| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. पुब्बङ्गमियत्थेरअपदानं
10. Pubbaṅgamiyattheraapadānaṃ
४३.
43.
‘‘चुल्लासीतिसहस्सानि , पब्बजिम्ह अकिञ्चना।
‘‘Cullāsītisahassāni , pabbajimha akiñcanā;
तेसं पुब्बङ्गमो आसिं, उत्तमत्थस्स पत्तिया॥
Tesaṃ pubbaṅgamo āsiṃ, uttamatthassa pattiyā.
४४.
44.
उपट्ठहिंसु सक्कच्चं, पसन्ना सेहि पाणिभि॥
Upaṭṭhahiṃsu sakkaccaṃ, pasannā sehi pāṇibhi.
४५.
45.
‘‘खीणासवा वन्तदोसा, कतकिच्चा अनासवा।
‘‘Khīṇāsavā vantadosā, katakiccā anāsavā;
फरिंसु मेत्तचित्तेन, सयम्भू अपराजिता॥
Phariṃsu mettacittena, sayambhū aparājitā.
४६.
46.
‘‘तेसं उपट्ठहित्वान, सम्बुद्धानं पतिस्सतो।
‘‘Tesaṃ upaṭṭhahitvāna, sambuddhānaṃ patissato;
मरणञ्च अनुप्पत्तो, देवत्तञ्च अगम्हसे॥
Maraṇañca anuppatto, devattañca agamhase.
४७.
47.
‘‘चतुन्नवुतितो कप्पे, यं सीलमनुपालयिं।
‘‘Catunnavutito kappe, yaṃ sīlamanupālayiṃ;
दुग्गतिं नाभिजानामि, सञ्ञमस्स इदं फलं॥
Duggatiṃ nābhijānāmi, saññamassa idaṃ phalaṃ.
४८.
48.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा पुब्बङ्गमियो थेरो इमा गाथायो अभासित्थाति।
Itthaṃ sudaṃ āyasmā pubbaṅgamiyo thero imā gāthāyo abhāsitthāti.
पुब्बङ्गमियत्थेरस्सापदानं दसमं।
Pubbaṅgamiyattherassāpadānaṃ dasamaṃ.
पण्णदायकवग्गो एकूनतिंसतिमो।
Paṇṇadāyakavaggo ekūnatiṃsatimo.
तस्सुद्दानं –
Tassuddānaṃ –
पण्णं फलं पच्चुग्गमं, एकपुप्फि च मघवा।
Paṇṇaṃ phalaṃ paccuggamaṃ, ekapupphi ca maghavā;
उपट्ठाकापदानञ्च , पब्बज्जा बुद्धुपट्ठाको।
Upaṭṭhākāpadānañca , pabbajjā buddhupaṭṭhāko;
पुब्बङ्गमो च गाथायो, अट्ठतालीस कित्तिता॥
Pubbaṅgamo ca gāthāyo, aṭṭhatālīsa kittitā.
Footnotes:
