| Library / Tipiṭaka / ਤਿਪਿਟਕ • Tipiṭaka / ਮਜ੍ਝਿਮਨਿਕਾਯ (ਅਟ੍ਠਕਥਾ) • Majjhimanikāya (aṭṭhakathā) |
੪. ਪੋਤਲਿਯਸੁਤ੍ਤવਣ੍ਣਨਾ
4. Potaliyasuttavaṇṇanā
੩੧. ਏવਂ ਮੇ ਸੁਤਨ੍ਤਿ ਪੋਤਲਿਯਸੁਤ੍ਤਂ। ਤਤ੍ਥ ਅਙ੍ਗੁਤ੍ਤਰਾਪੇਸੂਤਿ ਅਙ੍ਗਾਯੇવ ਸੋ ਜਨਪਦੋ, ਮਹਿਯਾ ਪਨਸ੍ਸ ਉਤ੍ਤਰੇਨ ਯਾ ਆਪੋ, ਤਾਸਂ ਅવਿਦੂਰਤ੍ਤਾ ਉਤ੍ਤਰਾਪੋਤਿਪਿ વੁਚ੍ਚਤਿ। ਕਤਰਮਹਿਯਾ ਉਤ੍ਤਰੇਨ ਯਾ ਆਪੋਤਿ, ਮਹਾਮਹਿਯਾ। ਤਤ੍ਥਾਯਂ ਆવਿਭਾવਕਥਾ – ਅਯਂ ਕਿਰ ਜਮ੍ਬੁਦੀਪੋ ਦਸਸਹਸ੍ਸਯੋਜਨਪਰਿਮਾਣੋ। ਤਤ੍ਥ ਚ ਚਤੁਸਹਸ੍ਸਯੋਜਨਪ੍ਪਮਾਣੋ ਪਦੇਸੋ ਉਦਕੇਨ ਅਜ੍ਝੋਤ੍ਥਟੋ ਸਮੁਦ੍ਦੋਤਿ ਸਙ੍ਖਂ ਗਤੋ । ਤਿਸਹਸ੍ਸਯੋਜਨਪ੍ਪਮਾਣੇ ਮਨੁਸ੍ਸਾ વਸਨ੍ਤਿ। ਤਿਸਹਸ੍ਸਯੋਜਨਪ੍ਪਮਾਣੇ ਹਿਮવਾ ਪਤਿਟ੍ਠਿਤੋ ਉਬ੍ਬੇਧੇਨ ਪਞ੍ਚਯੋਜਨਸਤਿਕੋ ਚਤੁਰਾਸੀਤਿਕੂਟਸਹਸ੍ਸਪਟਿਮਣ੍ਡਿਤੋ ਸਮਨ੍ਤਤੋ ਸਨ੍ਦਮਾਨਪਞ੍ਚਸਤਨਦੀવਿਚਿਤ੍ਤੋ, ਯਤ੍ਥ ਆਯਾਮવਿਤ੍ਥਾਰੇਨ ਚੇવ ਗਮ੍ਭੀਰਤਾਯ ਚ ਪਣ੍ਣਾਸਪਣ੍ਣਾਸਯੋਜਨਾ ਦਿਯਡ੍ਢਯੋਜਨਸਤਪਰਿਮਣ੍ਡਲਾ ਅਨੋਤਤ੍ਤਦਹੋ ਕਣ੍ਣਮੁਣ੍ਡਦਹੋ ਰਥਕਾਰਦਹੋ ਛਦ੍ਦਨ੍ਤਦਹੋ ਕੁਣਾਲਦਹੋ ਮਨ੍ਦਾਕਿਨੀਦਹੋ ਸੀਹਪਪਾਤਦਹੋਤਿ ਸਤ੍ਤ ਮਹਾਸਰਾ ਪਤਿਟ੍ਠਿਤਾ। ਤੇਸੁ ਅਨੋਤਤ੍ਤਦਹੋ ਸੁਦਸ੍ਸਨਕੂਟਂ ਚਿਤ੍ਰਕੂਟਂ ਕਾਲ਼ਕੂਟਂ ਗਨ੍ਧਮਾਦਨਕੂਟਂ ਕੇਲਾਸਕੂਟਨ੍ਤਿ ਇਮੇਹਿ ਪਞ੍ਚਹਿ ਪਬ੍ਬਤੇਹਿ ਪਰਿਕ੍ਖਿਤ੍ਤੋ।
31.Evaṃme sutanti potaliyasuttaṃ. Tattha aṅguttarāpesūti aṅgāyeva so janapado, mahiyā panassa uttarena yā āpo, tāsaṃ avidūrattā uttarāpotipi vuccati. Kataramahiyā uttarena yā āpoti, mahāmahiyā. Tatthāyaṃ āvibhāvakathā – ayaṃ kira jambudīpo dasasahassayojanaparimāṇo. Tattha ca catusahassayojanappamāṇo padeso udakena ajjhotthaṭo samuddoti saṅkhaṃ gato . Tisahassayojanappamāṇe manussā vasanti. Tisahassayojanappamāṇe himavā patiṭṭhito ubbedhena pañcayojanasatiko caturāsītikūṭasahassapaṭimaṇḍito samantato sandamānapañcasatanadīvicitto, yattha āyāmavitthārena ceva gambhīratāya ca paṇṇāsapaṇṇāsayojanā diyaḍḍhayojanasataparimaṇḍalā anotattadaho kaṇṇamuṇḍadaho rathakāradaho chaddantadaho kuṇāladaho mandākinīdaho sīhapapātadahoti satta mahāsarā patiṭṭhitā. Tesu anotattadaho sudassanakūṭaṃ citrakūṭaṃ kāḷakūṭaṃ gandhamādanakūṭaṃ kelāsakūṭanti imehi pañcahi pabbatehi parikkhitto.
ਤਤ੍ਥ ਸੁਦਸ੍ਸਨਕੂਟਂ ਸੋવਣ੍ਣਮਯਂ ਦ੍વਿਯੋਜਨਸਤੁਬ੍ਬੇਧਂ ਅਨ੍ਤੋવਙ੍ਕਂ ਕਾਕਮੁਖਸਣ੍ਠਾਨਂ ਤਮੇવ ਸਰਂ ਪਟਿਚ੍ਛਾਦੇਤ੍વਾ ਠਿਤਂ। ਚਿਤ੍ਰਕੂਟਂ ਸਬ੍ਬਰਤਨਮਯਂ। ਕਾਲ਼ਕੂਟਂ ਅਞ੍ਜਨਮਯਂ। ਗਨ੍ਧਮਾਦਨਕੂਟਂ ਸਾਨੁਮਯਂ ਅਬ੍ਭਨ੍ਤਰੇ ਮੁਗ੍ਗવਣ੍ਣਂ, ਮੂਲਗਨ੍ਧੋ ਸਾਰਗਨ੍ਧੋ ਫੇਗ੍ਗੁਗਨ੍ਧੋ ਤਚਗਨ੍ਧੋ ਪਪਟਿਕਗਨ੍ਧੋ ਰਸਗਨ੍ਧੋ ਪਤ੍ਤਗਨ੍ਧੋ ਪੁਪ੍ਫਗਨ੍ਧੋ ਫਲਗਨ੍ਧੋ ਗਨ੍ਧਗਨ੍ਧੋਤਿ ਇਮੇਹਿ ਦਸਹਿ ਗਨ੍ਧੇਹਿ ਉਸ੍ਸਨ੍ਨਂ ਨਾਨਪ੍ਪਕਾਰਓਸਧਸਞ੍ਛਨ੍ਨਂ, ਕਾਲ਼ਪਕ੍ਖਉਪੋਸਥਦਿવਸੇ ਆਦਿਤ੍ਤਮਿવ ਅਙ੍ਗਾਰਂ ਜਲਨ੍ਤਂ ਤਿਟ੍ਠਤਿ। ਕੇਲਾਸਕੂਟਂ ਰਜਤਮਯਂ। ਸਬ੍ਬਾਨਿ ਸੁਦਸ੍ਸਨੇਨ ਸਮਾਨੁਬ੍ਬੇਧਸਣ੍ਠਾਨਾਨਿ, ਤਮੇવ ਸਰਂ ਪਟਿਚ੍ਛਾਦੇਤ੍વਾ ਠਿਤਾਨਿ। ਤਾਨਿ ਸਬ੍ਬਾਨਿ ਦੇવਾਨੁਭਾવੇਨ ਨਾਗਾਨੁਭਾવੇਨ ਚ વਸ੍ਸਨ੍ਤਿ, ਨਦਿਯੋ ਚ ਤੇਸੁ ਸਨ੍ਦਨ੍ਤਿ। ਤਂ ਸਬ੍ਬਮ੍ਪਿ ਉਦਕਂ ਅਨੋਤਤ੍ਤਮੇવ ਪવਿਸਤਿ। ਚਨ੍ਦਿਮਸੂਰਿਯਾ ਦਕ੍ਖਿਣੇਨ વਾ ਉਤ੍ਤਰੇਨ વਾ ਗਚ੍ਛਨ੍ਤਾ ਪਬ੍ਬਤਨ੍ਤਰੇਨ ਤਤ੍ਥ ਓਭਾਸਂ ਕਰੋਨ੍ਤਿ, ਉਜੁਂ ਗਚ੍ਛਨ੍ਤਾ ਨ ਕਰੋਨ੍ਤਿ, ਤੇਨੇવਸ੍ਸ ਅਨੋਤਤ੍ਤਨ੍ਤਿ ਸਙ੍ਖਾ ਉਦਪਾਦਿ।
Tattha sudassanakūṭaṃ sovaṇṇamayaṃ dviyojanasatubbedhaṃ antovaṅkaṃ kākamukhasaṇṭhānaṃ tameva saraṃ paṭicchādetvā ṭhitaṃ. Citrakūṭaṃ sabbaratanamayaṃ. Kāḷakūṭaṃ añjanamayaṃ. Gandhamādanakūṭaṃ sānumayaṃ abbhantare muggavaṇṇaṃ, mūlagandho sāragandho pheggugandho tacagandho papaṭikagandho rasagandho pattagandho pupphagandho phalagandho gandhagandhoti imehi dasahi gandhehi ussannaṃ nānappakāraosadhasañchannaṃ, kāḷapakkhauposathadivase ādittamiva aṅgāraṃ jalantaṃ tiṭṭhati. Kelāsakūṭaṃ rajatamayaṃ. Sabbāni sudassanena samānubbedhasaṇṭhānāni, tameva saraṃ paṭicchādetvā ṭhitāni. Tāni sabbāni devānubhāvena nāgānubhāvena ca vassanti, nadiyo ca tesu sandanti. Taṃ sabbampi udakaṃ anotattameva pavisati. Candimasūriyā dakkhiṇena vā uttarena vā gacchantā pabbatantarena tattha obhāsaṃ karonti, ujuṃ gacchantā na karonti, tenevassa anotattanti saṅkhā udapādi.
