| Library / Tipiṭaka / তিপিটক • Tipiṭaka / পঞ্চপকরণ-মূলটীকা • Pañcapakaraṇa-mūlaṭīkā |
পুচ্ছাগণনগাথাযো
Pucchāgaṇanagāthāyo
কুসলাদি এককত্তয-মথাদি অন্তেন মজ্ঝিমন্তেন।
Kusalādi ekakattaya-mathādi antena majjhimantena;
আদি চ মজ্ঝেন দুকা, তযো তিকেকো চ ৰিঞ্ঞেয্যো॥
Ādi ca majjhena dukā, tayo tikeko ca viññeyyo.
তেস্ৰেকেকং মূলং কত্ৰা, তং সত্তসত্তকা পুচ্ছা।
Tesvekekaṃ mūlaṃ katvā, taṃ sattasattakā pucchā;
একেকপচ্চযে যথা, ভৰন্তি একূনপঞ্ঞাস॥
Ekekapaccaye yathā, bhavanti ekūnapaññāsa.
ছসত্ততাধিকসতং, সহস্সমেকঞ্চ সুদ্ধিকে পুচ্ছা।
Chasattatādhikasataṃ, sahassamekañca suddhike pucchā;
এস চ নযোনুলোমে, পচ্চনীযে চাতি নাঞ্ঞত্থ॥
Esa ca nayonulome, paccanīye cāti nāññattha.
রাসিগুণিতস্স রাসিস্সড্ঢং, সহ রাসিকস্স পিণ্ডো সো।
Rāsiguṇitassa rāsissaḍḍhaṃ, saha rāsikassa piṇḍo so;
রাসিস্স ৰা সহেকস্সড্ঢং, পুন রাসিনা গুণিতং॥
Rāsissa vā sahekassaḍḍhaṃ, puna rāsinā guṇitaṃ.
ইতি হেতুমূলকাদুক-তিকাদযো ছচ্চ সত্ততিসতা দ্ৰে।
Iti hetumūlakāduka-tikādayo chacca sattatisatā dve;
চতুৰীসতেত্থ পুচ্ছা, অড্ঢুড্ঢসহস্সনহুতঞ্চ॥
Catuvīsatettha pucchā, aḍḍhuḍḍhasahassanahutañca.
তাসং যস্মা সুদ্ধিক-নযো ন পচ্চেকপচ্চযে তস্মা।
Tāsaṃ yasmā suddhika-nayo na paccekapaccaye tasmā;
চতুৰীসতিগুণিতানং, সসুদ্ধিকানং অযং গণনা॥
Catuvīsatiguṇitānaṃ, sasuddhikānaṃ ayaṃ gaṇanā.
লক্খত্তযং দ্ৰিনহুতং, পঞ্চ সহস্সানি সত্ত চ সতানি।
Lakkhattayaṃ dvinahutaṃ, pañca sahassāni satta ca satāni;
দ্ৰাপঞ্ঞাসা এতা, অনুলোমে পিণ্ডিতা পুচ্ছা॥
Dvāpaññāsā etā, anulome piṇḍitā pucchā.
অনুলোমসদিসগণনা, ভৰন্তি পুচ্ছানযে চ পচ্চনীযে।
Anulomasadisagaṇanā, bhavanti pucchānaye ca paccanīye;
হাপেত্ৰা পন সেসে, নযদ্ৰযে সুদ্ধিকে লদ্ধা॥
Hāpetvā pana sese, nayadvaye suddhike laddhā.
ছপ্পঞ্ঞাস ভৰন্তি পুচ্ছা, ছসতসহিতঞ্চ লক্খতেরসকং।
Chappaññāsa bhavanti pucchā, chasatasahitañca lakkhaterasakaṃ;
পুচ্ছানযেসু গণিতা, পটিচ্চৰারে চতূস্ৰপি॥
Pucchānayesu gaṇitā, paṭiccavāre catūsvapi.
সত্তহি গুণিতা কুসলত্তিকে দ্ৰযং, নৰুতিঞ্চেৰ পঞ্চসতা।
Sattahi guṇitā kusalattike dvayaṃ, navutiñceva pañcasatā;
চত্তারি সহস্সানি চ, তথেকনৰুতে চ লক্খকা॥
Cattāri sahassāni ca, tathekanavute ca lakkhakā.
