| Library / Tipiṭaka / តិបិដក • Tipiṭaka / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā |
៨. បុព្ពន្តានុទិដ្ឋិនិទ្ទេសវណ្ណនា
8. Pubbantānudiṭṭhiniddesavaṇṇanā
១៤១. បុព្ពន្តាបរន្តានុទិដ្ឋីសុ សស្សតំ វទន្តីតិ សស្សតវាទា។ អថ វា វទន្តិ ឯតេនាតិ វាទោ, ទិដ្ឋិគតស្សេតំ អធិវចនំ។ សស្សតន្តិ វាទោបិ សស្សតយោគេន សស្សតោ, សស្សតោ វាទោ ឯតេសន្តិ សស្សតវាទា។ តថា ឯកច្ចំ សស្សតន្តិ វាទោ ឯកច្ចសស្សតោ, សោ ឯតេសំ អត្ថីតិ ឯកច្ចសស្សតិកា។ តថា អន្តវា, អនន្តវា, អន្តវា ច អនន្តវា ច, នេវន្តវា នានន្តវាតិ បវត្តោ វាទោ អន្តានន្តោ, សោ ឯតេសំ អត្ថីតិ អន្តានន្តិកា។ ន មរតីតិ អមរា។ កា សា? ‘‘ឯវម្បិ មេ នោ’’តិអាទិនា (ទី. និ. ១.៦២-៦៣) នយេន បរិយន្តរហិតស្ស ទិដ្ឋិគតិកស្ស ទិដ្ឋិ ចេវ វាចា ច។ វិវិធោ ខេបោ វិក្ខេបោ, អមរាយ ទិដ្ឋិយា, វាចាយ វា វិក្ខេបោ អមរាវិក្ខេបោ, សោ ឯតេសំ អត្ថីតិ អមរាវិក្ខេបិកា។ អបរោ នយោ – អមរា នាម មច្ឆជាតិ , សា ឧម្មុជ្ជននិមុជ្ជនាទិវសេន ឧទកេ សន្ធាវមានា គហេតុំ ន សក្កា ហោតិ, ឯវមេវំ អយម្បិ វាទោ ឥតោ ចិតោ ច សន្ធាវតិ, គាហំ ន ឧបគច្ឆតីតិ អមរាវិក្ខេបោតិ វុច្ចតិ, សោ ឯតេសំ អត្ថីតិ អមរាវិក្ខេបិកា។ អធិច្ចសមុប្បន្នោតិ អការណសមុប្បន្នោ អត្តា ច លោកោ ចាតិ ទស្សនំ អធិច្ចសមុប្បន្នំ, តំ ឯតេសំ អត្ថីតិ អធិច្ចសមុប្បន្និកា។
141. Pubbantāparantānudiṭṭhīsu sassataṃ vadantīti sassatavādā. Atha vā vadanti etenāti vādo, diṭṭhigatassetaṃ adhivacanaṃ. Sassatanti vādopi sassatayogena sassato, sassato vādo etesanti sassatavādā. Tathā ekaccaṃ sassatanti vādo ekaccasassato, so etesaṃ atthīti ekaccasassatikā. Tathā antavā, anantavā, antavā ca anantavā ca, nevantavā nānantavāti pavatto vādo antānanto, so etesaṃ atthīti antānantikā. Na maratīti amarā. Kā sā? ‘‘Evampi me no’’tiādinā (dī. ni. 1.62-63) nayena pariyantarahitassa diṭṭhigatikassa diṭṭhi ceva vācā ca. Vividho khepo vikkhepo, amarāya diṭṭhiyā, vācāya vā vikkhepo amarāvikkhepo, so etesaṃ atthīti amarāvikkhepikā. Aparo nayo – amarā nāma macchajāti , sā ummujjananimujjanādivasena udake sandhāvamānā gahetuṃ na sakkā hoti, evamevaṃ ayampi vādo ito cito ca sandhāvati, gāhaṃ na upagacchatīti amarāvikkhepoti vuccati, so etesaṃ atthīti amarāvikkhepikā. Adhiccasamuppannoti akāraṇasamuppanno attā ca loko cāti dassanaṃ adhiccasamuppannaṃ, taṃ etesaṃ atthīti adhiccasamuppannikā.
បុព្ពន្តានុទិដ្ឋិនិទ្ទេសវណ្ណនា និដ្ឋិតា។
Pubbantānudiṭṭhiniddesavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / បដិសម្ភិទាមគ្គបាឡិ • Paṭisambhidāmaggapāḷi / ៨. បុព្ពន្តានុទិដ្ឋិនិទ្ទេសោ • 8. Pubbantānudiṭṭhiniddeso