ਤਤ੍ਥ ਮਨੋਹਰਸਿਲਾਤਲਾਨਿ ਨਿਮ੍ਮਚ੍ਛਕਚ੍ਛਪਾਨਿ ਫਲਿਕਸਦਿਸਨਿਮ੍ਮਲੁਦਕਾਨਿ ਨ੍ਹਾਨਤਿਤ੍ਥਾਨਿ ਸੁਪਟਿਯਤ੍ਤਾਨਿ ਹੋਨ੍ਤਿ, ਯੇਸੁ ਬੁਦ੍ਧਪਚ੍ਚੇਕਬੁਦ੍ਧਖੀਣਾਸવਾ ਚ ਇਦ੍ਧਿਮਨ੍ਤੋ ਚ ਇਸਯੋ ਨ੍ਹਾਯਨ੍ਤਿ, ਦੇવਯਕ੍ਖਾਦਯੋ ਉਯ੍ਯਾਨਕੀਲ਼ਕਂ ਕੀਲ਼ਨ੍ਤਿ।
Tattha manoharasilātalāni nimmacchakacchapāni phalikasadisanimmaludakāni nhānatitthāni supaṭiyattāni honti, yesu buddhapaccekabuddhakhīṇāsavā ca iddhimanto ca isayo nhāyanti, devayakkhādayo uyyānakīḷakaṃ kīḷanti.
ਤਸ੍ਸ ਚਤੂਸੁ ਪਸ੍ਸੇਸੁ ਸੀਹਮੁਖਂ ਹਤ੍ਥਿਮੁਖਂ ਅਸ੍ਸਮੁਖਂ ਉਸਭਮੁਖਨ੍ਤਿ ਚਤ੍ਤਾਰਿ ਮੁਖਾਨਿ ਹੋਨ੍ਤਿ, ਯੇਹਿ ਚਤਸ੍ਸੋ ਨਦਿਯੋ ਸਨ੍ਦਨ੍ਤਿ। ਸੀਹਮੁਖੇਨ ਨਿਕ੍ਖਨ੍ਤਨਦੀਤੀਰੇ ਸੀਹਾ ਬਹੁਤਰਾ ਹੋਨ੍ਤਿ। ਹਤ੍ਥਿਮੁਖਾਦੀਹਿ ਹਤ੍ਥਿਅਸ੍ਸਉਸਭਾ। ਪੁਰਤ੍ਥਿਮਦਿਸਤੋ ਨਿਕ੍ਖਨ੍ਤਨਦੀ ਅਨੋਤਤ੍ਤਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍વਾ ਇਤਰਾ ਤਿਸ੍ਸੋ ਨਦਿਯੋ ਅਨੁਪਗਮ੍ਮ ਪਾਚੀਨਹਿਮવਨ੍ਤੇਨੇવ ਅਮਨੁਸ੍ਸਪਥਂ ਗਨ੍ਤ੍વਾ ਮਹਾਸਮੁਦ੍ਦਂ ਪવਿਸਤਿ। ਪਚ੍ਛਿਮਦਿਸਤੋ ਚ ਉਤ੍ਤਰਦਿਸਤੋ ਚ ਨਿਕ੍ਖਨ੍ਤਨਦਿਯੋਪਿ ਤਥੇવ ਪਦਕ੍ਖਿਣਂ ਕਤ੍વਾ ਪਚ੍ਛਿਮਹਿਮવਨ੍ਤੇਨੇવ ਉਤ੍ਤਰਹਿਮવਨ੍ਤੇਨੇવ ਚ ਅਮਨੁਸ੍ਸਪਥਂ ਗਨ੍ਤ੍વਾ ਮਹਾਸਮੁਦ੍ਦਂ ਪવਿਸਨ੍ਤਿ। ਦਕ੍ਖਿਣਦਿਸਤੋ ਨਿਕ੍ਖਨ੍ਤਨਦੀ ਪਨ ਤਂ ਤਿਕ੍ਖਤ੍ਤੁਂ ਪਦਕ੍ਖਿਣਂ ਕਤ੍વਾ ਦਕ੍ਖਿਣੇਨ ਉਜੁਕਂ ਪਾਸਾਣਪਿਟ੍ਠੇਨੇવ ਸਟ੍ਠਿਯੋਜਨਾਨਿ ਗਨ੍ਤ੍વਾ ਪਬ੍ਬਤਂ ਪਹਰਿਤ੍વਾ વੁਟ੍ਠਾਯ ਪਰਿਕ੍ਖੇਪੇਨ ਤਿਗਾવੁਤਪ੍ਪਮਾਣਾ ਉਦਕਧਾਰਾ ਚ ਹੁਤ੍વਾ ਆਕਾਸੇਨ ਸਟ੍ਠਿਯੋਜਨਾਨਿ ਗਨ੍ਤ੍વਾ ਤਿਯਗ੍ਗਲ਼ੇ ਨਾਮ ਪਾਸਾਣੇ ਪਤਿਤਾ, ਪਾਸਾਣੋ ਉਦਕਧਾਰਾવੇਗੇਨ ਭਿਨ੍ਨੋ। ਤਤ੍ਥ ਪਞ੍ਞਾਸਯੋਜਨਪ੍ਪਮਾਣਾ ਤਿਯਗ੍ਗਲ਼ਾ ਨਾਮ ਪੋਕ੍ਖਰਣੀ ਜਾਤਾ, ਪੋਕ੍ਖਰਣਿਯਾ ਕੂਲਂ ਭਿਨ੍ਦਿਤ੍વਾ ਪਾਸਾਣਂ ਪવਿਸਿਤ੍વਾ ਸਟ੍ਠਿਯੋਜਨਾਨਿ ਗਤਾ। ਤਤੋ ਘਨਪਥવਿਂ ਭਿਨ੍ਦਿਤ੍વਾ ਉਮਙ੍ਗੇਨ ਸਟ੍ਠਿਯੋਜਨਾਨਿ ਗਨ੍ਤ੍વਾ વਿਞ੍ਝੁਂ ਨਾਮ ਤਿਰਚ੍ਛਾਨਪਬ੍ਬਤਂ ਪਹਰਿਤ੍વਾ ਹਤ੍ਥਤਲੇ ਪਞ੍ਚਙ੍ਗੁਲਿਸਦਿਸਾ ਪਞ੍ਚਧਾਰਾ ਹੁਤ੍વਾ ਪવਤ੍ਤਨ੍ਤਿ। ਸਾ ਤਿਕ੍ਖਤ੍ਤੁਂ ਅਨੋਤਤ੍ਤਂ ਪਦਕ੍ਖਿਣਂ ਕਤ੍વਾ ਗਤਟ੍ਠਾਨੇ ਆવਟ੍ਟਗਙ੍ਗਾਤਿ વੁਚ੍ਚਤਿ। ਉਜੁਕਂ ਪਾਸਾਣਪਿਟ੍ਠੇਨ ਸਟ੍ਠਿਯੋਜਨਾਨਿ ਗਤਟ੍ਠਾਨੇ ਕਣ੍ਹਗਙ੍ਗਾਤਿ, ਆਕਾਸੇਨ ਸਟ੍ਠਿਯੋਜਨਾਨਿ ਗਤਟ੍ਠਾਨੇ ਆਕਾਸਗਙ੍ਗਾਤਿ, ਤਿਯਗ੍ਗਲ਼ਪਾਸਾਣੇ ਪਞ੍ਞਾਸਯੋਜਨੋਕਾਸੇ ਠਿਤਾ ਤਿਯਗ੍ਗਲ਼ਪੋਕ੍ਖਰਣੀਤਿ, ਕੂਲਂ ਭਿਨ੍ਦਿਤ੍વਾ ਪਾਸਾਣਂ ਪવਿਸਿਤ੍વਾ ਸਟ੍ਠਿਯੋਜਨਾਨਿ ਗਤਟ੍ਠਾਨੇ ਬਹਲਗਙ੍ਗਾਤਿ, ਉਮਙ੍ਗੇਨ ਸਟ੍ਠਿਯੋਜਨਾਨਿ ਗਤਟ੍ਠਾਨੇ ਉਮਙ੍ਗਗਙ੍ਗਾਤਿ વੁਚ੍ਚਤਿ। વਿਞ੍ਝੁਂ ਨਾਮ ਤਿਰਚ੍ਛਾਨਪਬ੍ਬਤਂ ਪਹਰਿਤ੍વਾ ਪਞ੍ਚਧਾਰਾ ਹੁਤ੍વਾ ਪવਤ੍ਤਟ੍ਠਾਨੇ ਪਨ ਗਙ੍ਗਾ ਯਮੁਨਾ ਅਚਿਰવਤੀ ਸਰਭੂ ਮਹੀਤਿ ਪਞ੍ਚਧਾ ਸਙ੍ਖਂ ਗਤਾ। ਏવਮੇਤਾ ਪਞ੍ਚ ਮਹਾਨਦਿਯੋ ਹਿਮવਨ੍ਤਤੋ ਪਭવਨ੍ਤਿ। ਤਾਸੁ ਯਾ ਅਯਂ ਪਞ੍ਚਮੀ ਮਹੀ ਨਾਮ, ਸਾ ਇਧ ਮਹਾਮਹੀਤਿ ਅਧਿਪ੍ਪੇਤਾ। ਤਸ੍ਸਾ ਉਤ੍ਤਰੇਨ ਯਾ ਆਪੋ, ਤਾਸਂ ਅવਿਦੂਰਤ੍ਤਾ ਸੋ ਜਨਪਦੋ ਅਙ੍ਗੁਤ੍ਤਰਾਪੋਤਿ વੇਦਿਤਬ੍ਬੋ। ਤਸ੍ਮਿਂ ਅਙ੍ਗੁਤ੍ਤਰਾਪੇਸੁ ਜਨਪਦੇ।
Tassa catūsu passesu sīhamukhaṃ hatthimukhaṃ assamukhaṃ usabhamukhanti cattāri mukhāni honti, yehi catasso nadiyo sandanti. Sīhamukhena nikkhantanadītīre sīhā bahutarā honti. Hatthimukhādīhi hatthiassausabhā. Puratthimadisato nikkhantanadī anotattaṃ tikkhattuṃ padakkhiṇaṃ katvā itarā tisso nadiyo anupagamma pācīnahimavanteneva amanussapathaṃ gantvā mahāsamuddaṃ pavisati. Pacchimadisato ca uttaradisato ca nikkhantanadiyopi tatheva padakkhiṇaṃ katvā pacchimahimavanteneva uttarahimavanteneva ca amanussapathaṃ gantvā mahāsamuddaṃ pavisanti. Dakkhiṇadisato nikkhantanadī pana taṃ tikkhattuṃ padakkhiṇaṃ katvā dakkhiṇena ujukaṃ pāsāṇapiṭṭheneva