramippatto. Sāvakapāramippattoti mahāmoggallānattherādiko yo koci sāvako. Sāvakapāramippattasāvakato atirekassa aññassa sāvakassa abhāvā eko paccekasambuddhoti āha. Puna paññāpabhedakusalotiādīhi vuttatthameva nigametvā dassesīti. Ñāṇakathāya yebhuyyena anekāni ñāṇāni niddiṭṭhāni. Paññākathāya yebhuyyena ekāpi paññā nānākāravasena nānākatvā vuttāti ayaṃ viseso.
မဟာပညာကထာဝဏ္ဏနာ နိဋ္ဌိတာ။
Mahāpaññākathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / ပဋိသမ္ဘိဒာမဂ္ဂပာဠိ • Paṭisambhidāmaggapāḷi / ၂. ပုဂ္ဂလဝိသေသနိဒ္ဒေသော • 2. Puggalavisesaniddeso
