| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၈. ပိဏ္ဍသုတ္တဝဏ္ဏနာ
8. Piṇḍasuttavaṇṇanā
၁၅၄. တတ္ထ တတ္ထာတိ တသ္မိံ တသ္မိံ ဉာတိမိတ္တကုလေ။ ပာဟုနကာနီတိ ပဟိတဗ္ဗပဏ္ဏာကာရာနိ။ အာဂန္တုကပဏ္ဏာကာရာနီတိ အာဂန္တုကာနံ ဥပဂတာနံ ဒာတဗ္ဗပဏ္ဏာကာရာနိ။ သယံစရဒိဝသေတိ ကုမာရကာနဉ္စ ကုမာရိကာနဉ္စ သယံ အတ္တနာ စရိတဗ္ဗဆဏဒိဝသေ။ ဣဒာနိ တမတ္ထံ ဝိတ္ထာရတော ဒသ္သေန္တော ‘‘သမဝယဇာတိဂောတ္တာ’’တိအာဒိမာဟ။ သမဝယသမဇာတိကသမဂောတ္တာတိ ပစ္စေကံ သမ-သဒ္ဒော ယောဇေတဗ္ဗော။ ဂောတ္တသမတာ စ အာဝာဟဝိဝာဟယောဂ္ယတာဝသေန ဒဋ္ဌဗ္ဗာ, န ဧကဂောတ္တတာဝသေန။ တတော တတော ဂာမတော။ အညသ္မိံ ဒာတဗ္ဗေ အသတိ။ ဆဏဝသေန ပဟိဏိတုံ သမ္ပာဒိတံ ပူဝံ ဆဏပူဝံ။ တာသံ သမ္ပတ္တိယာတိ တာသံ ဒာနံ ဓမ္မသ္သဝနဉ္စာတိ တသ္သာ ဒုဝိဓာယပိ သမ္ပတ္တိယာ။
154.Tattha tatthāti tasmiṃ tasmiṃ ñātimittakule. Pāhunakānīti pahitabbapaṇṇākārāni. Āgantukapaṇṇākārānīti āgantukānaṃ upagatānaṃ dātabbapaṇṇākārāni. Sayaṃcaradivaseti kumārakānañca kumārikānañca sayaṃ attanā caritabbachaṇadivase. Idāni tamatthaṃ vitthārato dassento ‘‘samavayajātigottā’’tiādimāha. Samavayasamajātikasamagottāti paccekaṃ sama-saddo yojetabbo. Gottasamatā ca āvāhavivāhayogyatāvasena daṭṭhabbā, na ekagottatāvasena. Tato tato gāmato. Aññasmiṃ dātabbe asati. Chaṇavasena pahiṇituṃ sampāditaṃ pūvaṃ chaṇapūvaṃ. Tāsaṃ sampattiyāti tāsaṃ dānaṃ dhammassavanañcāti tassā duvidhāyapi sampattiyā.
ဉာဏံ နာမ အာဝဇ္ဇနပုဗ္ဗကံ, တသ္မာ အဇာနနသ္သ ‘‘အနာဝဇ္ဇနတာယာ’’တိ ကာရဏံ ဝတ္ဝာ သေသကာရဏံ ဝဒန္တော ‘‘ဗုဒ္ဓာန’’န္တိအာဒိမာဟ။ ဥပစာရဘေဒန္တိ ဗုဒ္ဓံ ဒိသ္ဝာ မနုသ္သေဟိ ကာတဗ္ဗဥပစာရသ္သ ဘိန္ဒနံ။ ဘိန္ဒိတုန္တိ ဝိဓမိတုံ။
Ñāṇaṃ nāma āvajjanapubbakaṃ, tasmā ajānanassa ‘‘anāvajjanatāyā’’ti kāraṇaṃ vatvā sesakāraṇaṃ vadanto ‘‘buddhāna’’ntiādimāha. Upacārabhedanti buddhaṃ disvā manussehi kātabbaupacārassa bhindanaṃ. Bhinditunti vidhamituṃ.
ဘဂဝာ ပနာတိ ပနသဒ္ဒော ဝိသေသတ္ထဇောတကော။ တေန န ကေဝလံ ဘဂဝာ ဥပ္ပဏ္ဍနံ ပရိဟရန္တော တံ ဂာမံ န ပုန ပာဝိသိ, အထ ခော မာရံ အနုကမ္ပန္တောတိ ဣဒံ ဝိသေသံ ဇောတေတိ။
Bhagavā panāti panasaddo visesatthajotako. Tena na kevalaṃ bhagavā uppaṇḍanaṃ pariharanto taṃ gāmaṃ na puna pāvisi, atha kho māraṃ anukampantoti idaṃ visesaṃ joteti.
ဇနေသီတိ အပုညံ ဇနေသိ, ဇနေန္တော စ ယထာ တတော အာယတိံ ထိရတရံ မဟန္တံ ဒုက္ခံ နိပ္ဖဇ္ဇိသ္သတိ, ဧဝံ နိပ္ဖာဒေသိ။ အာသဇ္ဇနန္တိ ဧတ္ထ နန္တိ နိပာတမတ္တံ။ ကိဉ္စတိ မဒ္ဒတိ အဘိဘဝတီတိ ကိဉ္စနန္တိ အာဟ ‘‘မဒ္ဒိတုံ သမတ္ထ’’န္တိ။
Janesīti apuññaṃ janesi, janento ca yathā tato āyatiṃ thirataraṃ mahantaṃ dukkhaṃ nipphajjissati, evaṃ nipphādesi. Āsajjananti ettha nanti nipātamattaṃ. Kiñcati maddati abhibhavatīti kiñcananti āha ‘‘maddituṃ samattha’’nti.
ပိဏ္ဍသုတ္တဝဏ္ဏနာ နိဋ္ဌိတာ။
Piṇḍasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ပိဏ္ဍသုတ္တံ • 8. Piṇḍasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. ပိဏ္ဍသုတ္တဝဏ္ဏနာ • 8. Piṇḍasuttavaṇṇanā
