| Library / Tipiṭaka / ತಿಪಿಟಕ • Tipiṭaka / ಸುತ್ತನಿಪಾತಪಾಳಿ • Suttanipātapāḷi |
೧೬. ಪಿಙ್ಗಿಯಮಾಣವಪುಚ್ಛಾ
16. Piṅgiyamāṇavapucchā
೧೧೨೬.
1126.
‘‘ಜಿಣ್ಣೋಹಮಸ್ಮಿ ಅಬಲೋ ವೀತವಣ್ಣೋ, (ಇಚ್ಚಾಯಸ್ಮಾ ಪಿಙ್ಗಿಯೋ)
‘‘Jiṇṇohamasmi abalo vītavaṇṇo, (iccāyasmā piṅgiyo)
ನೇತ್ತಾ ನ ಸುದ್ಧಾ ಸವನಂ ನ ಫಾಸು।
Nettā na suddhā savanaṃ na phāsu;
ಮಾಹಂ ನಸ್ಸಂ ಮೋಮುಹೋ ಅನ್ತರಾವ
Māhaṃ nassaṃ momuho antarāva
ಆಚಿಕ್ಖ ಧಮ್ಮಂ ಯಮಹಂ ವಿಜಞ್ಞಂ।
Ācikkha dhammaṃ yamahaṃ vijaññaṃ;
ಜಾತಿಜರಾಯ ಇಧ ವಿಪ್ಪಹಾನಂ’’॥
Jātijarāya idha vippahānaṃ’’.
೧೧೨೭.
1127.
‘‘ದಿಸ್ವಾನ ರೂಪೇಸು ವಿಹಞ್ಞಮಾನೇ, (ಪಿಙ್ಗಿಯಾತಿ ಭಗವಾ)
‘‘Disvāna rūpesu vihaññamāne, (piṅgiyāti bhagavā)
ರುಪ್ಪನ್ತಿ ರೂಪೇಸು ಜನಾ ಪಮತ್ತಾ।
Ruppanti rūpesu janā pamattā;
ತಸ್ಮಾ ತುವಂ ಪಿಙ್ಗಿಯ ಅಪ್ಪಮತ್ತೋ,
Tasmā tuvaṃ piṅgiya appamatto,
ಜಹಸ್ಸು ರೂಪಂ ಅಪುನಬ್ಭವಾಯ’’॥
Jahassu rūpaṃ apunabbhavāya’’.
೧೧೨೮.
1128.
‘‘ದಿಸಾ ಚತಸ್ಸೋ ವಿದಿಸಾ ಚತಸ್ಸೋ, ಉದ್ಧಂ ಅಧೋ ದಸ ದಿಸಾ ಇಮಾಯೋ।
‘‘Disā catasso vidisā catasso, uddhaṃ adho dasa disā imāyo;
ಆಚಿಕ್ಖ ಧಮ್ಮಂ ಯಮಹಂ ವಿಜಞ್ಞಂ, ಜಾತಿಜರಾಯ ಇಧ ವಿಪ್ಪಹಾನಂ’’॥
Ācikkha dhammaṃ yamahaṃ vijaññaṃ, jātijarāya idha vippahānaṃ’’.
೧೧೨೯.
1129.
‘‘ತಣ್ಹಾಧಿಪನ್ನೇ ಮನುಜೇ ಪೇಕ್ಖಮಾನೋ, (ಪಿಙ್ಗಿಯಾತಿ ಭಗವಾ)
‘‘Taṇhādhipanne manuje pekkhamāno, (piṅgiyāti bhagavā)
ಸನ್ತಾಪಜಾತೇ ಜರಸಾ ಪರೇತೇ।
Santāpajāte jarasā parete;
ತಸ್ಮಾ ತುವಂ ಪಿಙ್ಗಿಯ ಅಪ್ಪಮತ್ತೋ, ಜಹಸ್ಸು ತಣ್ಹಂ ಅಪುನಬ್ಭವಾಯಾ’’ತಿ॥
Tasmā tuvaṃ piṅgiya appamatto, jahassu taṇhaṃ apunabbhavāyā’’ti.
ಪಿಙ್ಗಿಯಮಾಣವಪುಚ್ಛಾ ಸೋಳಸಮಾ ನಿಟ್ಠಿತಾ।
Piṅgiyamāṇavapucchā soḷasamā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಸುತ್ತನಿಪಾತ-ಅಟ್ಠಕಥಾ • Suttanipāta-aṭṭhakathā / ೧೬. ಪಿಙ್ಗಿಯಸುತ್ತವಣ್ಣನಾ • 16. Piṅgiyasuttavaṇṇanā
