40. Pilindavacchavaggo

1. Pilindavacchattheraapadānaṃ

1.

‘‘Nagare haṃsavatiyā, āsiṃ dovāriko ahaṃ;

Akkhobhaṃ amitaṃ bhogaṃ, ghare sannicitaṃ mama.

2.

‘‘Rahogato nisīditvā, pahaṃsitvāna mānasaṃ ²;

Nisajja pāsādavare, evaṃ cintesahaṃ tadā.

(Cintanākāro)

3.

‘‘‘Bahū medhigatā bhogā, phītaṃ antepuraṃ mama;

Rājāpi ⁴ sannimantesi, ānando pathavissaro.

4.

‘‘‘Ayañca buddho uppanno, adhiccuppattiko muni;

Saṃvijjanti ca me bhogā, dānaṃ dassāmi satthuno.

5.

‘‘‘Padumena rājaputtena, dinnaṃ dānavaraṃ jine;

Hatthināge ca pallaṅke, apassenañcanappakaṃ.

6.

‘‘‘Ahampi dānaṃ dassāmi, saṅghe gaṇavaruttame;

Adinnapubbamaññesaṃ, bhavissaṃ ādikammiko.

7.

‘‘‘Cintetvāhaṃ bahuvidhaṃ, yāge yassa sukhaṃphalaṃ;

Parikkhāradānamaddakkhiṃ, mama saṅkappapūraṇaṃ.

8.

‘‘‘Parikkhārāni dassāmi, saṅghe gaṇavaruttame;

Adinnapubbamaññesaṃ, bhavissaṃ ādikammiko’.

(Dānavatthusampādanaṃ)

9.

‘‘Naḷakāre upāgamma, chattaṃ kāresi tāvade;

Chattasatasahassāni, ekato sannipātayiṃ.

10.

‘‘Dussasatasahassāni, ekato sannipātayiṃ;

Pattasatasahassāni, ekato sannipātayiṃ.

11.

‘‘Vāsiyo satthake cāpi, sūciyo nakhachedane;

Heṭṭhāchatte ṭhapāpesiṃ, kāretvā tadanucchave.

12.

‘‘Vidhūpane tālavaṇṭe, morahatthe ca cāmare;

Parissāvane teladhāre ⁶, kārayiṃ tadanucchave.

13.

‘‘Sūcighare aṃsabaddhe, athopi kāyabandhane;

Ādhārake ca sukate, kārayiṃ tadanucchave.

14.

‘‘Paribhogabhājane ca, athopi lohathālake;

Bhesajje pūrayitvāna, heṭṭhāchatte ṭhapesahaṃ.

15.

‘‘Vacaṃ usīraṃ laṭṭhimadhuṃ, pipphalī maricāni ca;

Harītakiṃ siṅgīveraṃ, sabbaṃ pūresi bhājane.

16.

‘‘Upāhanā pādukāyo, atho udakapuñchane;

Kattaradaṇḍe sukate, kārayiṃ tadanucchave.

17.

‘‘Osadhañjananāḷī ca ⁸, salākā dhammakuttarā;

Kuñcikā pañcavaṇṇehi, sibbite kuñcikāghare.

18.

‘‘Āyoge dhūmanette ca, athopi dīpadhārake;

Tumbake ca karaṇḍe ca, kārayiṃ tadanucchave.

19.

‘‘Saṇḍāse pipphale ceva, athopi malahārake;

Bhesajjathavike ceva, kārayiṃ tadanucchave.

20.

‘‘Āsandiyo pīṭhake ca, pallaṅke caturomaye;

Tadanucchave kārayitvā, heṭṭhāchatte ṭhapesahaṃ.

21.

‘‘Uṇṇābhisī tūlabhisī, athopi pīṭhikābhisī ¹⁰;

Bimbohane ¹² ca sukate, kārayiṃ tadanucchave.

22.

‘‘Kuruvinde madhusitthe, telaṃ hatthappatāpakaṃ;

Sipāṭiphalake sucī, mañcaṃ attharaṇena ca.

23.

‘‘Senāsane pādapuñche, sayanāsanadaṇḍake;

Dantapoṇe ca āṭalī ¹⁴, sīsālepanagandhake.

24.

‘‘Araṇī phalapīṭhe ¹⁶ ca, pattapidhānathālake;

Udakassa kaṭacchū ca, cuṇṇakaṃ rajanambaṇaṃ ¹⁸.

25.

‘‘Sammajjanaṃ ²⁰ udapattaṃ, tathā vassikasāṭikaṃ;

Nisīdanaṃ kaṇḍucchādi, atha antaravāsakaṃ.

26.

‘‘Uttarāsaṅgasaṅghāṭī, natthukaṃ mukhasodhanaṃ;

Biḷaṅgaloṇaṃ pahūtañca ²², madhuñca dadhipānakaṃ.

27.

‘‘Dhūpaṃ ²⁴ sitthaṃ pilotiñca, mukhapuñchanasuttakaṃ;

Dātabbaṃ nāma yaṃ atthi, yañca kappati satthuno.

28.

‘‘Sabbametaṃ samānetvā, ānandaṃ upasaṅkamiṃ;

Upasaṅkamma rājānaṃ, janetāraṃ mahesino ²⁶;

Sirasā abhivādetvā, idaṃ vacanamabraviṃ.

(Dānokāsayācanā)

29.

‘‘‘Ekato jātasaṃvaddhā, ubhinnaṃ ekato manaṃ ²⁸;

Sādhāraṇā sukhadukkhe, ubho ca anuvattakā.

30.

‘‘‘Atthi cetasikaṃ dukkhaṃ, tavādheyyaṃ arindama;

Yadi sakkosi taṃ dukkhaṃ, vinodeyyāsi khattiya.

31.

‘‘‘Tava dukkhaṃ mama dukkhaṃ, ubhinnaṃ ekato mano ³⁰;

Niṭṭhitanti vijānāhi, mamādheyyaṃ sace tuvaṃ.

32.

‘‘‘Jānāhi kho mahārāja, dukkhaṃ me dubbinodayaṃ;

Pahu samāno gajjasu, ekaṃ te duccajaṃ varaṃ.

33.

‘‘‘Yāvatā vijite atthi, yāvatā mama jīvitaṃ;

Etehi yadi te attho, dassāmi avikampito.

34.

‘‘‘Gajjitaṃ kho tayā deva, micchā taṃ bahu gajjitaṃ;

Jānissāmi tuvaṃ ajja, sabbadhamme ³² patiṭṭhitaṃ.

35.

‘‘‘Atibāḷhaṃ nipīḷesi, dadamānassa me sato;

Kiṃ te me pīḷitenattho, patthitaṃ te kathehi me.

36.

‘‘‘Icchāmahaṃ mahārāja, buddhaseṭṭhaṃ anuttaraṃ;

Bhojayissāmi sambuddhaṃ, vajjaṃ ³⁴ me māhu jīvitaṃ.

37.

‘‘‘Aññaṃ tehaṃ varaṃ dammi, mā yācittho tathāgataṃ ³⁶;

Adeyyo kassaci buddho, maṇi jotiraso yathā.

38.

‘‘‘Nanu te gajjitaṃ deva, yāva jīvitamattano ³⁸;

Jīvitaṃ ⁴⁰ dadamānena, yuttaṃ dātuṃ tathāgataṃ.

39.

‘‘‘Ṭhapanīyo mahāvīro, adeyyo kassaci jino;

Na me paṭissuto buddho, varassu amitaṃ dhanaṃ.

40.

‘‘‘Vinicchayaṃ pāpuṇāma, pucchissāma vinicchaye;

Yathāsaṇṭhaṃ ⁴² kathessanti, paṭipucchāma taṃ tathā.

41.

‘‘‘Rañño hatthe gahetvāna, agamāsiṃ vinicchayaṃ;

Purato akkhadassānaṃ, idaṃ vacanamabraviṃ.

42.

‘‘‘Suṇantu me akkhadassā, rājā varamadāsi me;

Na kiñci ṭhapayitvāna, jīvitampi ⁴⁴ pavārayi.

43.

‘‘‘Tassa me varadinnassa, buddhaseṭṭhaṃ variṃ ahaṃ;

Sudinno hoti me buddho, chindatha saṃsayaṃ mama.

44.

‘‘‘Sossāma tava vacanaṃ, bhūmipālassa rājino;

Ubhinnaṃ vacanaṃ sutvā, chindissāmettha saṃsayaṃ.

45.

‘‘‘Sabbaṃ deva tayā dinnaṃ, imassa sabbagāhikaṃ ⁴⁶;

Na kiñci ṭhapayitvāna, jīvitampi pavārayi.

46.

‘‘‘Kicchappattova hutvāna, yācī varamanuttaraṃ ⁴⁸;

Imaṃ sudukkhitaṃ ñatvā, adāsiṃ sabbagāhikaṃ.

47.

‘‘‘Parājayo tuvaṃ ⁵⁰ deva, assa deyyo tathāgato;

Ubhinnaṃ saṃsayo chinno, yathāsaṇṭhamhi ⁵² tiṭṭhatha.

48.

‘‘‘Rājā tattheva ṭhatvāna, akkhadassetadabravi;

Sammā mayhampi deyyātha, puna buddhaṃ labhāmahaṃ.

49.

‘‘‘Pūretvā tava saṅkappaṃ, bhojayitvā tathāgataṃ;

Puna deyyāsi ⁵⁴ sambuddhaṃ, ānandassa yasassino’.

(Nimantanakathā)

50.

‘‘Akkhadassebhivādetvā, ānandañcāpi khattiyaṃ;

Tuṭṭho pamudito hutvā, sambuddhamupasaṅkamiṃ.

51.

‘‘Upasaṅkamma sambuddhaṃ, oghatiṇṇamanāsavaṃ;

Sirasā abhivādetvā, idaṃ vacanamabraviṃ.

52.

