| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၂. ဖုသတိသုတ္တဝဏ္ဏနာ
2. Phusatisuttavaṇṇanā
၂၂. ကမ္မံ အဖုသန္တန္တိ ကမ္မဖသ္သံ အဖုသန္တံ, ကမ္မံ အကရောန္တန္တိ အတ္ထော။ ဝိပာကော န ဖုသတီတိ ဝိပာကဖသ္သော န ဖုသတိ, ဝိပာကော န ဥပ္ပဇ္ဇတေဝ ကာရဏသ္သ အဘာဝတော။ ဧဝံ ဗ္ယတိရေကမုခေန ကမ္မဝဋ္ဋေန ဝိပာကဝဋ္ဋံ သမ္ဗန္ဓံ ကတ္ဝာ အတ္ထံ ဝတ္ဝာ ဣဒာနိ ကေဝလံ ကမ္မဝဋ္ဋဝသေန အတ္ထံ ဝဒန္တော ‘‘ကမ္မမေဝာ’’တိအာဒိမာဟ။ တတ္ထ နာကရောတော ကရိယတီတိ ကမ္မံ အကုဗ္ဗတော န ကယိရတိ, အနဘိသန္ဓိကတကမ္မံ နာမ နတ္ထီတိ အတ္ထော။ ဣဒာနိ တမေဝတ္ထံ အန္ဝယတော ဒသ္သေတုံ ‘‘ဖုသန္တဉ္စာ’’တိအာဒိ ဝုတ္တံ။ တတ္ထ တတောတိ ဖုသနဟေတု။ သေသံ ဝုတ္တနယမေဝ။ ဝုတ္တမေဝတ္ထံ သကာရဏံ ကတ္ဝာ ပရိဝေဌိတဝသေန ဝိဘူတံ ကတ္ဝာ ဒသ္သေတုံ ‘‘တသ္မာ ဖုသန္တ’’န္တိအာဒိ ဝုတ္တံ။ ဓမ္မတာတိ ကာရကသ္သေဝ ကမ္မဝိပာကာနုဗန္ဓော, နာကာရကသ္သာတိ အယံ ကမ္မဝိပာကာနံ သဘာဝော။
22.Kammaṃ aphusantanti kammaphassaṃ aphusantaṃ, kammaṃ akarontanti attho. Vipāko na phusatīti vipākaphasso na phusati, vipāko na uppajjateva kāraṇassa abhāvato. Evaṃ byatirekamukhena kammavaṭṭena vipākavaṭṭaṃ sambandhaṃ katvā atthaṃ vatvā idāni kevalaṃ kammavaṭṭavasena atthaṃ vadanto ‘‘kammamevā’’tiādimāha. Tattha nākaroto kariyatīti kammaṃ akubbato na kayirati, anabhisandhikatakammaṃ nāma natthīti attho. Idāni tamevatthaṃ anvayato dassetuṃ ‘‘phusantañcā’’tiādi vuttaṃ. Tattha tatoti phusanahetu. Sesaṃ vuttanayameva. Vuttamevatthaṃ sakāraṇaṃ katvā pariveṭhitavasena vibhūtaṃ katvā dassetuṃ ‘‘tasmā phusanta’’ntiādi vuttaṃ. Dhammatāti kārakasseva kammavipākānubandho, nākārakassāti ayaṃ kammavipākānaṃ sabhāvo.
ပစ္စေတိ ဥပဂစ္ဆတိ အနုဗန္ဓတိ။ ပာပန္တိ ပာပကံ ကမ္မံ ဖလဉ္စ။ အယဉ္စ အတ္ထော အရညေ လုဒ္ဒကသ္သ ဥယ္ယောဇနာယ သုနခေဟိ ပရိဝာရိယမာနသ္သ ဘိက္ခုနော ဘယေန ရုက္ခံ အာရုဠ္ဟသ္သ စီဝရေ လုဒ္ဒသ္သ ဥပရိ ပတိတေ တသ္သ သုနခေဟိ ခာဒိတ္ဝာ မာရိတဝတ္ထုနာ ဒီပေတဗ္ဗောတိ။
Pacceti upagacchati anubandhati. Pāpanti pāpakaṃ kammaṃ phalañca. Ayañca attho araññe luddakassa uyyojanāya sunakhehi parivāriyamānassa bhikkhuno bhayena rukkhaṃ āruḷhassa cīvare luddassa upari patite tassa sunakhehi khāditvā māritavatthunā dīpetabboti.
ဖုသတိသုတ္တဝဏ္ဏနာ နိဋ္ဌိတာ။
Phusatisuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၂. ဖုသတိသုတ္တံ • 2. Phusatisuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၂. ဖုသတိသုတ္တဝဏ္ဏနာ • 2. Phusatisuttavaṇṇanā
