| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
២. ផុសតិសុត្តវណ្ណនា
2. Phusatisuttavaṇṇanā
២២. កម្មំ អផុសន្តន្តិ កម្មផស្សំ អផុសន្តំ, កម្មំ អករោន្តន្តិ អត្ថោ។ វិបាកោ ន ផុសតីតិ វិបាកផស្សោ ន ផុសតិ, វិបាកោ ន ឧប្បជ្ជតេវ ការណស្ស អភាវតោ។ ឯវំ ព្យតិរេកមុខេន កម្មវដ្ដេន វិបាកវដ្ដំ សម្ពន្ធំ កត្វា អត្ថំ វត្វា ឥទានិ កេវលំ កម្មវដ្ដវសេន អត្ថំ វទន្តោ ‘‘កម្មមេវា’’តិអាទិមាហ។ តត្ថ នាករោតោ ករិយតីតិ កម្មំ អកុព្ពតោ ន កយិរតិ, អនភិសន្ធិកតកម្មំ នាម នត្ថីតិ អត្ថោ។ ឥទានិ តមេវត្ថំ អន្វយតោ ទស្សេតុំ ‘‘ផុសន្តញ្ចា’’តិអាទិ វុត្តំ។ តត្ថ តតោតិ ផុសនហេតុ។ សេសំ វុត្តនយមេវ។ វុត្តមេវត្ថំ សការណំ កត្វា បរិវេឋិតវសេន វិភូតំ កត្វា ទស្សេតុំ ‘‘តស្មា ផុសន្ត’’ន្តិអាទិ វុត្តំ។ ធម្មតាតិ ការកស្សេវ កម្មវិបាកានុពន្ធោ, នាការកស្សាតិ អយំ កម្មវិបាកានំ សភាវោ។
22.Kammaṃ aphusantanti kammaphassaṃ aphusantaṃ, kammaṃ akarontanti attho. Vipāko na phusatīti vipākaphasso na phusati, vipāko na uppajjateva kāraṇassa abhāvato. Evaṃ byatirekamukhena kammavaṭṭena vipākavaṭṭaṃ sambandhaṃ katvā atthaṃ vatvā idāni kevalaṃ kammavaṭṭavasena atthaṃ vadanto ‘‘kammamevā’’tiādimāha. Tattha nākaroto kariyatīti kammaṃ akubbato na kayirati, anabhisandhikatakammaṃ nāma natthīti attho. Idāni tamevatthaṃ anvayato dassetuṃ ‘‘phusantañcā’’tiādi vuttaṃ. Tattha tatoti phusanahetu. Sesaṃ vuttanayameva. Vuttamevatthaṃ sakāraṇaṃ katvā pariveṭhitavasena vibhūtaṃ katvā dassetuṃ ‘‘tasmā phusanta’’ntiādi vuttaṃ. Dhammatāti kārakasseva kammavipākānubandho, nākārakassāti ayaṃ kammavipākānaṃ sabhāvo.
បច្ចេតិ ឧបគច្ឆតិ អនុពន្ធតិ។ បាបន្តិ បាបកំ កម្មំ ផលញ្ច។ អយញ្ច អត្ថោ អរញ្ញេ លុទ្ទកស្ស ឧយ្យោជនាយ សុនខេហិ បរិវារិយមានស្ស ភិក្ខុនោ ភយេន រុក្ខំ អារុឡ្ហស្ស ចីវរេ លុទ្ទស្ស ឧបរិ បតិតេ តស្ស សុនខេហិ ខាទិត្វា មារិតវត្ថុនា ទីបេតព្ពោតិ។
Pacceti upagacchati anubandhati. Pāpanti pāpakaṃ kammaṃ phalañca. Ayañca attho araññe luddakassa uyyojanāya sunakhehi parivāriyamānassa bhikkhuno bhayena rukkhaṃ āruḷhassa cīvare luddassa upari patite tassa sunakhehi khāditvā māritavatthunā dīpetabboti.
ផុសតិសុត្តវណ្ណនា និដ្ឋិតា។
Phusatisuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ២. ផុសតិសុត្តំ • 2. Phusatisuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ២. ផុសតិសុត្តវណ្ណនា • 2. Phusatisuttavaṇṇanā