‘Vasīsatasahassehi , adhivāsehi cakkhuma;

Hāsayanto mama cittaṃ, nivesanamupehi me’.

53.

‘‘Padumuttaro lokavidū, āhutīnaṃ paṭiggaho;

Mama saṅkappamaññāya, adhivāsesi cakkhumā.

54.

‘‘Adhivāsanamaññāya, abhivādiya satthuno;

Haṭṭho udaggacittohaṃ, nivesanamupāgamiṃ.

(Dānapaṭiyādanaṃ)

55.

‘‘Mittāmacce samānetvā, idaṃ vacanamabraviṃ;

‘Sudullabho mayā laddho, maṇi jotiraso yathā.

56.

‘‘‘Kena taṃ pūjayissāma, appameyyo anūpamo;

Atulo asamo dhīro, jino appaṭipuggalo.

57.

‘‘‘Tathāsamasamo ceva, adutiyo narāsabho;

Dukkaraṃ adhikārañhi, buddhānucchavikaṃ mayā.

58.

‘‘‘Nānāpupphe samānetvā, karoma pupphamaṇḍapaṃ;

Buddhānucchavikaṃ etaṃ, sabbapūjā bhavissati’.

59.

‘‘Uppalaṃ padumaṃ vāpi, vassikaṃ adhimuttakaṃ ⁵⁶;

Campakaṃ ⁵⁸ nāgapupphañca, maṇḍapaṃ kārayiṃ ahaṃ.

60.

‘‘Satāsanasahassāni, chattacchāyāya paññapiṃ;

Pacchimaṃ āsanaṃ mayhaṃ, adhikaṃ satamagghati.

61.

‘‘Satāsanasahassāni, chattacchāyāya paññapiṃ;

Paṭiyādetvā annapānaṃ, kālaṃ ārocayiṃ ahaṃ.

62.

‘‘Ārocitamhi kālamhi, padumuttaro mahāmuni;

Vasīsatasahassehi, nivesanamupesi me.

63.

‘‘Dhārentaṃ uparicchattaṃ ⁶⁰, suphullapupphamaṇḍape;

Vasīsatasahassehi, nisīdi purisuttamo.

64.

‘‘‘Chattasatasahassāni, satasahassamāsanaṃ;

Kappiyaṃ anavajjañca, paṭigaṇhāhi cakkhuma’.

65.

‘‘Padumuttaro lokavidū, āhutīnaṃ paṭiggaho;

Mamaṃ tāretukāmo so, sampaṭicchi mahāmuni.

(Dānakathā)

66.

‘‘Bhikkhuno ekamekassa, paccekaṃ pattamadāsahaṃ;

Jahiṃsu sumbhakaṃ ⁶² pattaṃ, lohapattaṃ adhārayuṃ.

67.

‘‘Sattarattindivaṃ buddho, nisīdi pupphamaṇḍape;

Bodhayanto bahū satte, dhammacakkaṃ pavattayi.

68.

‘‘Dhammacakkaṃ pavattento, heṭṭhato pupphamaṇḍape;

Cullāsītisahassānaṃ , dhammābhisamayo ahu.

69.

‘‘Sattame divase patte, padumuttaro mahāmuni;

Chattacchāyāyamāsīno, imā gāthā abhāsatha.

(Byākaraṇaṃ)

70.

‘‘‘Anūnakaṃ dānavaraṃ, yo me pādāsi māṇavo;

Tamahaṃ kittayissāmi, suṇātha mama bhāsato.

71.

‘‘‘Hatthī assā rathā pattī, senā ca caturaṅginī;

Parivāressantimaṃ ⁶⁴ niccaṃ, sabbadānassidaṃ phalaṃ.

72.

‘‘‘Hatthiyānaṃ assayānaṃ, sivikā sandamānikā;

Upaṭṭhissantimaṃ niccaṃ, sabbadānassidaṃ phalaṃ.

73.

‘‘‘Saṭṭhi rathasahassāni, sabbālaṅkārabhūsitā;

Parivāressantimaṃ niccaṃ, sabbadānassidaṃ phalaṃ.

74.

‘‘‘Saṭṭhi tūriyasahassāni, bheriyo samalaṅkatā;

Vajjayissantimaṃ niccaṃ, sabbadānassidaṃ phalaṃ.

75.

‘‘‘Chaḷāsītisahassāni, nāriyo samalaṅkatā;

Vicittavatthābharaṇā, āmukkamaṇikuṇḍalā ⁶⁶.

76.

‘‘‘Aḷārapamhā hasulā, susaññā tanumajjhimā;

Parivāressantimaṃ niccaṃ, sabbadānassidaṃ phalaṃ.

77.

‘‘‘Tiṃsakappasahassāni, devaloke ramissati;

Sahassakkhattuṃ devindo, devarajjaṃ karissati.

78.

‘‘‘Sahassakkhattuṃ rājā ca, cakkavattī bhavissati;

Padesarajjaṃ vipulaṃ, gaṇanāto asaṅkhiyaṃ.

79.

