| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၆. ပိယင္ကရသုတ္တဝဏ္ဏနာ
6. Piyaṅkarasuttavaṇṇanā
၂၄၀. ပစ္စန္တေတိ ပရိယန္တေ။ ပာဋိယေက္ကန္တိ သင္ဂီတိကာလေ ဝိသုံ။ ယမကဝဂ္ဂာဒိကာ ဗ္ရာဟ္မဏဝဂ္ဂပရိယောသာနာ ဆဗ္ဗီသတိ ဝဂ္ဂာ ဧတိသ္သာတိ ဆဗ္ဗီသတိဝဂ္ဂာ, တန္တီတိ ပာဠိ။ ဥစ္စာရပသ္သာဝာဒိ ဧဝရူပံ ဒုဗ္ဘောဇနံ, ‘‘အသုစိဇေဂုစ္ဆဘာဝေန ဒုဋ္ဌု ဘောဇန’’န္တိ ကတ္ဝာ, ဒုဗ္ဘောဇနဂ္ဂဟဏေန ဝာ ဝန္တဂဗ္ဘမလာဒီနိ အတိဒိသတိ။ ဆဝိအာဒီနိ ဆေတ္ဝာတိ ဆဝိအာဒီနိ အတိဝိဇ္ဈ အတိဝိယ ပဝိသိတ္ဝာ။ အဋ္ဌိမိဉ္ဇံ အာဟစ္စ အဋ္ဌာသိ ပီတိသမုဋ္ဌာနဥဠာရောဠာရရူပပ္ပဝတ္တိယာ။ တေနာဟ ‘‘ဟဒယင္ဂမနီယော ဟုတ္ဝာ’’တိ။
240.Paccanteti pariyante. Pāṭiyekkanti saṅgītikāle visuṃ. Yamakavaggādikā brāhmaṇavaggapariyosānā chabbīsati vaggā etissāti chabbīsativaggā, tantīti pāḷi. Uccārapassāvādi evarūpaṃ dubbhojanaṃ, ‘‘asucijegucchabhāvena duṭṭhu bhojana’’nti katvā, dubbhojanaggahaṇena vā vantagabbhamalādīni atidisati. Chaviādīni chetvāti chaviādīni ativijjha ativiya pavisitvā. Aṭṭhimiñjaṃ āhacca aṭṭhāsi pītisamuṭṭhānauḷāroḷārarūpappavattiyā. Tenāha ‘‘hadayaṅgamanīyo hutvā’’ti.
ဓမ္မတာယ သမာဒိဏ္ဏန္တိ ကသ္သစိ သန္တိကေ အဂ္ဂဟေတ္ဝာ သယမေဝ တသ္မိံ ခဏေ သံယတာ ဟောမာတိ ယထာသံယတာ။ တတိယပဒေနာတိ ‘‘သိက္ခေမ သုသီလ္ယ’’န္တိ ဣမိနာ ပဒေန။ သေသာတိ ဝုတ္တာဝသေသာ။ တိသ္သော အဒိန္နာဒာနမိစ္ဆာစာရသုရာပာနဝိရတိယော။ ဂဟိတာ ဂောဗလီဗဒ္ဒဉာယေန။ ဆာတကံ ဒုဗ္ဘိက္ခဉ္စ ဧတ္ထာတိ ဆာတကဒုဗ္ဘိက္ခာ, ဇိဃစ္ဆာဒုဗ္ဘိက္ခာဗဟုလာယာတိ အတ္ထော။ ပိသာစယက္ခယောနိယာတိ ပေတ္တိဝိသယသဒိသယက္ခယောနိယာ အပိ နာမ မုစ္စေမာတိ ယောဇနာ။
Dhammatāyasamādiṇṇanti kassaci santike aggahetvā sayameva tasmiṃ khaṇe saṃyatā homāti yathāsaṃyatā. Tatiyapadenāti ‘‘sikkhema susīlya’’nti iminā padena. Sesāti vuttāvasesā. Tisso adinnādānamicchācārasurāpānaviratiyo. Gahitā gobalībaddañāyena. Chātakaṃ dubbhikkhañca etthāti chātakadubbhikkhā, jighacchādubbhikkhābahulāyāti attho. Pisācayakkhayoniyāti pettivisayasadisayakkhayoniyā api nāma muccemāti yojanā.
ပိယင္ကရသုတ္တဝဏ္ဏနာ နိဋ္ဌိတာ။
Piyaṅkarasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၆. ပိယင္ကရသုတ္တံ • 6. Piyaṅkarasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၆. ပိယင္ကရသုတ္တဝဏ္ဏနာ • 6. Piyaṅkarasuttavaṇṇanā