saṭṭhiyojanāni gantvā pabbataṃ paharitvā vuṭṭhāya parikkhepena tigāvutappamāṇā udakadhārā ca hutvā ākāsena saṭṭhiyojanāni gantvā tiyaggaḷe nāma pāsāṇe patitā, pāsāṇo udakadhārāvegena bhinno. Tattha paññāsayojanappamāṇā tiyaggaḷā nāma pokkharaṇī jātā, pokkharaṇiyā kūlaṃ bhinditvā pāsāṇaṃ pavisitvā saṭṭhiyojanāni gatā. Tato ghanapathaviṃ bhinditvā umaṅgena saṭṭhiyojanāni gantvā viñjhuṃ nāma tiracchānapabbataṃ paharitvā hatthatale pañcaṅgulisadisā pañcadhārā hutvā pavattanti. Sā tikkhattuṃ anotattaṃ padakkhiṇaṃ katvā gataṭṭhāne āvaṭṭagaṅgāti vuccati. Ujukaṃ pāsāṇapiṭṭhena saṭṭhiyojanāni gataṭṭhāne kaṇhagaṅgāti, ākāsena saṭṭhiyojanāni gataṭṭhāne ākāsagaṅgāti, tiyaggaḷapāsāṇe paññāsayojanokāse ṭhitā tiyaggaḷapokkharaṇīti, kūlaṃ bhinditvā pāsāṇaṃ pavisitvā saṭṭhiyojanāni gataṭṭhāne bahalagaṅgāti, umaṅgena saṭṭhiyojanāni gataṭṭhāne umaṅgagaṅgāti vuccati. Viñjhuṃ nāma tiracchānapabbataṃ paharitvā pañcadhārā hutvā pavattaṭṭhāne pana gaṅgā yamunā aciravatī sarabhū mahīti pañcadhā saṅkhaṃ gatā. Evametā pañca mahānadiyo himavantato pabhavanti. Tāsu yā ayaṃ pañcamī mahī nāma, sā idha mahāmahīti adhippetā. Tassā uttarena yā āpo, tāsaṃ avidūrattā so janapado aṅguttarāpoti veditabbo. Tasmiṃ aṅguttarāpesu janapade.
ਆਪਣਂ ਨਾਮਾਤਿ ਤਸ੍ਮਿਂ ਕਿਰ ਨਿਗਮੇ વੀਸਤਿ ਆਪਣਮੁਖਸਹਸ੍ਸਾਨਿ વਿਭਤ੍ਤਾਨਿ ਅਹੇਸੁਂ। ਇਤਿ ਸੋ ਆਪਣਾਨਂ ਉਸ੍ਸਨ੍ਨਤ੍ਤਾ ਆਪਣਨ੍ਤ੍વੇવ ਸਙ੍ਖਂ ਗਤੋ। ਤਸ੍ਸ ਚ ਨਿਗਮਸ੍ਸ ਅવਿਦੂਰੇ ਨਦੀਤੀਰੇ ਘਨਚ੍ਛਾਯੋ ਰਮਣੀਯੋ ਭੂਮਿਭਾਗੋ ਮਹਾવਨਸਣ੍ਡੋ, ਤਸ੍ਮਿਂ ਭਗવਾ વਿਹਰਤਿ। ਤੇਨੇવੇਤ੍ਥ વਸਨਟ੍ਠਾਨਂ ਨ ਨਿਯਾਮਿਤਨ੍ਤਿ વੇਦਿਤਬ੍ਬਂ। ਯੇਨਞ੍ਞਤਰੋ વਨਸਣ੍ਡੋ ਤੇਨੁਪਸਙ੍ਕਮੀਤਿ ਭਿਕ੍ਖੁਸਙ੍ਘਂ વਸਨਟ੍ਠਾਨਂ ਪੇਸੇਤ੍વਾ ਏਕਕੋવ ਉਪਸਙ੍ਕਮਿ ਪੋਤਲਿਯਂ ਗਹਪਤਿਂ ਸਨ੍ਧਾਯ। ਪੋਤਲਿਯੋਪਿ ਖੋ ਗਹਪਤੀਤਿ ਪੋਤਲਿਯੋਤਿ ਏવਂਨਾਮਕੋ ਗਹਪਤਿ। ਸਮ੍ਪਨ੍ਨਨਿવਾਸਨਪਾવੁਰਣੋਤਿ ਪਰਿਪੁਣ੍ਣਨਿવਾਸਨਪਾવੁਰਣੋ , ਏਕਂ ਦੀਘਦਸਂ ਸਾਟਕਂ ਨਿવਤ੍ਥੋ ਏਕਂ ਪਾਰੁਤੋਤਿ ਅਤ੍ਥੋ। ਛਤ੍ਤੁਪਾਹਨਾਹੀਤਿ ਛਤ੍ਤਂ ਗਹੇਤ੍વਾ ਉਪਾਹਨਾ ਆਰੁਯ੍ਹਾਤਿ ਅਤ੍ਥੋ। ਆਸਨਾਨੀਤਿ ਪਲ੍ਲਙ੍ਕਪੀਠਪਲਾਲਪੀਠਕਾਦੀਨਿ। ਅਨ੍ਤਮਸੋ ਸਾਖਾਭਙ੍ਗਮ੍ਪਿ ਹਿ ਆਸਨਨ੍ਤੇવ વੁਚ੍ਚਤਿ। ਗਹਪਤਿવਾਦੇਨਾਤਿ ਗਹਪਤੀਤਿ ਇਮਿਨਾ વਚਨੇਨ। ਸਮੁਦਾਚਰਤੀਤਿ વੋਹਰਤਿ।
Āpaṇaṃnāmāti tasmiṃ kira nigame vīsati āpaṇamukhasahassāni vibhattāni ahesuṃ. Iti so āpaṇānaṃ ussannattā āpaṇantveva saṅkhaṃ gato. Tassa ca nigamassa avidūre nadītīre ghanacchāyo ramaṇīyo bhūmibhāgo mahāvanasaṇḍo, tasmiṃ bhagavā viharati. Tenevettha vasanaṭṭhānaṃ na niyāmitanti veditabbaṃ. Yenaññataro vanasaṇḍo tenupasaṅkamīti bhikkhusaṅghaṃ vasanaṭṭhānaṃ pesetvā ekakova upasaṅkami potaliyaṃ gahapatiṃ sandhāya. Potaliyopi kho gahapatīti potaliyoti evaṃnāmako gahapati. Sampannanivāsanapāvuraṇoti paripuṇṇanivāsanapāvuraṇo , ekaṃ dīghadasaṃ sāṭakaṃ nivattho ekaṃ pārutoti attho. Chattupāhanāhīti chattaṃ gahetvā upāhanā āruyhāti attho. Āsanānīti pallaṅkapīṭhapalālapīṭhakādīni. Antamaso sākhābhaṅgampi hi āsananteva vuccati. Gahapativādenāti gahapatīti iminā vacanena. Samudācaratīti voharati.
