| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. ပုဗ္ဗေသမ္ဗောဓသုတ္တဝဏ္ဏနာ
2. Pubbesambodhasuttavaṇṇanā
၁၁၅. အယံ ပထဝီဓာတုံ နိသ္သာယ တံ အာရဗ္ဘ ပဝတ္တော အသ္သာဒော။ ဧဝံ ပဝတ္တာနန္တိ ဧဝံ ကာယေ ပဘာဝသ္သ ပဝေဒနဝသေနေဝ ပဝတ္တာနံ။ ဟုတ္ဝာ အဘာဝာကာရေနာတိ ပုဗ္ဗေ အဝိဇ္ဇမာနာ ပစ္စယသာမဂ္ဂိယာ ဟုတ္ဝာ ဥပ္ပဇ္ဇိတ္ဝာ ပုန ဘင္ဂုပဂမနတော ဥဒ္ဓံ အဘာဝာကာရေန။ န နိစ္စာတိ အနိစ္စာ အဒ္ဓုဝတ္တာ, ဓုဝံ နိစ္စံ။ ပဋိပီဠနာကာရေနာတိ ဥဒယဗ္ဗယဝသေန အဘိဏ္ဟံ ပီဠနာကာရေန ဒုက္ခဋ္ဌေန။ သဘာဝဝိဂမာကာရေနာတိ အတ္တနော သဘာဝသ္သ ဝိဂစ္ဆနာကာရေန။ သဘာဝဓမ္မာ ဟိ အပ္ပမတ္တံ ခဏံ ပတ္ဝာ နိရုဇ္ဈန္တိ။ တသ္မာ တေ ‘‘ဇရာယ မရဏေန စာ’’တိ ဒ္ဝေဓာ ဝိပရိဏမန္တိ။ တေနာဟ ‘‘ဝိပရိဏာမဓမ္မာ’’တိ။ အာဒီနံ ဝာတိ ပဝတ္တေတီတိ အာဒီနဝော, ပရမကာပညတာ။ ဝိနီယတီတိ ဝူပသမီယတိ။ အစ္စန္တပ္ပဟာနဝသေန နိသ္သရတိ ဧတေနာတိ နိသ္သရဏံ။
115. Ayaṃ pathavīdhātuṃ nissāya taṃ ārabbha pavatto assādo. Evaṃ pavattānanti evaṃ kāye pabhāvassa pavedanavaseneva pavattānaṃ. Hutvā abhāvākārenāti pubbe avijjamānā paccayasāmaggiyā hutvā uppajjitvā puna bhaṅgupagamanato uddhaṃ abhāvākārena. Na niccāti aniccā addhuvattā, dhuvaṃ niccaṃ. Paṭipīḷanākārenāti udayabbayavasena abhiṇhaṃ pīḷanākārena dukkhaṭṭhena. Sabhāvavigamākārenāti attano sabhāvassa vigacchanākārena. Sabhāvadhammā hi appamattaṃ khaṇaṃ patvā nirujjhanti. Tasmā te ‘‘jarāya maraṇena cā’’ti dvedhā vipariṇamanti. Tenāha ‘‘vipariṇāmadhammā’’ti. Ādīnaṃ vāti pavattetīti ādīnavo, paramakāpaññatā. Vinīyatīti vūpasamīyati. Accantappahānavasena nissarati etenāti nissaraṇaṃ.
သာယံ နိပန္နာ သဗ္ဗရတ္တိံ ခေပေတ္ဝာ ပာတော ဥဋ္ဌဟာမ, မာသပုဏ္ဏဃဋော ဝိယ နော သရီရံ နိသ္သန္ဒာဘာဝတော။
Sāyaṃ nipannā sabbarattiṃ khepetvā pāto uṭṭhahāma, māsapuṇṇaghaṭo viya no sarīraṃ nissandābhāvato.
ဖုသိတမတ္တေသုပီတိ ဥဒကသ္သ ဖုသိတမတ္တေသုပိ။
Phusitamattesupīti udakassa phusitamattesupi.
အတိနာမေန္တိ ကာလံ။ ဧဝံ ဝုတ္တနယေန ပဝတ္တာ ပုဂ္ဂလာ ဧတာ ပထဝီဓာတုအာဒယော အသ္သာဒေန္တိ နာမ အဘိရတိဝသေန တတ္ထ အာကင္ခုပ္ပာဒနတော။
Atināmenti kālaṃ. Evaṃ vuttanayena pavattā puggalā etā pathavīdhātuādayo assādenti nāma abhirativasena tattha ākaṅkhuppādanato.
အဘိဝိသိဋ္ဌေန ဉာဏေနာတိ အဂ္ဂမဂ္ဂဉာဏေန။ ရုက္ခော ဗောဓိ ‘‘ဗုဇ္ဈတိ ဧတ္ထာ’’တိ ကတ္ဝာ။ မဂ္ဂော ဗောဓိ ‘‘ဗုဇ္ဈတိ ဧတေနာ’’တိ ကတ္ဝာ။ သဗ္ဗညုတညာဏံ ဗောဓိ သမ္မာ သာမဉ္စ သဗ္ဗဓမ္မာနံ ဗုဇ္ဈနတော။ နိဗ္ဗာနံ ဗောဓိ ဗုဇ္ဈိတဗ္ဗတော။ တေသန္တိ နိဒ္ဓာရဏေ သာမိဝစနံ။ သာဝကပာရမီဉာဏန္တိ သာဝကပာရမီဉာဏံ ယာထာဝတော ဒသ္သနဝတ္ထု။
Abhivisiṭṭhena ñāṇenāti aggamaggañāṇena. Rukkho bodhi ‘‘bujjhati etthā’’ti katvā. Maggo bodhi ‘‘bujjhati etenā’’ti katvā. Sabbaññutaññāṇaṃ bodhi sammā sāmañca sabbadhammānaṃ bujjhanato. Nibbānaṃ bodhi bujjhitabbato. Tesanti niddhāraṇe sāmivacanaṃ. Sāvakapāramīñāṇanti sāvakapāramīñāṇaṃ yāthāvato dassanavatthu.
အကုပ္ပာတိ ပဋိပက္ခေဟိ အကောပေတဗ္ဗော။ ကာရဏတောတိ အရိယမဂ္ဂတော။ တတော ဟိသ္သ အကုပ္ပတာ။ တေနာဟ ‘‘သာ ဟီ’’တိအာဒီ။ အာရမ္မဏတောတိ နိဗ္ဗာနာရမ္မဏတော နိဗ္ဗာနာရမ္မဏာနံ လောကိယသမာပတ္တီနံ အဘာဝတော။
Akuppāti paṭipakkhehi akopetabbo. Kāraṇatoti ariyamaggato. Tato hissa akuppatā. Tenāha ‘‘sā hī’’tiādī. Ārammaṇatoti nibbānārammaṇato nibbānārammaṇānaṃ lokiyasamāpattīnaṃ abhāvato.
ဝိတ္ထာရဝသေနာတိ ဧကေကဓာတုဝသေနာတိ ဝဒန္တိ, ဧကေကိသ္သာ ပန ဓာတုယာ လက္ခဏဝိဘတ္တိဒသ္သနဝသေန။ ယန္တိ ဟေတုအတ္ထေ နိပာတော, ယံ နိမိတ္တန္တိ အတ္ထော။ အသ္သာဒေတိ ဧတေနာတိ အသ္သာဒော, တဏ္ဟာ။ အယံ ပထဝီဓာတုယာ အသ္သာဒောတိ ဧတ္ထ အယံ-သဒ္ဒော ‘‘ပဟာနပဋိဝေဓော’’တိ ဧတ္ထာပိ အာနေတ္ဝာ သမ္ဗန္ဓိတဗ္ဗော ‘‘အယံ ပဟာနပဋိဝေဓော ပဋိဝိဇ္ဈိတဗ္ဗဋ္ဌေန သမုဒယသစ္စ’’န္တိ။ ဧသ နယော သေသသစ္စေသုပိ။ ယာတိ ယထာဝုတ္တေသု အသ္သာဒော အာဒီနဝော နိသ္သရဏန္တိ ဣမေသု တီသု ဌာနေသု ပဝတ္တာ ယာ ဒိဋ္ဌိ။ပေ.။ ယော သမာဓိ, အယံ ဘာဝနာပဋိဝေဓော မဂ္ဂသစ္စန္တိ ဝုတ္တနယေနေဝ ယောဇေတဗ္ဗံ။
Vitthāravasenāti ekekadhātuvasenāti vadanti, ekekissā pana dhātuyā lakkhaṇavibhattidassanavasena. Yanti hetuatthe nipāto, yaṃ nimittanti attho. Assādeti etenāti assādo, taṇhā. Ayaṃ pathavīdhātuyā assādoti ettha ayaṃ-saddo ‘‘pahānapaṭivedho’’ti etthāpi ānetvā sambandhitabbo ‘‘ayaṃ pahānapaṭivedho paṭivijjhitabbaṭṭhena samudayasacca’’nti. Esa nayo sesasaccesupi. Yāti yathāvuttesu assādo ādīnavo nissaraṇanti imesu tīsu ṭhānesu pavattā yā diṭṭhi…pe… yo samādhi, ayaṃ bhāvanāpaṭivedho maggasaccanti vuttanayeneva yojetabbaṃ.
ပုဗ္ဗေသမ္ဗောဓသုတ္တဝဏ္ဏနာ နိဋ္ဌိတာ။
Pubbesambodhasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. ပုဗ္ဗေသမ္ဗောဓသုတ္တံ • 2. Pubbesambodhasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. ပုဗ္ဗေသမ္ဗောဓသုတ္တဝဏ္ဏနာ • 2. Pubbesambodhasuttavaṇṇanā