‘‘‘Devaloke vasantassa, puññakammasamaṅgino;

Devalokapariyantaṃ, ratanachattaṃ dharissati.

80.

‘‘‘Icchissati yadā chāyaṃ ⁶⁸, chadanaṃ dussapupphajaṃ;

Imassa cittamaññāya, nibaddhaṃ chādayissati.

81.

‘‘‘Devalokā cavitvāna, sukkamūlena codito;

Puññakammena saṃyutto, brahmabandhu bhavissati.

82.

‘‘‘Kappasatasahassamhi, okkākakulasambhavo;

Gotamo nāma gottena ⁷⁰, satthā loke bhavissati.

83.

‘‘‘Sabbametaṃ abhiññāya, gotamo sakyapuṅgavo;

Bhikkhusaṅghe nisīditvā, etadagge ṭhapessati.

84.

‘‘‘Pilindavacchanāmena ⁷², hessati satthusāvako;

Devānaṃ asurānañca, gandhabbānañca sakkato.

85.

‘‘‘Bhikkhūnaṃ bhikkhunīnañca, gihīnañca tatheva so;

Piyo hutvāna sabbesaṃ, viharissatināsavo’.

(Dānānisaṃsakathā)

86.

‘‘Satasahasse kataṃ kammaṃ, phalaṃ dassesi me idha;

Sumutto saravegova, kilese jhāpayī mama ⁷⁴.

87.

‘‘Aho me sukataṃ kammaṃ, puññakkhette anuttare;

Yattha kāraṃ karitvāna, pattomhi acalaṃ padaṃ.

88.

‘‘Anūnakaṃ dānavaraṃ, adāsi yo ⁷⁶ hi māṇavo;

Ādipubbaṅgamo āsi, tassa dānassidaṃ phalaṃ.

(1. Chattānisaṃso)

89.

‘‘Chatte ca sugate datvā ⁷⁸, saṅghe gaṇavaruttame;

Aṭṭhānisaṃse anubhomi, kammānucchavike mama.

90.

‘‘Sītaṃ uṇhaṃ na jānāmi, rajojallaṃ na limpati;

Anupaddavo anīti ca, homi apacito sadā.

91.

‘‘Sukhumacchaviko homi, visadaṃ hoti mānasaṃ;

Chattasatasahassāni, bhave saṃsarato mama.

92.

‘‘Sabbālaṅkārayuttāni , tassa kammassa vāhasā;

Imaṃ jātiṃ ṭhapetvāna, matthake dhārayanti me.

93.

‘‘Kasmā ⁸⁰ imāya jātiyā, natthi me chattadhāraṇā;

Mama sabbaṃ kataṃ kammaṃ, vimuttichattapattiyā.

(2. Dussānisaṃso)

94.

‘‘Dussāni sugate datvā, saṅghe gaṇavaruttame;

Aṭṭhānisaṃse anubhomi, kammānucchavike mama.

95.

‘‘Suvaṇṇavaṇṇo virajo, sappabhāso patāpavā;

Siniddhaṃ hoti me gattaṃ, bhave saṃsarato mama.

96.

‘‘Dussasatasahassāni, setā pītā ca lohitā;

Dhārenti matthake mayhaṃ, dussadānassidaṃ phalaṃ.

97.

‘‘Koseyyakambaliyāni, khomakappāsikāni ca;

Sabbattha paṭilabhāmi, tesaṃ nissandato ahaṃ.

(3. Pattānisaṃso)

98.

‘‘Patte sugate datvāna, saṅghe gaṇavaruttame;

Dasānisaṃse anubhomi, kammānucchavike mama.

99.

‘‘Suvaṇṇathāle maṇithāle, rajatepi ca thālake;

Lohitaṅgamaye thāle, paribhuñjāmi sabbadā.

100.

‘‘Anupaddavo anīti ca, homi apacito sadā;

Lābhī annassa pānassa, vatthassa sayanassa ca.

101.

‘‘Na vinassanti me bhogā, ṭhitacitto bhavāmahaṃ;

Dhammakāmo sadā homi, appakleso anāsavo.

102.

‘‘Devaloke manusse vā, anubandhā ime guṇā;

Chāyā yathāpi rukkhassa, sabbattha na jahanti maṃ.

(4. Vāsiānisaṃso)

103.

‘‘Cittabandhanasambaddhā ⁸², sukatā vāsiyo bahū;

Datvāna buddhaseṭṭhassa, saṅghassa ca tathevahaṃ.

104.

‘‘Aṭṭhānisaṃse anubhomi, kammānucchavike mama;

Sūro homavisārī ca, vesārajjesu pāramī.

105.

‘‘Dhitivīriyavā homi, paggahītamano sadā;

Kilesacchedanaṃ ñāṇaṃ, sukhumaṃ atulaṃ suciṃ;

Sabbattha paṭilabhāmi, tassa nissandato ahaṃ.

(5. Satthakānisaṃso)

106.

‘‘Akakkase apharuse, sudhote satthake bahū;

Pasannacitto datvāna, buddhe saṅghe tatheva ca.