ਭਗવਨ੍ਤਂ ਏਤਦવੋਚਾਤਿ ਤਤਿਯਂ ਗਹਪਤੀਤਿ વਚਨਂ ਅਧਿવਾਸੇਤੁਂ ਅਸਕ੍ਕੋਨ੍ਤੋ ਭਗવਨ੍ਤਮੇਤਂ ‘‘ਤਯਿਦਂ, ਭੋ, ਗੋਤਮਾ’’ਤਿਆਦਿવਚਨਂ ਅવੋਚ। ਤਤ੍ਥ ਨਚ੍ਛਨ੍ਨਨ੍ਤਿ ਨ ਅਨੁਚ੍ਛવਿਕਂ। ਨਪ੍ਪਤਿਰੂਪਨ੍ਤਿ ਨ ਸਾਰੁਪ੍ਪਂ। ਆਕਾਰਾਤਿਆਦੀਨਿ ਸਬ੍ਬਾਨੇવ ਕਾਰਣવੇવਚਨਾਨਿ। ਦੀਘਦਸવਤ੍ਥਧਾਰਣ-ਕੇਸਮਸ੍ਸੁਨਖਠਪਨਾਦੀਨਿ ਹਿ ਸਬ੍ਬਾਨੇવ ਗਿਹਿਬ੍ਯਞ੍ਜਨਾਨਿ ਤਸ੍ਸ ਗਿਹਿਭਾવਂ ਪਾਕਟਂ ਕਰੋਨ੍ਤੀਤਿ ਆਕਾਰਾ, ਗਿਹਿਸਣ੍ਠਾਨੇਨ ਸਣ੍ਠਿਤਤ੍ਤਾ ਲਿਙ੍ਗਾ, ਗਿਹਿਭਾવਸ੍ਸ ਸਞ੍ਜਾਨਨਨਿਮਿਤ੍ਤਤਾਯ ਨਿਮਿਤ੍ਤਾਤਿ વੁਤ੍ਤਾ। ਯਥਾ ਤਂ ਗਹਪਤਿਸ੍ਸਾਤਿ ਯਥਾ ਗਹਪਤਿਸ੍ਸ ਆਕਾਰਲਿਙ੍ਗਨਿਮਿਤ੍ਤਾ ਭવੇਯ੍ਯੁਂ, ਤਥੇવ ਤੁਯ੍ਹਂ। ਤੇਨ ਤਾਹਂ ਏવਂ ਸਮੁਦਾਚਰਾਮੀਤਿ ਦਸ੍ਸੇਤਿ। ਅਥ ਸੋ ਯੇਨ ਕਾਰਣੇਨ ਗਹਪਤਿવਾਦਂ ਨਾਧਿવਾਸੇਤਿ, ਤਂ ਪਕਾਸੇਨ੍ਤੋ ‘‘ਤਥਾ ਹਿ ਪਨ ਮੇ’’ਤਿਆਦਿਮਾਹ।
Bhagavantaṃ etadavocāti tatiyaṃ gahapatīti vacanaṃ adhivāsetuṃ asakkonto bhagavantametaṃ ‘‘tayidaṃ, bho, gotamā’’tiādivacanaṃ avoca. Tattha nacchannanti na anucchavikaṃ. Nappatirūpanti na sāruppaṃ. Ākārātiādīni sabbāneva kāraṇavevacanāni. Dīghadasavatthadhāraṇa-kesamassunakhaṭhapanādīni hi sabbāneva gihibyañjanāni tassa gihibhāvaṃ pākaṭaṃ karontīti ākārā, gihisaṇṭhānena saṇṭhitattā liṅgā, gihibhāvassa sañjānananimittatāya nimittāti vuttā. Yathā taṃ gahapatissāti yathā gahapatissa ākāraliṅganimittā bhaveyyuṃ, tatheva tuyhaṃ. Tena tāhaṃ evaṃ samudācarāmīti dasseti. Atha so yena kāraṇena gahapativādaṃ nādhivāseti, taṃ pakāsento ‘‘tathā hi pana me’’tiādimāha.
ਨਿਯ੍ਯਾਤਨ੍ਤਿ ਨਿਯ੍ਯਾਤਿਤਂ। ਅਨੋવਾਦੀ ਅਨੁਪવਾਦੀਤਿ ‘‘ਤਾਤਾ, ਕਸਥ, વਪਥ, વਣਿਪ੍ਪਥਂ ਪਯੋਜੇਥਾ’’ਤਿਆਦਿਨਾ ਹਿ ਨਯੇਨ ਓવਦਨ੍ਤੋ ਓવਾਦੀ ਨਾਮ ਹੋਤਿ। ‘‘ਤੁਮ੍ਹੇ ਨ ਕਸਥ, ਨ વਪਥ, ਨ વਣਿਪ੍ਪਥਂ ਪਯੋਜੇਥ, ਕਥਂ ਜੀવਿਸ੍ਸਥ, ਪੁਤ੍ਤਦਾਰਂ વਾ ਭਰਿਸ੍ਸਥਾ’’ਤਿਆਦਿਨਾ ਨਯੇਨ ਪਨ ਉਪવਦਨ੍ਤੋ ਉਪવਾਦੀ ਨਾਮ ਹੋਤਿ। ਅਹਂ ਪਨ ਉਭਯਮ੍ਪਿ ਤਂ ਨ ਕਰੋਮਿ। ਤੇਨਾਹਂ ਤਤ੍ਥ ਅਨੋવਾਦੀ ਅਨੁਪવਾਦੀਤਿ ਦਸ੍ਸੇਤਿ। ਘਾਸਚ੍ਛਾਦਨਪਰਮੋ વਿਹਰਾਮੀਤਿ ਘਾਸਮਤ੍ਤਞ੍ਚੇવ ਅਚ੍ਛਾਦਨਮਤ੍ਤਞ੍ਚ ਪਰਮਂ ਕਤ੍વਾ વਿਹਰਾਮਿ, ਤਤੋ ਪਰਂ ਨਤ੍ਥਿ, ਨ ਚ ਪਤ੍ਥੇਮੀਤਿ ਦੀਪੇਤਿ।
Niyyātanti niyyātitaṃ. Anovādī anupavādīti ‘‘tātā, kasatha, vapatha, vaṇippathaṃ payojethā’’tiādinā hi nayena ovadanto ovādī nāma hoti. ‘‘Tumhe na kasatha, na vapatha, na vaṇippathaṃ payojetha, kathaṃ jīvissatha, puttadāraṃ vā bharissathā’’tiādinā nayena pana upavadanto upavādī nāma hoti. Ahaṃ pana ubhayampi taṃ na karomi. Tenāhaṃ tattha anovādī anupavādīti dasseti. Ghāsacchādanaparamoviharāmīti ghāsamattañceva acchādanamattañca paramaṃ katvā viharāmi, tato paraṃ natthi, na ca patthemīti dīpeti.
੩੨. ਗਿਦ੍ਧਿਲੋਭੋ ਪਹਾਤਬ੍ਬੋਤਿ ਗੇਧਭੂਤੋ ਲੋਭੋ ਪਹਾਤਬ੍ਬੋ। ਅਨਿਨ੍ਦਾਰੋਸਨ੍ਤਿ ਅਨਿਨ੍ਦਾਭੂਤਂ ਅਘਟ੍ਟਨਂ। ਨਿਨ੍ਦਾਰੋਸੋਤਿ ਨਿਨ੍ਦਾਘਟ੍ਟਨਾ। વੋਹਾਰਸਮੁਚ੍ਛੇਦਾਯਾਤਿ ਏਤ੍ਥ વੋਹਾਰੋਤਿ ਬ੍ਯવਹਾਰવੋਹਾਰੋਪਿ ਪਣ੍ਣਤ੍ਤਿਪਿ વਚਨਮ੍ਪਿ ਚੇਤਨਾਪਿ। ਤਤ੍ਥ –
32.Giddhilobhopahātabboti gedhabhūto lobho pahātabbo. Anindārosanti anindābhūtaṃ aghaṭṭanaṃ. Nindārosoti nindāghaṭṭanā. Vohārasamucchedāyāti ettha vohāroti byavahāravohāropi paṇṇattipi vacanampi cetanāpi. Tattha –
‘‘ਯੋ ਹਿ ਕੋਚਿ ਮਨੁਸ੍ਸੇਸੁ, વੋਹਾਰਂ ਉਪਜੀવਤਿ।
‘‘Yo hi koci manussesu, vohāraṃ upajīvati;
ਏવਂ વਾਸੇਟ੍ਠ ਜਾਨਾਹਿ, વਾਣਿਜੋ ਸੋ ਨ ਬ੍ਰਾਹ੍ਮਣੋ’’ਤਿ॥ (ਮ॰ ਨਿ॰ ੨.੪੫੭) –
Evaṃ vāseṭṭha jānāhi, vāṇijo so na brāhmaṇo’’ti. (ma. ni. 2.457) –
ਅਯਂ ਬ੍ਯવਹਾਰવੋਹਾਰੋ ਨਾਮ। ‘‘ਸਙ੍ਖਾ ਸਮਞ੍ਞਾ ਪਞ੍ਞਤ੍ਤਿ વੋਹਾਰੋ’’ਤਿ (ਧ॰ ਸ॰ ੧੩੧੩-੧੩੧੫) ਅਯਂ ਪਣ੍ਣਤ੍ਤਿવੋਹਾਰੋ ਨਾਮ। ‘‘ਤਥਾ ਤਥਾ વੋਹਰਤਿ ਅਪਰਾਮਸ’’ਨ੍ਤਿ (ਮ॰ ਨਿ॰ ੩.੩੩੨) ਅਯਂ વਚਨવੋਹਾਰੋ ਨਾਮ। ‘‘ਅਟ੍ਠ ਅਰਿਯવੋਹਾਰਾ ਅਟ੍ਠ ਅਨਰਿਯવੋਹਰਾ’’ਤਿ (ਅ॰ ਨਿ॰ ੮.੬੭) ਅਯਂ ਚੇਤਨਾવੋਹਾਰੋ ਨਾਮ, ਅਯਮਿਧਾਧਿਪ੍ਪੇਤੋ। ਯਸ੍ਮਾ વਾ ਪਬ੍ਬਜਿਤਕਾਲਤੋ ਪਟ੍ਠਾਯ ਗਿਹੀਤਿ ਚੇਤਨਾ ਨਤ੍ਥਿ, ਸਮਣੋਤਿ ਚੇਤਨਾ ਹੋਤਿ। ਗਿਹੀਤਿ વਚਨਂ ਨਤ੍ਥਿ, ਸਮਣੋਤਿ વਚਨਂ ਹੋਤਿ। ਗਿਹੀਤਿ ਪਣ੍ਣਤ੍ਤਿ ਨਤ੍ਥਿ, ਸਮਣੋਤਿ ਪਣ੍ਣਤ੍ਤਿ ਹੋਤਿ। ਗਿਹੀਤਿ ਬ੍ਯવਹਾਰੋ ਨਤ੍ਥਿ, ਸਮਣੋਤਿ વਾ ਪਬ੍ਬਜਿਤੋਤਿ વਾ ਬ੍ਯવਹਾਰੋ ਹੋਤਿ। ਤਸ੍ਮਾ ਸਬ੍ਬੇਪੇਤੇ ਲਬ੍ਭਨ੍ਤਿ।
Ayaṃ byavahāravohāro nāma. ‘‘Saṅkhā samaññā paññatti vohāro’’ti (dha. sa. 1313-1315) ayaṃ paṇṇattivohāro nāma. ‘‘Tathā tathā voharati aparāmasa’’nti (ma. ni. 3.332) ayaṃ vacanavohāro nāma. ‘‘Aṭṭha ariyavohārā aṭṭha anariyavoharā’’ti (a. ni. 8.67) ayaṃ cetanāvohāro nāma, ayamidhādhippeto. Yasmā vā pabbajitakālato paṭṭhāya gihīti cetanā natthi, samaṇoti cetanā hoti. Gihīti vacanaṃ natthi, samaṇoti vacanaṃ hoti. Gihīti paṇṇatti natthi, samaṇoti paṇṇatti hoti. Gihīti byavahāro natthi, samaṇoti vā pabbajitoti vā byavahāro hoti. Tasmā sabbepete labbhanti.
੩੩. ਯੇਸਂ ਖੋ ਅਹਂ ਸਂਯੋਜਨਾਨਂ ਹੇਤੁ ਪਾਣਾਤਿਪਾਤੀਤਿ ਏਤ੍ਥ ਪਾਣਾਤਿਪਾਤੋવ ਸਂਯੋਜਨਂ। ਪਾਣਾਤਿਪਾਤਸ੍ਸੇવ ਹਿ ਹੇਤੁ ਪਾਣਾਤਿਪਾਤਪਚ੍ਚਯਾ ਪਾਣਾਤਿਪਾਤੀ ਨਾਮ ਹੋਤਿ। ਪਾਣਾਤਿਪਾਤਾਨਂ ਪਨ ਬਹੁਤਾਯ ‘‘ਯੇਸਂ ਖੋ ਅਹ’’ਨ੍ਤਿ વੁਤ੍ਤਂ। ਤੇਸਾਹਂ ਸਂਯੋਜਨਾਨਨ੍ਤਿ ਤੇਸਂ ਅਹਂ ਪਾਣਾਤਿਪਾਤਬਨ੍ਧਨਾਨਂ। ਪਹਾਨਾਯ ਸਮੁਚ੍ਛੇਦਾਯ ਪਟਿਪਨ੍ਨੋਤਿ ਇਮਿਨਾ ਅਪਾਣਾਤਿਪਾਤਸਙ੍ਖਾਤੇਨ ਕਾਯਿਕਸੀਲਸਂવਰੇਨ ਪਹਾਨਤ੍ਥਾਯ ਸਮੁਚ੍ਛੇਦਨਤ੍ਥਾਯ ਪਟਿਪਨ੍ਨੋ। ਅਤ੍ਤਾਪਿ ਮਂ ਉਪવਦੇਯ੍ਯਾਤਿ ਕੁਨ੍ਥਕਿਪਿਲ੍ਲਿਕਮ੍ਪਿ ਨਾਮ ਜੀવਿਤਾ ਅવੋਰੋਪਨਕਸਾਸਨੇ ਪਬ੍ਬਜਿਤ੍વਾ ਪਾਣਾਤਿਪਾਤਮਤ੍ਤਤੋਪਿ ਓਰਮਿਤੁਂ ਨ ਸਕ੍ਕੋਮਿ, ਕਿਂ ਮਯ੍ਹਂ ਪਬ੍ਬਜ੍ਜਾਯਾਤਿ ਏવਂ ਅਤ੍ਤਾਪਿ ਮਂ ਉਪવਦੇਯ੍ਯ। ਅਨੁવਿਚ੍ਚਾਪਿ ਮਂ વਿਞ੍ਞੂ ਗਰਹੇਯ੍ਯੁਨ੍ਤਿ ਏવਰੂਪੇ ਨਾਮ ਸਾਸਨੇ ਪਬ੍ਬਜਿਤ੍વਾ ਪਾਣਾਤਿਪਾਤਮਤ੍ਤਤੋਪਿ ਓਰਮਿਤੁਂ ਨ ਸਕ੍ਕੋਤਿ, ਕਿਂ ਏਤਸ੍ਸ ਪਬ੍ਬਜ੍ਜਾਯਾਤਿ ਏવਂ ਅਨੁવਿਚ੍ਚ ਤੁਲਯਿਤ੍વਾ ਪਰਿਯੋਗਾਹੇਤ੍વਾ ਅਞ੍ਞੇਪਿ વਿਞ੍ਞੂ ਪਣ੍ਡਿਤਾ ਗਰਹੇਯ੍ਯੁਂ। ਏਤਦੇવ ਖੋ ਪਨ ਸਂਯੋਜਨਮੇਤਂ ਨੀવਰਣਨ੍ਤਿ ਦਸਸੁ ਸਂਯੋਜਨੇਸੁ ਪਞ੍ਚਸੁ ਚ ਨੀવਰਣੇਸੁ ਅਪਰਿਯਾਪਨ੍ਨਮ੍ਪਿ ‘‘ਅਟ੍ਠ ਨੀવਰਣਾ’’ਤਿ ਦੇਸਨਾવਸੇਨੇਤਂ વੁਤ੍ਤਂ। વਟ੍ਟਬਨ੍ਧਨਟ੍ਠੇਨ ਹਿ ਹਿਤਪਟਿਚ੍ਛਾਦਨਟ੍ਠੇਨ ਚ ਸਂਯੋਜਨਨ੍ਤਿਪਿ ਨੀવਰਣਨ੍ਤਿਪਿ વੁਤ੍ਤਂ। ਆਸવਾਤਿ ਪਾਣਾਤਿਪਾਤਕਾਰਣਾ ਏਕੋ ਅવਿਜ੍ਜਾਸવੋ ਉਪ੍ਪਜ੍ਜਤਿ। વਿਘਾਤਪਰਿਲ਼ਾਹਾਤਿ વਿਘਾਤਾ ਚ ਪਰਿਲ਼ਾਹਾ ਚ। ਤਤ੍ਥ વਿਘਾਤਗ੍ਗਹਣੇਨ ਕਿਲੇਸਦੁਕ੍ਖਞ੍ਚ વਿਪਾਕਦੁਕ੍ਖਞ੍ਚ ਗਹਿਤਂ, ਪਰਿਲ਼ਾਹਗ੍ਗਹਣੇਨਪਿ ਕਿਲੇਸਪਰਿਲ਼ਾਹੋ ਚ વਿਪਾਕਪਰਿਲ਼ਾਹੋ ਚ ਗਹਿਤੋ। ਇਮਿਨਾ ਉਪਾਯੇਨ ਸਬ੍ਬਤ੍ਥ ਅਤ੍ਥੋ વੇਦਿਤਬ੍ਬੋ।
33.Yesaṃ kho ahaṃ saṃyojanānaṃ hetu pāṇātipātīti ettha pāṇātipātova saṃyojanaṃ. Pāṇātipātasseva hi hetu pāṇātipātapaccayā pāṇātipātī nāma hoti. Pāṇātipātānaṃ pana bahutāya ‘‘yesaṃ kho aha’’nti vuttaṃ. Tesāhaṃsaṃyojanānanti tesaṃ ahaṃ pāṇātipātabandhanānaṃ. Pahānāya samucchedāya paṭipannoti iminā apāṇātipātasaṅkhātena kāyikasīlasaṃvarena pahānatthāya samucchedanatthāya paṭipanno. Attāpi maṃ upavadeyyāti kunthakipillikampi nāma jīvitā avoropanakasāsane pabbajitvā pāṇātipātamattatopi oramituṃ na sakkomi, kiṃ mayhaṃ pabbajjāyāti evaṃ attāpi maṃ upavadeyya. Anuviccāpi maṃ viññū garaheyyunti evarūpe nāma sāsane pabbajitvā pāṇātipātamattatopi oramituṃ na sakkoti, kiṃ etassa pabbajjāyāti evaṃ anuvicca tulayitvā pariyogāhetvā aññepi viññū paṇḍitā garaheyyuṃ. Etadeva kho pana saṃyojanametaṃ nīvaraṇanti dasasu saṃyojanesu pañcasu ca nīvaraṇesu apariyāpannampi ‘‘aṭṭha nīvaraṇā’’ti desanāvasenetaṃ vuttaṃ. Vaṭṭabandhanaṭṭhena hi hitapaṭicchādanaṭṭhena ca saṃyojanantipi nīvaraṇantipi vuttaṃ. Āsavāti pāṇātipātakāraṇā eko avijjāsavo uppajjati. Vighātapariḷāhāti vighātā ca pariḷāhā ca. Tattha vighātaggahaṇena kilesadukkhañca vipākadukkhañca gahitaṃ, pariḷāhaggahaṇenapi kilesapariḷāho ca vipākapariḷāho ca gahito. Iminā upāyena sabbattha attho veditabbo.
੩੪-੪੦. ਅਯਂ ਪਨ વਿਸੇਸੋ – ਤੇਸਾਹਂ ਸਂਯੋਜਨਾਨਂ ਪਹਾਨਾਯਾਤਿ ਇਮਸ੍ਮਿਂ ਪਦੇ ਇਮਿਨਾ ਦਿਨ੍ਨਾਦਾਨਸਙ੍ਖਾਤੇਨ ਕਾਯਿਕਸੀਲਸਂવਰੇਨ, ਸਚ੍ਚવਾਚਾਸਙ੍ਖਾਤੇਨ વਾਚਸਿਕਸੀਲਸਂવਰੇਨ, ਅਪਿਸੁਣਾવਾਚਾਸਙ੍ਖਾਤੇਨ વਾਚਸਿਕਸੀਲਸਂવਰੇਨ, ਅਗਿਦ੍ਧਿਲੋਭਸਙ੍ਖਾਤੇਨ ਮਾਨਸਿਕਸੀਲਸਂવਰੇਨ, ਅਨਿਨ੍ਦਾਰੋਸਸਙ੍ਖਾਤੇਨ ਕਾਯਿਕવਾਚਸਿਕਸੀਲਸਂવਰੇਨ , ਅਕੋਧੁਪਾਯਾਸਸਙ੍ਖਾਤੇਨ ਮਾਨਸਿਕਸੀਲਸਂવਰੇਨ, ਅਨਤਿਮਾਨਸਙ੍ਖਾਤੇਨ ਮਾਨਸਿਕਸੀਲਸਂવਰੇਨ ਪਹਾਨਤ੍ਥਾਯ ਸਮੁਚ੍ਛੇਦਨਤ੍ਥਾਯ ਪਟਿਪਨ੍ਨੋਤਿ ਏવਂ ਸਬ੍ਬવਾਰੇਸੁ ਯੋਜਨਾ ਕਾਤਬ੍ਬਾ।
34-40. Ayaṃ pana viseso – tesāhaṃ saṃyojanānaṃ pahānāyāti imasmiṃ pade iminā dinnādānasaṅkhātena kāyikasīlasaṃvarena, saccavācāsaṅkhātena vācasikasīlasaṃvarena, apisuṇāvācāsaṅkhātena vācasikasīlasaṃvarena, agiddhilobhasaṅkhātena mānasikasīlasaṃvarena, anindārosasaṅkhātena kāyikavācasikasīlasaṃvarena , akodhupāyāsasaṅkhātena mānasikasīlasaṃvarena, anatimānasaṅkhātena mānasikasīlasaṃvarena pahānatthāya samucchedanatthāya paṭipannoti evaṃ sabbavāresu yojanā kātabbā.
ਅਤ੍ਤਾਪਿ ਮਂ ਉਪવਦੇਯ੍ਯ ਅਨੁવਿਚ੍ਚਾਪਿ ਮਂ વਿਞ੍ਞੂ ਗਰਹੇਯ੍ਯੁਨ੍ਤਿ ਇਮੇਸੁ ਪਨ ਪਦੇਸੁ ਤਿਣਸਲਾਕਮ੍ਪਿ ਨਾਮ ਉਪਾਦਾਯ ਅਦਿਨ੍ਨਂ ਅਗ੍ਗਹਣਸਾਸਨੇ ਪਬ੍ਬਜਿਤ੍વਾ ਅਦਿਨ੍ਨਾਦਾਨਮਤ੍ਤਤੋਪਿ વਿਰਮਿਤੁਂ ਨ ਸਕ੍ਕੋਮਿ, ਕਿਂ ਮਯ੍ਹਂ ਪਬ੍ਬਜ੍ਜਾਯਾਤਿ ਏવਂ ਅਤ੍ਤਾਪਿ ਮਂ ਉਪવਦੇਯ੍ਯ। ਏવਰੂਪੇ ਨਾਮ ਸਾਸਨੇ ਪਬ੍ਬਜਿਤ੍વਾ ਅਦਿਨ੍ਨਾਦਾਨਮਤ੍ਤਤੋਪਿ ਓਰਮਿਤੁਂ ਨ ਸਕ੍ਕੋਤਿ, ਕਿਂ ਇਮਸ੍ਸ ਪਬ੍ਬਜ੍ਜਾਯਾਤਿ ਏવਂ ਅਨੁવਿਚ੍ਚਾਪਿ ਮਂ વਿਞ੍ਞੂ ਗਰਹੇਯ੍ਯੁਂ? ਹਸਾਪੇਕ੍ਖਤਾਯਪਿ ਨਾਮ ਦવਕਮ੍ਯਤਾਯ વਾ ਮੁਸਾવਾਦਂ ਅਕਰਣਸਾਸਨੇ ਪਬ੍ਬਜਿਤ੍વਾ। ਸਬ੍ਬਾਕਾਰੇਨ ਪਿਸੁਣਂ ਅਕਰਣਸਾਸਨੇ ਨਾਮ ਪਬ੍ਬਜਿਤ੍વਾ। ਅਪ੍ਪਮਤ੍ਤਕਮ੍ਪਿ ਗਿਦ੍ਧਿਲੋਭਂ ਅਕਰਣਸਾਸਨੇ ਨਾਮ ਪਬ੍ਬਜਿਤ੍વਾਪਿ। ਕਕਚੇਨ ਅਙ੍ਗੇਸੁ ਓਕ੍ਕਨ੍ਤਿਯਮਾਨੇਸੁਪਿ ਨਾਮ ਪਰੇਸਂ ਨਿਨ੍ਦਾਰੋਸਂ ਅਕਰਣਸਾਸਨੇ ਪਬ੍ਬਜਿਤ੍વਾ। ਛਿਨ੍ਨਖਾਣੁਕਣ੍ਟਕਾਦੀਸੁਪਿ ਨਾਮ ਕੋਧੁਪਾਯਾਸਂ ਅਕਰਣਸਾਸਨੇ ਪਬ੍ਬਜਿਤ੍વਾ। ਅਧਿਮਾਨਮਤ੍ਤਮ੍ਪਿ ਨਾਮ ਮਾਨਂ ਅਕਰਣਸਾਸਨੇ ਪਬ੍ਬਜਿਤ੍વਾ ਅਤਿਮਾਨਮਤ੍ਤਮ੍ਪਿ ਪਜਹਿਤੁਂ ਨ ਸਕ੍ਕੋਮਿ, ਕਿਂ ਮਯ੍ਹਂ ਪਬ੍ਬਜ੍ਜਾਯਾਤਿ ਏવਂ ਅਤ੍ਤਾਪਿ ਮਂ ਉਪવਦੇਯ੍ਯ। ਏવਰੂਪੇ ਨਾਮ ਸਾਸਨੇ ਪਬ੍ਬਜਿਤ੍વਾ ਅਤਿਮਾਨਮਤ੍ਤਮ੍ਪਿ ਪਜਹਿਤੁਂ ਨ ਸਕ੍ਕੋਤਿ, ਕਿਂ ਇਮਸ੍ਸ ਪਬ੍ਬਜ੍ਜਾਯਾਤਿ ਏવਂ ਅਨੁવਿਚ੍ਚਾਪਿ ਮਂ વਿਞ੍ਞੂ ਗਰਹੇਯ੍ਯੁਨ੍ਤਿ ਏવਂ ਸਬ੍ਬવਾਰੇਸੁ ਯੋਜਨਾ ਕਾਤਬ੍ਬਾ।
Attāpi maṃ upavadeyya anuviccāpi maṃ viññū garaheyyunti imesu pana padesu tiṇasalākampi nāma upādāya adinnaṃ aggahaṇasāsane pabbajitvā adinnādānamattatopi viramituṃ na sakkomi, kiṃ mayhaṃ pabbajjāyāti evaṃ attāpi maṃ upavadeyya. Evarūpe nāma sāsane pabbajitvā adinnādānamattatopi oramituṃ na sakkoti, kiṃ imassa pabbajjāyāti evaṃ anuviccāpi maṃ viññū garaheyyuṃ? Hasāpekkhatāyapi nāma davakamyatāya vā musāvādaṃ akaraṇasāsane pabbajitvā. Sabbākārena pisuṇaṃ akaraṇasāsane nāma pabbajitvā. Appamattakampi giddhilobhaṃ akaraṇasāsane nāma pabbajitvāpi. Kakacena aṅgesu okkantiyamānesupi nāma paresaṃ nindārosaṃ akaraṇasāsane pabbajitvā. Chinnakhāṇukaṇṭakādīsupi nāma kodhupāyāsaṃ akaraṇasāsane pabbajitvā. Adhimānamattampi nāma mānaṃ akaraṇasāsane pabbajitvā atimānamattampi pajahituṃ na sakkomi, kiṃ mayhaṃ pabbajjāyāti evaṃ attāpi maṃ upavadeyya. Evarūpe nāma sāsane pabbajitvā atimānamattampi pajahituṃ na sakkoti, kiṃ imassa pabbajjāyāti evaṃ anuviccāpi maṃ viññū garaheyyunti evaṃ sabbavāresu yojanā kātabbā.
ਆਸવਾਤਿ ਇਮਸ੍ਮਿਂ ਪਨ ਪਦੇ ਅਦਿਨ੍ਨਾਦਾਨਕਾਰਣਾ ਕਾਮਾਸવੋ ਦਿਟ੍ਠਾਸવੋ ਅવਿਜ੍ਜਾਸવੋਤਿ ਤਯੋ ਆਸવਾ ਉਪ੍ਪਜ੍ਜਨ੍ਤਿ, ਤਥਾ ਮੁਸਾવਾਦਕਾਰਣਾ ਪਿਸੁਣਾવਾਚਾਕਾਰਣਾ ਚ, ਗਿਦ੍ਧਿਲੋਭਕਾਰਣਾ ਦਿਟ੍ਠਾਸવੋ ਅવਿਜ੍ਜਾਸવੋ ਚ, ਨਿਨ੍ਦਾਰੋਸਕਾਰਣਾ ਅવਿਜ੍ਜਾਸવੋવ, ਤਥਾ ਕੋਧੁਪਾਯਾਸਕਾਰਣਾ, ਅਤਿਮਾਨਕਾਰਣਾ ਭવਾਸવੋ ਅવਿਜ੍ਜਾਸવੋ ਚਾਤਿ ਦ੍વੇવ ਆਸવਾ ਉਪ੍ਪਜ੍ਜਨ੍ਤੀਤਿ ਏવਂ ਆਸવੁਪ੍ਪਤ੍ਤਿ વੇਦਿਤਬ੍ਬਾ।
Āsavāti imasmiṃ pana pade adinnādānakāraṇā kāmāsavo diṭṭhāsavo avijjāsavoti tayo āsavā uppajjanti, tathā musāvādakāraṇā pisuṇāvācākāraṇā ca, giddhilobhakāraṇā diṭṭhāsavo avijjāsavo ca, nindārosakāraṇā avijjāsavova, tathā kodhupāyāsakāraṇā, atimānakāraṇā bhavāsavo avijjāsavo cāti dveva āsavā uppajjantīti evaṃ āsavuppatti veditabbā.
