| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
2. புக்³க³லவிஸேஸனித்³தே³ஸவண்ணனா
2. Puggalavisesaniddesavaṇṇanā
8. த்³வே புக்³க³லாதிஆதீ³ஹி படிஸம்பி⁴த³ப்பத்தபுக்³க³லவிஸேஸபடிபாடிங் த³ஸ்ஸேதி. தத்த² புப்³ப³யோகோ³தி அதீதஜாதீஸு படிஸம்பி⁴த³ப்பத்திஹேதுபூ⁴தோ புஞ்ஞபயோகோ³. தேனாதி தேன புப்³ப³யோக³காரணேன. ஏவங் ஸேஸேஸுபி. அதிரேகோ ஹோதீதி அதிரித்தோ ஹோதி, அதிரேகயோக³தோ வா ‘‘அதிரேகோ’’தி வுத்தோ. அதி⁴கோ ஹோதீதி அக்³கோ³ ஹோதி. விஸேஸோ ஹோதீதி விஸிட்டோ² ஹோதி, விஸேஸயோக³தோ வா விஸேஸோ. ஞாணங் பபி⁴ஜ்ஜதீதி படிஸம்பி⁴தா³ஞாணப்பபே⁴த³ங் பாபுணாதி.
8.Dvepuggalātiādīhi paṭisambhidappattapuggalavisesapaṭipāṭiṃ dasseti. Tattha pubbayogoti atītajātīsu paṭisambhidappattihetubhūto puññapayogo. Tenāti tena pubbayogakāraṇena. Evaṃ sesesupi. Atireko hotīti atiritto hoti, atirekayogato vā ‘‘atireko’’ti vutto. Adhiko hotīti aggo hoti. Viseso hotīti visiṭṭho hoti, visesayogato vā viseso. Ñāṇaṃ pabhijjatīti paṭisambhidāñāṇappabhedaṃ pāpuṇāti.
ப³ஹுஸ்ஸுதோதி பு³த்³த⁴வசனவஸேன. தே³ஸனாப³ஹுலோதி த⁴ம்மதே³ஸனாவஸேன. க³ரூபனிஸ்ஸிதோதி பஞ்ஞாய அதி⁴கங் க³ருங் உபனிஸ்ஸிதோ. விஹாரப³ஹுலோதி விபஸ்ஸனாவிஹாரப³ஹுலோ, ப²லஸமாபத்திவிஹாரப³ஹுலோ வா. பச்சவெக்க²ணாப³ஹுலோதி விபஸ்ஸனாவிஹாரே ஸதி விபஸ்ஸனாபச்சவெக்க²ணாப³ஹுலோ, ப²லஸமாபத்திவிஹாரே ஸதி ப²லஸமாபத்திபச்சவெக்க²ணாப³ஹுலோ. ஸேக²படிஸம்பி⁴த³ப்பத்தோதி ஸேகோ² ஹுத்வா படிஸம்பி⁴த³ப்பத்தோ. ஏவங் அஸேக²படிஸம்பி⁴த³ப்பத்தோ. ஸாவகபாரமிப்பத்தோதி எத்த² மஹாபஞ்ஞானங் அக்³க³ஸ்ஸ மஹாஸாவகஸ்ஸ ஸத்தஸட்டி²யா ஸாவகஞாணானங் பாரக³மனங் பாரமீ, ஸாவகஸ்ஸ பாரமீ ஸாவகபாரமீ, தங் ஸாவகபாரமிங் பத்தோதி ஸாவகபாரமிப்பத்தோ. ஸாவகபாரமிதாப்பத்தோதி வா பாடோ². ஸத்தஸட்டி²யா ஸாவகஞாணானங் பாலகோ பூரகோ ச ஸோ மஹாஸாவகோ பரமோ, தஸ்ஸ பரமஸ்ஸ அயங் ஸத்தஸட்டி²பே⁴தா³ ஞாணகிரியா பரமஸ்ஸ பா⁴வோ, கம்மங் வாதி பாரமீ, தஸ்ஸ ஸாவகஸ்ஸ பாரமீ ஸாவகபாரமீ , தங் பத்தோதி ஸாவகபாரமிப்பத்தோ. ஸாவகபாரமிப்பத்தோதி மஹாமொக்³க³ல்லானத்தே²ராதி³கோ யோ கோசி ஸாவகோ. ஸாவகபாரமிப்பத்தஸாவகதோ அதிரேகஸ்ஸ அஞ்ஞஸ்ஸ ஸாவகஸ்ஸ அபா⁴வா ஏகோ பச்சேகஸம்பு³த்³தோ⁴தி ஆஹ. புன பஞ்ஞாபபே⁴த³குஸலோதிஆதீ³ஹி வுத்தத்த²மேவ நிக³மெத்வா த³ஸ்ஸேஸீதி. ஞாணகதா²ய யேபு⁴ய்யேன அனேகானி ஞாணானி நித்³தி³ட்டா²னி. பஞ்ஞாகதா²ய யேபு⁴ய்யேன ஏகாபி பஞ்ஞா நானாகாரவஸேன நானாகத்வா வுத்தாதி அயங் விஸேஸோ.
Bahussutoti buddhavacanavasena. Desanābahuloti dhammadesanāvasena. Garūpanissitoti paññāya adhikaṃ garuṃ upanissito. Vihārabahuloti vipassanāvihārabahulo, phalasamāpattivihārabahulo vā. Paccavekkhaṇābahuloti vipassanāvihāre sati vipassanāpaccavekkhaṇābahulo, phalasamāpattivihāre sati phalasamāpattipaccavekkhaṇābahulo. Sekhapaṭisambhidappattoti sekho hutvā paṭisambhidappatto. Evaṃ asekhapaṭisambhidappatto. Sāvakapāramippattoti ettha mahāpaññānaṃ aggassa mahāsāvakassa sattasaṭṭhiyā sāvakañāṇānaṃ pāragamanaṃ pāramī, sāvakassa pāramī sāvakapāramī, taṃ sāvakapāramiṃ pattoti sāvakapāramippatto. Sāvakapāramitāppattoti vā pāṭho. Sattasaṭṭhiyā sāvakañāṇānaṃ pālako pūrako ca so mahāsāvako paramo, tassa paramassa ayaṃ sattasaṭṭhibhedā ñāṇakiriyā paramassa bhāvo, kammaṃ vāti pāramī, tassa sāvakassa pāramī sāvakapāramī , taṃ pattoti sāvakapāramippatto. Sāvakapāramippattoti mahāmoggallānattherādiko yo koci sāvako. Sāvakapāramippattasāvakato atirekassa aññassa sāvakassa abhāvā eko paccekasambuddhoti āha. Puna paññāpabhedakusalotiādīhi vuttatthameva nigametvā dassesīti. Ñāṇakathāya yebhuyyena anekāni ñāṇāni niddiṭṭhāni. Paññākathāya yebhuyyena ekāpi paññā nānākāravasena nānākatvā vuttāti ayaṃ viseso.
மஹாபஞ்ஞாகதா²வண்ணனா நிட்டி²தா.
Mahāpaññākathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 2. புக்³க³லவிஸேஸனித்³தே³ஸோ • 2. Puggalavisesaniddeso