107.

‘‘Pañcānisaṃse anubhomi, kammānucchavike mama;

Kalyāṇamittaṃ ⁸⁴ vīriyaṃ, khantiñca mettasatthakaṃ.

108.

‘‘Taṇhāsallassa chinnattā, paññāsatthaṃ anuttaraṃ;

Vajirena samaṃ ñāṇaṃ, tesaṃ nissandato labhe.

(6. Sūciānisaṃso)

109.

‘‘Sūciyo sugate datvā, saṅghe gaṇavaruttame;

Pañcānisaṃse anubhomi, kammānucchavike mama.

110.

‘‘Na saṃsayo kaṅkhacchedo, abhirūpo ca bhogavā;

Tikkhapañño sadā homi, saṃsaranto bhavābhave.

111.

‘‘Gambhīraṃ nipuṇaṃ ṭhānaṃ, atthaṃ ñāṇena passayiṃ;

Vajiraggasamaṃ ñāṇaṃ, hoti me tamaghātanaṃ.

(7. Nakhacchedanānisaṃso)

112.

‘‘Nakhacchedane sugate, datvā saṅghe gaṇuttame;

Pañcānisaṃse anubhomi, kammānucchavike mama.

113.

‘‘Dāsidāse ⁸⁷ gavasse ca, bhatake nāṭake ⁸⁸ bahū;

Nhāpite bhattake sūde, sabbattheva labhāmahaṃ.

(8. Vidhūpanatālavaṇṭānisaṃso)

114.

‘‘Vidhūpane sugate datvā, tālavaṇṭe ca sobhaṇe;

Aṭṭhānisaṃse anubhomi, kammānucchavike mama.

115.

‘‘Sītaṃ uṇhaṃ na jānāmi, pariḷāho na vijjati;

Darathaṃ nābhijānāmi, cittasantāpanaṃ mama.

116.

‘‘Rāgaggi dosamohaggi, mānaggi diṭṭhiaggi ca;

Sabbaggī nibbutā mayhaṃ, tassa nissandato mama.

(9. Morahattha-cāmaraṃ)

117.

‘‘Morahatthe cāmariyo, datvā saṅghe gaṇuttame;

Upasantakilesohaṃ, viharāmi anaṅgaṇo.

(10. Parissāvana-dhammakaraṃ)

118.

‘‘Parissāvane sugate, datvā dhammakaruttame ⁹⁰;

Pañcānisaṃse anubhomi, kammānucchavike mama.

119.

‘‘Sabbesaṃ samatikkamma, dibbaṃ āyuṃ labhāmahaṃ;

Appasayho sadā homi, corapaccatthikehi vā.

120.

‘‘Satthena vā visena vā, vihesampi na kubbate;

Antarāmaraṇaṃ natthi, tesaṃ nissandato mama.

(11. Teladhārānisaṃso)

121.

‘‘Teladhāre sugate datvā, saṅghe gaṇavaruttame;

Pañcānisaṃse anubhomi, kammānucchavike mama.

122.

‘‘Sucārurūpo subhaddo ⁹², susamuggatamānaso;

Avikkhittamano homi, sabbārakkhehi rakkhito.

(12. Sūcigharānisaṃso)

123.

‘‘Sūcighare sugate datvā, saṅghe gaṇavaruttame;

Tīṇānisaṃse anubhomi, kammānucchavike mama.

124.

‘‘Cetosukhaṃ kāyasukhaṃ, iriyāpathajaṃ sukhaṃ;

Ime guṇe paṭilabhe, tassa nissandato ahaṃ.

(13. Aṃsabaddhānisaṃso)

125.

‘‘Aṃsabaddhe jine datvā, saṅghe gaṇavaruttame;

Tīṇānisaṃse anubhomi, kammānucchavike mama.

126.

‘‘Saddhamme gādhaṃ ⁹⁴ vindāmi, sarāmi dutiyaṃ bhavaṃ;

Sabbattha succhavī homi, tassa nissandato ahaṃ.

(14. Kāyabandhanānisaṃso)

127.

‘‘Kāyabandhe jine datvā, saṅghe gaṇavaruttame;

Chānisaṃse anubhomi, kammānucchavike mama.

128.

‘‘Samādhīsu na kampāmi, vasī homi samādhisu;

Abhejjapariso homi, ādeyyavacano sadā.

129.

‘‘Upaṭṭhitasati homi, tāso mayhaṃ na vijjati;

Devaloke manusse vā, anubandhā ime guṇā.

(15. Ādhārakānisaṃso)

130.

‘‘Ādhārake jine datvā, saṅghe gaṇavaruttame;

Pañcavaṇṇehi dāyādo ⁹⁶, acalo homi kenaci.

131.

‘‘Ye keci me sutā dhammā, satiñāṇappabodhanā;

Dhatā ⁹⁸ me na vinassanti, bhavanti suvinicchitā.

(16. Bhājanānisaṃso)

132.

‘‘Bhājane paribhoge ca, datvā buddhe gaṇuttame;

Tīṇānisaṃse anubhomi, kammānucchavike mama.