ਇਮੇਸੁ ਪਨ ਅਟ੍ਠਸੁਪਿ વਾਰੇਸੁ ਅਸਮ੍ਮੋਹਤ੍ਥਂ ਪੁਨ ਅਯਂ ਸਙ੍ਖੇਪવਿਨਿਚ੍ਛਯੋ – ਪੁਰਿਮੇਸੁ ਤਾવ ਚਤੂਸੁ વਿਰਮਿਤੁਂ ਨ ਸਕ੍ਕੋਮੀਤਿ વਤ੍ਤਬ੍ਬਂ, ਪਚ੍ਛਿਮੇਸੁ ਪਜਹਿਤੁਂ ਨ ਸਕ੍ਕੋਮੀਤਿ। ਪਾਣਾਤਿਪਾਤਨਿਨ੍ਦਾਰੋਸਕੋਧੁਪਾਯਾਸੇਸੁ ਚ ਏਕੋ ਅવਿਜ੍ਜਾਸવੋવ ਹੋਤਿ, ਅਦਿਨ੍ਨਾਦਾਨਮੁਸਾવਾਦਪਿਸੁਣਾવਾਚਾਸੁ ਕਾਮਾਸવੋ ਦਿਟ੍ਠਾਸવੋ ਅવਿਜ੍ਜਾਸવੋ, ਗਿਦ੍ਧਿਲੋਭੇ ਦਿਟ੍ਠਾਸવੋ ਅવਿਜ੍ਜਾਸવੋ, ਅਤਿਮਾਨੇ ਭવਾਸવੋ ਅવਿਜ੍ਜਾਸવੋ, ਅਪਾਣਾਤਿਪਾਤਂ ਦਿਨ੍ਨਾਦਾਨਂ ਕਾਯਿਕਂ ਸੀਲਂ, ਅਮੁਸਾ ਅਪਿਸੁਣਂ વਾਚਸਿਕਸੀਲਂ, ਠਪੇਤ੍વਾ ਅਨਿਨ੍ਦਾਰੋਸਂ ਸੇਸਾਨਿ ਤੀਣਿ ਮਾਨਸਿਕਸੀਲਾਨਿ। ਯਸ੍ਮਾ ਪਨ ਕਾਯੇਨਪਿ ਘਟ੍ਟੇਤਿ ਰੋਸੇਤਿ વਾਚਾਯਪਿ, ਤਸ੍ਮਾ ਅਨਿਨ੍ਦਾਰੋਸੋ ਦ੍વੇ ਠਾਨਾਨਿ ਯਾਤਿ, ਕਾਯਿਕਸੀਲਮ੍ਪਿ ਹੋਤਿ વਾਚਸਿਕਸੀਲਮ੍ਪਿ। ਏਤ੍ਤਾવਤਾ ਕਿਂ ਕਥਿਤਂ? ਪਾਤਿਮੋਕ੍ਖਸਂવਰਸੀਲਂ। ਪਾਤਿਮੋਕ੍ਖਸਂવਰਸੀਲੇ ਠਿਤਸ੍ਸ ਚ ਭਿਕ੍ਖੁਨੋ ਪਟਿਸਙ੍ਖਾਪਹਾਨવਸੇਨ ਗਿਹਿવੋਹਾਰਸਮੁਚ੍ਛੇਦੋ ਕਥਿਤੋਤਿ વੇਦਿਤਬ੍ਬੋ।
Imesu pana aṭṭhasupi vāresu asammohatthaṃ puna ayaṃ saṅkhepavinicchayo – purimesu tāva catūsu viramituṃ na sakkomīti vattabbaṃ, pacchimesu pajahituṃ na sakkomīti. Pāṇātipātanindārosakodhupāyāsesu ca eko avijjāsavova hoti, adinnādānamusāvādapisuṇāvācāsu kāmāsavo diṭṭhāsavo avijjāsavo, giddhilobhe diṭṭhāsavo avijjāsavo, atimāne bhavāsavo avijjāsavo, apāṇātipātaṃ dinnādānaṃ kāyikaṃ sīlaṃ, amusā apisuṇaṃ vācasikasīlaṃ, ṭhapetvā anindārosaṃ sesāni tīṇi mānasikasīlāni. Yasmā pana kāyenapi ghaṭṭeti roseti vācāyapi, tasmā anindāroso dve ṭhānāni yāti, kāyikasīlampi hoti vācasikasīlampi. Ettāvatā kiṃ kathitaṃ? Pātimokkhasaṃvarasīlaṃ. Pātimokkhasaṃvarasīle ṭhitassa ca bhikkhuno paṭisaṅkhāpahānavasena gihivohārasamucchedo kathitoti veditabbo.
ਕਾਮਾਦੀਨવਕਥਾવਣ੍ਣਨਾ
Kāmādīnavakathāvaṇṇanā
੪੨. વਿਤ੍ਥਾਰਦੇਸਨਾਯਂ ਤਮੇਨਂ ਦਕ੍ਖੋਤਿ ਪਦਸ੍ਸ ਉਪਸੁਮ੍ਭੇਯ੍ਯਾਤਿ ਇਮਿਨਾ ਸਦ੍ਧਿਂ ਸਮ੍ਬਨ੍ਧੋ વੇਦਿਤਬ੍ਬੋ। ਇਦਂ વੁਤ੍ਤਂ ਹੋਤਿ, ਤਮੇਨਂ ਕੁਕ੍ਕੁਰਂ ਉਪਸੁਮ੍ਭੇਯ੍ਯ, ਤਸ੍ਸ ਸਮੀਪੇ ਖਿਪੇਯ੍ਯਾਤਿ ਅਤ੍ਥੋ। ਅਟ੍ਠਿਕਙ੍ਕਲਨ੍ਤਿ ਉਰਟ੍ਠਿਂ વਾ ਪਿਟ੍ਠਿਕਣ੍ਟਕਂ વਾ ਸੀਸਟ੍ਠਿਂ વਾ। ਤਞ੍ਹਿ ਨਿਮ੍ਮਂਸਤ੍ਤਾ ਕਙ੍ਕਲਨ੍ਤਿ વੁਚ੍ਚਤਿ। ਸੁਨਿਕ੍ਕਨ੍ਤਂ ਨਿਕ੍ਕਨ੍ਤਨ੍ਤਿ ਯਥਾ ਸੁਨਿਕ੍ਕਨ੍ਤਂ ਹੋਤਿ, ਏવਂ ਨਿਕ੍ਕਨ੍ਤਂ ਨਿਲ੍ਲਿਖਿਤਂ, ਯਦੇਤ੍ਥ ਅਲ੍ਲੀਨਮਂਸਂ ਅਤ੍ਥਿ, ਤਂ ਸਬ੍ਬਂ ਨਿਲ੍ਲਿਖਿਤ੍વਾ ਅਟ੍ਠਿਮਤ੍ਤਮੇવ ਕਤਨ੍ਤਿ ਅਤ੍ਥੋ। ਤੇਨੇવਾਹ ‘‘ਨਿਮ੍ਮਂਸ’’ਨ੍ਤਿ। ਲੋਹਿਤਂ ਪਨ ਮਕ੍ਖਿਤ੍વਾ ਤਿਟ੍ਠਤਿ, ਤੇਨ વੁਤ੍ਤਂ ‘‘ਲੋਹਿਤਮਕ੍ਖਿਤ’’ਨ੍ਤਿ।
42. Vitthāradesanāyaṃ tamenaṃ dakkhoti padassa upasumbheyyāti iminā saddhiṃ sambandho veditabbo. Idaṃ vuttaṃ hoti, tamenaṃ kukkuraṃ upasumbheyya, tassa samīpe khipeyyāti attho. Aṭṭhikaṅkalanti uraṭṭhiṃ vā piṭṭhikaṇṭakaṃ vā sīsaṭṭhiṃ vā. Tañhi nimmaṃsattā kaṅkalanti vuccati. Sunikkantaṃnikkantanti yathā sunikkantaṃ hoti, evaṃ nikkantaṃ nillikhitaṃ, yadettha allīnamaṃsaṃ atthi, taṃ sabbaṃ nillikhitvā aṭṭhimattameva katanti attho. Tenevāha ‘‘nimmaṃsa’’nti. Lohitaṃ pana makkhitvā tiṭṭhati, tena vuttaṃ ‘‘lohitamakkhita’’nti.