নাদ্ৰাৰীসতি গুণিতা, তিকেসু সব্বেসু ৰীসতি চ কোটি।
Nādvāvīsati guṇitā, tikesu sabbesu vīsati ca koṭi;
লক্খত্তযং সহস্সং, চতুৰীসতি চাপি ৰিঞ্ঞেয্যা॥
Lakkhattayaṃ sahassaṃ, catuvīsati cāpi viññeyyā.
তিকপট্ঠানং।
Tikapaṭṭhānaṃ.
এককপচ্চযে পন, নৰ নৰ কত্ৰা সসোল়সদ্ৰিসতং।
Ekakapaccaye pana, nava nava katvā sasoḷasadvisataṃ;
হেতুদুকপঠমৰারে, পঠমনযে সুদ্ধিকে পুচ্ছা॥
Hetudukapaṭhamavāre, paṭhamanaye suddhike pucchā.
হেতাদিমূলকনযে-স্ৰেকেকস্মিং দুকাদিভেদযুতে।
Hetādimūlakanaye-svekekasmiṃ dukādibhedayute;
চতুরাসীতিচতুসত-সহিতং সহস্সদ্ৰযং পুচ্ছা॥
Caturāsīticatusata-sahitaṃ sahassadvayaṃ pucchā.
তা চতুৰীসতিগুণিতা, সসুদ্ধিকা এত্থ হোন্তি অনুলোমে।
Tā catuvīsatiguṇitā, sasuddhikā ettha honti anulome;
দ্ৰত্তিংসট্ঠসতাধিক-সহস্সনৰকড্ঢলক্খকা॥
Dvattiṃsaṭṭhasatādhika-sahassanavakaḍḍhalakkhakā.
এৰং পচ্চনীযে দ্ৰে, সুদ্ধিকরহিতা চতূস্ৰতো হোন্তি।
Evaṃ paccanīye dve, suddhikarahitā catūsvato honti;
ছন্নৰুতট্ঠসতট্ঠ-তিংসসহস্সদ্ৰিলক্খকানি॥
Channavutaṭṭhasataṭṭha-tiṃsasahassadvilakkhakāni.
তা পন সত্তগুণা দ্ৰে, সত্ততিসতদ্ৰযং সহস্সানি।
Tā pana sattaguṇā dve, sattatisatadvayaṃ sahassāni;
দ্ৰাসত্ততি হোন্তি ততো, সোল়স লক্খানি হেতুদুকে॥
Dvāsattati honti tato, soḷasa lakkhāni hetuduke.
তা সতগুণা দুকসতে, সতদ্ৰযং সত্তৰীসতি সহস্সা।
Tā sataguṇā dukasate, satadvayaṃ sattavīsati sahassā;
দ্ৰাসত্ততিলক্খানি চ, সোল়সকোটি ততো পুচ্ছা॥
Dvāsattatilakkhāni ca, soḷasakoṭi tato pucchā.
দুকপট্ঠানং।
Dukapaṭṭhānaṃ.
দুকতিকপট্ঠানে তিক-পক্খেপো হোতি একমেকদুকে।
Dukatikapaṭṭhāne tika-pakkhepo hoti ekamekaduke;
তস্স ছসট্ঠিগুণেন তে, ছসট্ঠিসতং দুকা হোন্তি॥
Tassa chasaṭṭhiguṇena te, chasaṭṭhisataṃ dukā honti.
হেতুদুকলদ্ধপুচ্ছা, গুণিতা তেহি চ হোন্তি তিকপদমেৰ।
Hetudukaladdhapucchā, guṇitā tehi ca honti tikapadameva;
দুকপট্ঠানে পুচ্ছা, তাসং গণনা অযং ঞেয্যা॥
Dukapaṭṭhāne pucchā, tāsaṃ gaṇanā ayaṃ ñeyyā.
দ্ৰাপঞ্ঞাস সতানি চ, নৰেৰ নহুতানি নৰ চ সট্ঠিঞ্চ।
Dvāpaññāsa satāni ca, naveva nahutāni nava ca saṭṭhiñca;
লক্খানি তীহি সহিতং, সতং সহস্সঞ্চ কোটিনং॥
Lakkhāni tīhi sahitaṃ, sataṃ sahassañca koṭinaṃ.
দুকতিকপট্ঠানং।
Dukatikapaṭṭhānaṃ.
তিকদুকপট্ঠানে তিক-মেকেকং দ্ৰিসতভেদনং কত্ৰা।
Tikadukapaṭṭhāne tika-mekekaṃ dvisatabhedanaṃ katvā;
দ্ৰাৰীসদ্ৰিসতগুণা, ঞেয্যা কুসলত্তিকে লদ্ধা॥
Dvāvīsadvisataguṇā, ñeyyā kusalattike laddhā.