133.

‘‘Soṇṇamaye maṇimaye, athopi phalikāmaye;

Lohitaṅgamaye ceva, labhāmi bhājane ahaṃ.

134.

‘‘Bhariyā dāsadāsī ¹⁰⁰ ca, hatthissarathapattike;

Itthī patibbatā ceva, paribhogāni sabbadā.

135.

‘‘Vijjā mantapade ceva, vividhe āgame bahū;

Sabbaṃ sippaṃ nisāmemi, paribhogāni sabbadā.

(17. Thālakānisaṃso)

136.

‘‘Thālake sugate datvā, saṅghe gaṇavaruttame;

Tīṇānisaṃse anubhomi, kammānucchavike mama.

137.

‘‘Soṇṇamaye maṇimaye, athopi phalikāmaye;

Lohitaṅgamaye ceva, labhāmi thālake ahaṃ.

138.

‘‘Asatthake ¹⁰² phalamaye, atho pokkharapattake;

Madhupānakasaṅkhe ca, labhāmi thālake ahaṃ.

139.

‘‘Vatte guṇe paṭipatti, ācārakiriyāsu ca;

Ime guṇe paṭilabhe, tassa nissandato ahaṃ.

(18. Bhesajjānisaṃso)

140.

‘‘Bhesajjaṃ sugate datvā, saṅghe gaṇavaruttame;

Dasānisaṃse anubhomi, kammānucchavike mama.

141.

‘‘Āyuvā balavā dhīro, vaṇṇavā yasavā sukhī;

Anupaddavo anīti ca, homi apacito sadā;

Na me piyaviyogatthi, tassa nissandato mama.

(19. Upāhanānisaṃso)

142.

‘‘Upāhane jine datvā, saṅghe gaṇavaruttame;

Tīṇānisaṃse anubhomi, kammānucchavike mama.

143.

‘‘Hatthiyānaṃ assayānaṃ, sivikā sandamānikā;

Saṭṭhisatasahassāni, parivārenti maṃ sadā.

144.

‘‘Maṇimayā tambamayā ¹⁰⁴, soṇṇarajatapādukā;

Nibbattanti paduddhāre, bhave saṃsarato mama.

145.

‘‘Niyāmaṃ sati dhāvanti ¹⁰⁷, āguācārasodhanaṃ ¹⁰⁸;

Ime guṇe paṭilabhe, tassa nissandato ahaṃ.

(20. Pādukānisaṃso)

146.

‘‘Pāduke sugate datvā, saṅghe gaṇavaruttame;

Iddhipādukamāruyha, viharāmi yadicchakaṃ.

(21. Udakapuñchanānisaṃso)

147.

‘‘Udakapucchanacoḷe , datvā buddhe gaṇuttame;

Pañcānisaṃse anubhomi, kammānucchavike mama.

148.

‘‘Suvaṇṇavaṇṇo virajo, sappabhāso patāpavā;

Siniddhaṃ hoti me gattaṃ, rajojallaṃ na limpati;

Ime guṇe paṭilabhe, tassa nissandato ahaṃ.

(22. Kattaradaṇḍānisaṃso)

149.

‘‘Kattaradaṇḍe sugate, datvā saṅghe gaṇuttame;

Chānisaṃse anubhomi, kammānucchavike mama.

150.

‘‘Puttā mayhaṃ bahū honti, tāso mayhaṃ na vijjati;

Appasayho sadā homi, sabbārakkhehi rakkhito;

Khalitampi ¹¹⁰ na jānāmi, abhantaṃ mānasaṃ mama.

(23. Osadhañjanānisaṃso)

151.

‘‘Osadhaṃ añjanaṃ datvā, buddhe saṅghe gaṇuttame;

Aṭṭhānisaṃse anubhomi, kammānucchavike mama.

152.

‘‘Visālanayano homi, setapīto ca lohito;

Anāvilapasannakkho, sabbarogavivajjito.

153.

‘‘Labhāmi dibbanayanaṃ, paññācakkhuṃ anuttaraṃ;

Ime guṇe paṭilabhe, tassa nissandato ahaṃ.

(24. Kuñcikānisaṃso)

154.

‘‘Kuñcike sugate datvā, saṅghe gaṇavaruttame;

Dhammadvāravivaraṇaṃ, labhāmi ñāṇakuñcikaṃ.

(25. Kuñcikāgharānisaṃso)

155.

‘‘Kuñcikānaṃ ghare datvā, buddhe saṅghe gaṇuttame;

Dvānisaṃse anubhomi, kammānucchavike mama;

Appakodho anāyāso, saṃsaranto bhave ahaṃ.

(26. Āyogānisaṃso)

156.

‘‘Āyoge sugate datvā, saṅghe gaṇavaruttame;

Pañcānisaṃse anubhomi, kammānucchavike mama.

157.

‘‘Samādhīsu na kampāmi, vasī homi samādhisu;

Abhejjapariso homi, ādeyyavacano sadā;

Jāyati bhogasampatti, bhave saṃsarato mama.