ਬਹੁਦੁਕ੍ਖਾ ਬਹੁਪਾਯਾਸਾਤਿ ਦਿਟ੍ਠਧਮ੍ਮਿਕਸਮ੍ਪਰਾਯਿਕੇਹਿ ਦੁਕ੍ਖੇਹਿ ਬਹੁਦੁਕ੍ਖਾ, ਉਪਾਯਾਸਸਂਕਿਲੇਸੇਹਿ ਬਹੁਪਾਯਾਸਾ। ਯਾਯਂ ਉਪੇਕ੍ਖਾ ਨਾਨਤ੍ਤਾ ਨਾਨਤ੍ਤਸਿਤਾਤਿ ਯਾ ਅਯਂ ਪਞ੍ਚਕਾਮਗੁਣਾਰਮ੍ਮਣવਸੇਨ ਨਾਨਾਸਭਾવਾ, ਤਾਨੇવ ਚ ਆਰਮ੍ਮਣਾਨਿ ਨਿਸ੍ਸਿਤਤ੍ਤਾ ‘‘ਨਾਨਤ੍ਤਸਿਤਾ’’ਤਿ વੁਚ੍ਚਤਿ ਪਞ੍ਚਕਾਮਗੁਣੂਪੇਕ੍ਖਾ, ਤਂ ਅਭਿਨਿવਜ੍ਜੇਤ੍વਾ। ਏਕਤ੍ਤਾ ਏਕਤ੍ਤਸਿਤਾਤਿ ਚਤੁਤ੍ਥਜ੍ਝਾਨੁਪੇਕ੍ਖਾ, ਸਾ ਹਿ ਦਿવਸਮ੍ਪਿ ਏਕਸ੍ਮਿਂ ਆਰਮ੍ਮਣੇ ਉਪ੍ਪਜ੍ਜਨਤੋ ਏਕਸਭਾવਾ, ਤਦੇવ ਏਕਂ ਆਰਮ੍ਮਣਂ ਨਿਸ੍ਸਿਤਤ੍ਤਾ ਏਕਤ੍ਤਸਿਤਾ ਨਾਮ। ਯਤ੍ਥ ਸਬ੍ਬਸੋ ਲੋਕਾਮਿਸੂਪਾਦਾਨਾ ਅਪਰਿਸੇਸਾ ਨਿਰੁਜ੍ਝਨ੍ਤੀਤਿ ਯਤ੍ਥ ਚਤੁਤ੍ਥਜ੍ਝਾਨੁਪੇਕ੍ਖਾਯਂ ਯਂ ਉਪੇਕ੍ਖਂ ਆਗਮ੍ਮ ਯਂ ਪਟਿਚ੍ਚ ਸਬ੍ਬੇਨ ਸਬ੍ਬਂ ਅਪਰਿਸੇਸਾ ਲੋਕਾਮਿਸਸਙ੍ਖਾਤਾ ਪਞ੍ਚਕਾਮਗੁਣਾਮਿਸਾ ਨਿਰੁਜ੍ਝਨ੍ਤਿ। ਪਞ੍ਚਕਾਮਗੁਣਾਮਿਸਾਤਿ ਚ ਕਾਮਗੁਣਾਰਮ੍ਮਣਛਨ੍ਦਰਾਗਾ, ਗਹਣਟ੍ਠੇਨ ਤੇਯੇવ ਚ ਉਪਾਦਾਨਾਤਿਪਿ વੁਤ੍ਤਾ। ਤਮੇવੂਪੇਕ੍ਖਂ ਭਾવੇਤੀਤਿ ਤਂ ਲੋਕਾਮਿਸੂਪਾਦਾਨਾਨਂ ਪਟਿਪਕ੍ਖਭੂਤਂ ਚਤੁਤ੍ਥਜ੍ਝਾਨੁਪੇਕ੍ਖਮੇવ વਡ੍ਢੇਤਿ।
Bahudukkhā bahupāyāsāti diṭṭhadhammikasamparāyikehi dukkhehi bahudukkhā, upāyāsasaṃkilesehi bahupāyāsā. Yāyaṃ upekkhā nānattā nānattasitāti yā ayaṃ pañcakāmaguṇārammaṇavasena nānāsabhāvā, tāneva ca ārammaṇāni nissitattā ‘‘nānattasitā’’ti vuccati pañcakāmaguṇūpekkhā, taṃ abhinivajjetvā. Ekattā ekattasitāti catutthajjhānupekkhā, sā hi divasampi ekasmiṃ ārammaṇe uppajjanato ekasabhāvā, tadeva ekaṃ ārammaṇaṃ nissitattā ekattasitā nāma. Yattha sabbaso lokāmisūpādānā aparisesā nirujjhantīti yattha catutthajjhānupekkhāyaṃ yaṃ upekkhaṃ āgamma yaṃ paṭicca sabbena sabbaṃ aparisesā lokāmisasaṅkhātā pañcakāmaguṇāmisā nirujjhanti. Pañcakāmaguṇāmisāti ca kāmaguṇārammaṇachandarāgā, gahaṇaṭṭhena teyeva ca upādānātipi vuttā. Tamevūpekkhaṃ bhāvetīti taṃ lokāmisūpādānānaṃ paṭipakkhabhūtaṃ catutthajjhānupekkhameva vaḍḍheti.
੪੩. ਉਡ੍ਡੀਯੇਯ੍ਯਾਤਿ ਉਪ੍ਪਤਿਤ੍વਾ ਗਚ੍ਛੇਯ੍ਯ। ਅਨੁਪਤਿਤ੍વਾਤਿ ਅਨੁਬਨ੍ਧਿਤ੍વਾ। વਿਤਚ੍ਛੇਯ੍ਯੁਨ੍ਤਿ ਮੁਖਤੁਣ੍ਡਕੇਨ ਡਂਸਨ੍ਤਾ ਤਚ੍ਛੇਯ੍ਯੁਂ। વਿਸ੍ਸਜ੍ਜੇਯ੍ਯੁਨ੍ਤਿ ਮਂਸਪੇਸਿਂ ਨਖੇਹਿ ਕਡ੍ਢਿਤ੍વਾ ਪਾਤੇਯ੍ਯੁਂ।
43.Uḍḍīyeyyāti uppatitvā gaccheyya. Anupatitvāti anubandhitvā. Vitaccheyyunti mukhatuṇḍakena ḍaṃsantā taccheyyuṃ. Vissajjeyyunti maṃsapesiṃ nakhehi kaḍḍhitvā pāteyyuṃ.
੪੭. ਯਾਨਂ વਾ ਪੋਰਿਸੇਯ੍ਯਨ੍ਤਿ ਪੁਰਿਸਾਨੁਚ੍ਛવਿਕਂ ਯਾਨਂ। ਪવਰਮਣਿਕੁਣ੍ਡਲਨ੍ਤਿ ਨਾਨਪ੍ਪਕਾਰਂ ਉਤ੍ਤਮਮਣਿਞ੍ਚ ਕੁਣ੍ਡਲਞ੍ਚ। ਸਾਨਿ ਹਰਨ੍ਤੀਤਿ ਅਤ੍ਤਨੋ ਭਣ੍ਡਕਾਨਿ ਗਣ੍ਹਨ੍ਤਿ।
47.Yānaṃ vā poriseyyanti purisānucchavikaṃ yānaṃ. Pavaramaṇikuṇḍalanti nānappakāraṃ uttamamaṇiñca kuṇḍalañca. Sāni harantīti attano bhaṇḍakāni gaṇhanti.
੪੮. ਸਮ੍ਪਨ੍ਨਫਲਨ੍ਤਿ ਮਧੁਰਫਲਂ। ਉਪਪਨ੍ਨਫਲਨ੍ਤਿ ਫਲੂਪਪਨ੍ਨਂ ਬਹੁਫਲਂ।
48.Sampannaphalanti madhuraphalaṃ. Upapannaphalanti phalūpapannaṃ bahuphalaṃ.
੪੯. ਅਨੁਤ੍ਤਰਨ੍ਤਿ ਉਤ੍ਤਮਂ ਪਭਸ੍ਸਰਂ ਨਿਰੁਪਕ੍ਕਿਲੇਸਂ।
49.Anuttaranti uttamaṃ pabhassaraṃ nirupakkilesaṃ.
੫੦. ਆਰਕਾ ਅਹਂ, ਭਨ੍ਤੇਤਿ ਪਥવਿਤੋ ਨਭਂ વਿਯ ਸਮੁਦ੍ਦਸ੍ਸ ਓਰਿਮਤੀਰਤੋ ਪਰਤੀਰਂ વਿਯ ਚ ਸੁવਿਦੂਰવਿਦੂਰੇ ਅਹਂ। ਅਨਾਜਾਨੀਯੇਤਿ ਗਿਹਿવੋਹਾਰਸਮੁਚ੍ਛੇਦਨਸ੍ਸ ਕਾਰਣਂ ਅਜਾਨਨਕੇ। ਆਜਾਨੀਯਭੋਜਨਨ੍ਤਿ ਕਾਰਣਂ ਜਾਨਨ੍ਤੇਹਿ ਭੁਞ੍ਜਿਤਬ੍ਬਂ ਭੋਜਨਂ। ਅਨਾਜਾਨੀਯਭੋਜਨਨ੍ਤਿ ਕਾਰਣਂ ਅਜਾਨਨ੍ਤੇਹਿ ਭੁਞ੍ਜਿਤਬ੍ਬਂ ਭੋਜਨਂ। ਸੇਸਂ ਸਬ੍ਬਤ੍ਥ ਉਤ੍ਤਾਨਮੇવਾਤਿ।
50.Ārakā ahaṃ, bhanteti pathavito nabhaṃ viya samuddassa orimatīrato paratīraṃ viya ca suvidūravidūre ahaṃ. Anājānīyeti gihivohārasamucchedanassa kāraṇaṃ ajānanake. Ājānīyabhojananti kāraṇaṃ jānantehi bhuñjitabbaṃ bhojanaṃ. Anājānīyabhojananti kāraṇaṃ ajānantehi bhuñjitabbaṃ bhojanaṃ. Sesaṃ sabbattha uttānamevāti.
ਪਪਞ੍ਚਸੂਦਨਿਯਾ ਮਜ੍ਝਿਮਨਿਕਾਯਟ੍ਠਕਥਾਯ
Papañcasūdaniyā majjhimanikāyaṭṭhakathāya
ਪੋਤਲਿਯਸੁਤ੍ਤવਣ੍ਣਨਾ ਨਿਟ੍ਠਿਤਾ।
Potaliyasuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਮਜ੍ਝਿਮਨਿਕਾਯ • Majjhimanikāya / ੪. ਪੋਤਲਿਯਸੁਤ੍ਤਂ • 4. Potaliyasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਮਜ੍ਝਿਮਨਿਕਾਯ (ਟੀਕਾ) • Majjhimanikāya (ṭīkā) / ੪. ਪੋਤਲਿਯਸੁਤ੍ਤવਣ੍ਣਨਾ • 4. Potaliyasuttavaṇṇanā