পুচ্ছা অট্ঠসতাধিক-চতুসহস্সদ্ৰিলক্খযুত্তানং।
Pucchā aṭṭhasatādhika-catusahassadvilakkhayuttānaṃ;
কোটীনং ছক্কমথো, কোটিসহস্সানি চত্তারি॥
Koṭīnaṃ chakkamatho, koṭisahassāni cattāri.
তিকদুকপট্ঠানং।
Tikadukapaṭṭhānaṃ.
তিকতিকপট্ঠানে , তেসট্ঠিৰিধেকেকভেদনা তু তিকা।
Tikatikapaṭṭhāne , tesaṭṭhividhekekabhedanā tu tikā;
তেহি চ গুণিতা কুসল-ত্তিকপুচ্ছাপি হোন্তি পুচ্ছা তা॥
Tehi ca guṇitā kusala-ttikapucchāpi honti pucchā tā.
দ্ৰাদস পঞ্চসতা চতু-সট্ঠিসহস্সানি নৰুতি চেকূনা।
Dvādasa pañcasatā catu-saṭṭhisahassāni navuti cekūnā;
লক্খানমেকসট্ঠি, দ্ৰাদসসতকোটিযো চেৰ॥
Lakkhānamekasaṭṭhi, dvādasasatakoṭiyo ceva.
তিকতিকপট্ঠানং।
Tikatikapaṭṭhānaṃ.
দ্ৰযহীনদ্ৰযসতগুণো, একেকো দুকদুকে তেহি।
Dvayahīnadvayasataguṇo, ekeko dukaduke tehi;
হেতুদুকে লদ্ধা সঙ্খ্য-ভেদেহি চ ৰড্ঢিতা পুচ্ছা॥
Hetuduke laddhā saṅkhya-bhedehi ca vaḍḍhitā pucchā.
ছসতযুতানি পঞ্চা-সীতিসহস্সানি লক্খনৰকঞ্চ।
Chasatayutāni pañcā-sītisahassāni lakkhanavakañca;
একাদসাপি কোটি, পুন কোটিসতানি তেত্তিংস॥
Ekādasāpi koṭi, puna koṭisatāni tettiṃsa.
দুকদুকপট্ঠানং।
Dukadukapaṭṭhānaṃ.
সম্পিণ্ডিতা তু পুচ্ছা, অনুলোমে ছব্বিধেপি পট্ঠানে।
Sampiṇḍitā tu pucchā, anulome chabbidhepi paṭṭhāne;
ছত্তিংসতিসতসহস্স-ট্ঠকযুতসত্তনহুতানি॥
Chattiṃsatisatasahassa-ṭṭhakayutasattanahutāni.
লক্খানি ছচ্চ চত্তা-লীসেৰ নৰাথ কোটিযো দস চ।
Lakkhāni chacca cattā-līseva navātha koṭiyo dasa ca;
সত্তকোটিসতেহি চ, কোটিসহস্সানি নৰ হোন্তি॥
Sattakoṭisatehi ca, koṭisahassāni nava honti.
তা চতুগুণিতা পুচ্ছা, চতুপ্পভেদে সমন্তপট্ঠানে।
Tā catuguṇitā pucchā, catuppabhede samantapaṭṭhāne;
চতুচত্তালীসসতত্তযং, সহস্সানি তেরস চ॥
Catucattālīsasatattayaṃ, sahassāni terasa ca.
সত্তাসীতি চ লক্খানং, কোটীনঞ্চ সত্তসত্ততিযো।
Sattāsīti ca lakkhānaṃ, koṭīnañca sattasattatiyo;
হোন্তিট্ঠসতানিট্ঠ-তিংসসতসহস্সানি ইতি গণনা॥
Hontiṭṭhasatāniṭṭha-tiṃsasatasahassāni iti gaṇanā.
পট্ঠানস্স পুচ্ছাগণনগাথা।
Paṭṭhānassa pucchāgaṇanagāthā.
পট্ঠানপকরণ-মূলটীকা সমত্তা।
Paṭṭhānapakaraṇa-mūlaṭīkā samattā.
ইতি ভদন্তআনন্দাচরিযকেন কতা লীনত্থপদৰণ্ণনা
Iti bhadantaānandācariyakena katā līnatthapadavaṇṇanā
অভিধম্মস্স মূলটীকা সমত্তা।
Abhidhammassa mūlaṭīkā samattā.