(27. Dhūmanettānisaṃso)

158.

‘‘Dhūmanette jine datvā, saṅghe gaṇavaruttame;

Tīṇānisaṃse anubhomi, kammānucchavike mama.

159.

‘‘Sati me ujukā hoti, susambandhā ca nhāravo;

Labhāmi dibbanayanaṃ ¹¹², tassa nissandato ahaṃ.

(28. Dīpadhārānisaṃso)

160.

‘‘Dīpadhāre ¹¹⁴ jine datvā, saṅghe gaṇavaruttame;

Tīṇānisaṃse anubhomi, kammānucchavike mama.

161.

‘‘Jātimā aṅgasampanno, paññavā buddhasammato ¹¹⁶;

Ime guṇe paṭilabhe, tassa nissandato ahaṃ.

(29. Tumbaka-karaṇḍo)

162.

‘‘Tumbake ca karaṇḍe ca, datvā buddhe gaṇuttame;

Dasānisaṃse anubhomi, kammānucchavike mama.

163.

‘‘Sugutto ¹¹⁸ sukhasamaṅgī, mahāyaso tathāgati;

Vipattivigato ¹²⁰ sukhumālo, sabbītiparivajjito.

164.

‘‘Vipule ca guṇe lābhī, samāva calanā mama;

Suvivajjitaubbego, tumbake ca karaṇḍake.

165.

‘‘Labhāmi caturo vaṇṇe, hatthissaratanāni ca;

Tāni me na vinassanti, tumbadāne idaṃ phalaṃ.

(30. Malaharaṇānisaṃso)

166.

‘‘Malaharaṇiyo ¹²² datvā, buddhe saṅghe gaṇuttame;

Pañcānisaṃse anubhomi, kammānucchavike mama.

167.

‘‘Sabbalakkhaṇasampanno, āyupaññāsamāhito;

Sabbāyāsavinimutto, kāyo me hoti sabbadā.

(31. Pipphalānisaṃso)

168.

‘‘Taṇudhāre sunisite, saṅghe datvāna pipphale;

Kilesakantanaṃ ñāṇaṃ, labhāmi atulaṃ suciṃ.

(32. Bhaṇḍāsānisaṃso)

169.

‘‘Saṇḍāse sugate datvā, saṅghe gaṇavaruttame;

Kilesabhañjanaṃ ¹²⁴ ñāṇaṃ, labhāmi atulaṃ suciṃ.

(33. Natthukānisaṃso)

170.

‘‘Natthuke ¹²⁶ sugate datvā, saṅghe gaṇavaruttame;

Aṭṭhānisaṃse anubhomi, kammānucchavike mama.

171.

‘‘Saddhaṃ sīlaṃ hiriñcāpi, atha ottappiyaṃ guṇaṃ;

Sutaṃ cāgañca khantiñca, paññaṃ me aṭṭhamaṃ guṇaṃ.

(34. Pīṭhakānisaṃso)

172.

‘‘Pīṭhake sugate datvā, saṅghe gaṇavaruttame;

Pañcānisaṃse anubhomi, kammānucchavike mama.

173.

‘‘Ucce kule pajāyāmi, mahābhogo bhavāmahaṃ;

Sabbe maṃ apacāyanti, kitti abbhuggatā mama.

174.

‘‘Kappasatasahassāni, pallaṅkā caturassakā;

Parivārenti maṃ niccaṃ, saṃvibhāgarato ahaṃ.

(35. Bhisiānisaṃso)

175.

‘‘Bhisiyo sugate datvā, saṅghe gaṇavaruttame;

Chānisaṃse anubhomi, kammānucchavike mama.

176.

‘‘Samasugattopacito, muduko cārudassano;

Labhāmi ñāṇaparivāraṃ, bhisidānassidaṃ phalaṃ.

177.

‘‘Tūlikā vikatikāyo, kaṭṭissā ¹²⁸ cittakā bahū;

Varapotthake kambale ca, labhāmi vividhe ahaṃ.

178.

‘‘Pāvārike ca muduke, mudukājinaveṇiyo;

Labhāmi vividhatthāre ¹³⁰, bhisidānassidaṃ phalaṃ.

179.

‘‘Yato sarāmi attānaṃ, yato pattosmi viññutaṃ;

Atuccho jhānamañcomhi, bhisidānassidaṃ phalaṃ.

(36. Bibbohanānisaṃso)

180.

‘‘Bibbohane jine datvā, saṅghe gaṇavaruttame;

Chānisaṃse anubhomi, kammānucchavike mama.

181.

‘‘Uṇṇike padumake ca, atho lohitacandane;

Bibbohane upādhemi, uttamaṅgaṃ sadā mama.

182.

‘‘Aṭṭhaṅgike maggavare, sāmaññe caturo phale;

Tesu ñāṇaṃ uppādetvā ¹³², vihare niccakālikaṃ.

183.

‘‘Dāne dame saṃyame ca, appamaññāsu rūpisu;

Tesu ñāṇaṃ uppādetvā ¹³⁴, vihare sabbakālikaṃ.

184.

‘‘Vatte guṇe paṭipatti, ācārakiriyāsu ca;

Tesu ñāṇaṃ uppādetvā ¹³⁶, vihare sabbadā ahaṃ.

185.

‘‘Caṅkame vā padhāne vā, vīriye bodhipakkhiye;

Tesu ñāṇaṃ uppādetvā, viharāmi yadicchakaṃ.

186.

‘‘Sīlaṃ samādhi paññā ca, vimutti ca anuttarā;

Tesu ñāṇaṃ uppādetvā ¹³⁸, viharāmi sukhaṃ ahaṃ.

(37. Phalapīṭhānisaṃso)

187.

‘‘Phalapīṭhe ¹⁴⁰ jine datvā, saṅghe gaṇavaruttame;

Dvānisaṃse anubhomi, kammānucchavike mama.

188.

‘‘Soṇṇamaye maṇimaye, dantasāramaye bahū;

Pallaṅkaseṭṭhe vindāmi, phalapīṭhassidaṃ phalaṃ.

(38. Pādapīṭhānisaṃso)

189.

‘‘Pādapīṭhe jine datvā, saṅghe gaṇavaruttame;

Dvānisaṃse anubhomi, kammānucchavike mama;

Labhāmi bahuke yāne, pādapīṭhassidaṃ phalaṃ.

190.

‘‘Dāsī dāsā ca bhariyā, ye caññe anujīvino;

Sammā paricarante maṃ, pādapīṭhassidaṃ phalaṃ.

(39. Telabbhañjanānisaṃso)

191.

‘‘Telaabbhañjane ¹⁴² datvā, saṅghe gaṇavaruttame;

Pañcānisaṃse anubhomi, kammānucchavike mama.

192.

‘‘Abyādhitā rūpavatā, khippaṃ dhammanisantitā;

Lābhitā annapānassa, āyupañcamakaṃ mama.

(40. Sappitelānisaṃso)

193.

‘‘Sappitelañca datvāna, saṅghe gaṇavaruttame;

Pañcānisaṃse anubhomi, kammānucchavike mama.

194.

‘‘Thāmavā rūpasampanno, pahaṭṭhatanujo sadā;

Abyādhi visado homi, sappitelassidaṃ phalaṃ.

(41. Mukhasodhanakānisaṃso)

195.

‘‘Mukhasodhanakaṃ datvā, buddhe saṅghe gaṇuttame;

Pañcānisaṃse anubhomi, kammānucchavike mama.

196.

‘‘Visuddhakaṇṭho madhurassaro, kāsasāsavivajjito;

Uppalagandho mukhato, upavāyati me sadā.

(42. Dadhiānisaṃso)

197.

‘‘Dadhiṃ datvāna sampannaṃ, buddhe saṅghe gaṇuttame;

Bhuñjāmi amataṃ bhattaṃ ¹⁴⁴, varaṃ kāyagatāsatiṃ.

(43. Madhuānisaṃso)

198.

‘‘Vaṇṇagandharasopetaṃ, madhuṃ datvā jine gaṇe;

Anūpamaṃ atuliyaṃ, pive muttirasaṃ ahaṃ.

(44.Rasānisaṃso)

199.

‘‘Yathābhūtaṃ rasaṃ datvā, buddhe saṅghe gaṇuttame;

Caturo phale anubhomi, kammānucchavike mama.

(45. Annapānānisaṃso)

200.

‘‘Annaṃ pānañca datvāna, buddhe saṅghe gaṇuttame;

Dasānisaṃse anubhomi, kammānucchavike mama.

201.

‘‘Āyuvā balavā dhīro, vaṇṇavā yasavā sukhī;

Lābhī annassa pānassa, sūro paññāṇavā sadā;

Ime guṇe paṭilabhe, saṃsaranto bhave ahaṃ.

(46. Dhūpānisaṃso)

202.

‘‘Dhūpaṃ ¹⁴⁶ datvāna sugate, saṅghe gaṇavaruttame;

Dasānisaṃse anubhomi, kammānucchavike mama.

203.

‘‘Sugandhadeho yasavā, sīghapañño ca kittimā;

Tikkhapañño bhūripañño, hāsagambhīrapaññavā.

204.

‘‘Vepullajavanapañño , saṃsaranto bhavābhave;

Tasseva vāhasā dāni, patto santisukhaṃ sivaṃ.

(Sādhāraṇānisaṃso)

205.

‘‘Kilesā jhāpitā mayhaṃ, bhavā sabbe samūhatā;

Nāgova bandhanaṃ chetvā, viharāmi anāsavo.

206.

‘‘Svāgataṃ vata me āsi, mama buddhassa santike ¹⁴⁸;

Tisso vijjā anuppattā, kataṃ buddhassa sāsanaṃ.

207.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā pilindavaccho thero imā gāthāyo abhāsitthāti.

Pilindavacchattherassāpadānaṃ paṭhamaṃ.