| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༡༠. ཕསྶམཱུལཀསུཏྟཾ
10. Phassamūlakasuttaṃ
༢༥༨. ‘‘ཏིསྶོ ཨིམཱ, བྷིཀྑཝེ, ཝེདནཱ ཕསྶཛཱ ཕསྶམཱུལཀཱ ཕསྶནིདཱནཱ ཕསྶཔཙྩཡཱ། ཀཏམཱ ཏིསྶོ? སུཁཱ ཝེདནཱ, དུཀྑཱ ཝེདནཱ, ཨདུཀྑམསུཁཱ ཝེདནཱ། སུཁཝེདནིཡཾ, བྷིཀྑཝེ, ཕསྶཾ པཊིཙྩ ཨུཔྤཛྫཏི སུཁཱ ཝེདནཱ། ཏསྶེཝ སུཁཝེདནིཡསྶ ཕསྶསྶ ནིརོདྷཱ, ཡཾ ཏཛྫཾ ཝེདཡིཏཾ སུཁཝེདནིཡཾ ཕསྶཾ པཊིཙྩ ཨུཔྤནྣཱ སུཁཱ ཝེདནཱ, སཱ ནིརུཛ྄ཛྷཏི, སཱ ཝཱུཔསམྨཏི། དུཀྑཝེདནིཡཾ, བྷིཀྑཝེ, ཕསྶཾ པཊིཙྩ ཨུཔྤཛྫཏི དུཀྑཱ ཝེདནཱ། ཏསྶེཝ དུཀྑཝེདནིཡསྶ ཕསྶསྶ ནིརོདྷཱ, ཡཾ ཏཛྫཾ ཝེདཡིཏཾ དུཀྑཝེདནིཡཾ ཕསྶཾ པཊིཙྩ ཨུཔྤནྣཱ དུཀྑཱ ཝེདནཱ, སཱ ནིརུཛ྄ཛྷཏི, སཱ ཝཱུཔསམྨཏི། ཨདུཀྑམསུཁཝེདནིཡཾ, བྷིཀྑཝེ, ཕསྶཾ པཊིཙྩ ཨུཔྤཛྫཏི ཨདུཀྑམསུཁཱ ཝེདནཱ། ཏསྶེཝ ཨདུཀྑམསུཁཝེདནིཡསྶ ཕསྶསྶ ནིརོདྷཱ, ཡཾ ཏཛྫཾ ཝེདཡིཏཾ ཨདུཀྑམསུཁཝེདནིཡཾ ཕསྶཾ པཊིཙྩ ཨུཔྤནྣཱ ཨདུཀྑམསུཁཱ ཝེདནཱ, སཱ ནིརུཛ྄ཛྷཏི, སཱ ཝཱུཔསམྨཏི། སེཡྻཐཱཔི , བྷིཀྑཝེ, དྭིནྣཾ ཀཊྛཱནཾ སངྒྷཊྚནསམོདྷཱནཱ 1 ཨུསྨཱ ཛཱཡཏི, ཏེཛོ ཨབྷིནིབྦཏྟཏི། ཏེསཾཡེཝ ཀཊྛཱནཾ ནཱནཱབྷཱཝཱ ཝིནིཀྑེཔཱ, ཡཱ ཏཛྫཱ ཨུསྨཱ, སཱ ནིརུཛ྄ཛྷཏི, སཱ ཝཱུཔསམྨཏི། ཨེཝམེཝ ཁོ, བྷིཀྑཝེ, ཨིམཱ ཏིསྶོ ཝེདནཱ ཕསྶཛཱ ཕསྶམཱུལཀཱ ཕསྶནིདཱནཱ ཕསྶཔཙྩཡཱ། ཏཛྫཾ ཕསྶཾ པཊིཙྩ ཏཛྫཱ ཝེདནཱ ཨུཔྤཛྫནྟི། ཏཛྫསྶ ཕསྶསྶ ནིརོདྷཱ ཏཛྫཱ ཝེདནཱ ནིརུཛ྄ཛྷནྟཱི’’ཏི། དསམཾ།
258. ‘‘Tisso imā, bhikkhave, vedanā phassajā phassamūlakā phassanidānā phassapaccayā. Katamā tisso? Sukhā vedanā, dukkhā vedanā, adukkhamasukhā vedanā. Sukhavedaniyaṃ, bhikkhave, phassaṃ paṭicca uppajjati sukhā vedanā. Tasseva sukhavedaniyassa phassassa nirodhā, yaṃ tajjaṃ vedayitaṃ sukhavedaniyaṃ phassaṃ paṭicca uppannā sukhā vedanā, sā nirujjhati, sā vūpasammati. Dukkhavedaniyaṃ, bhikkhave, phassaṃ paṭicca uppajjati dukkhā vedanā. Tasseva dukkhavedaniyassa phassassa nirodhā, yaṃ tajjaṃ vedayitaṃ dukkhavedaniyaṃ phassaṃ paṭicca uppannā dukkhā vedanā, sā nirujjhati, sā vūpasammati. Adukkhamasukhavedaniyaṃ, bhikkhave, phassaṃ paṭicca uppajjati adukkhamasukhā vedanā. Tasseva adukkhamasukhavedaniyassa phassassa nirodhā, yaṃ tajjaṃ vedayitaṃ adukkhamasukhavedaniyaṃ phassaṃ paṭicca uppannā adukkhamasukhā vedanā, sā nirujjhati, sā vūpasammati. Seyyathāpi , bhikkhave, dvinnaṃ kaṭṭhānaṃ saṅghaṭṭanasamodhānā 2 usmā jāyati, tejo abhinibbattati. Tesaṃyeva kaṭṭhānaṃ nānābhāvā vinikkhepā, yā tajjā usmā, sā nirujjhati, sā vūpasammati. Evameva kho, bhikkhave, imā tisso vedanā phassajā phassamūlakā phassanidānā phassapaccayā. Tajjaṃ phassaṃ paṭicca tajjā vedanā uppajjanti. Tajjassa phassassa nirodhā tajjā vedanā nirujjhantī’’ti. Dasamaṃ.
སགཱཐཱཝགྒོ པཋམོ །
Sagāthāvaggo paṭhamo .
ཏསྶུདྡཱནཾ –
Tassuddānaṃ –
སམཱདྷི སུཁཾ པཧཱནེན, པཱཏཱལཾ དཊྛབྦེན ཙ།
Samādhi sukhaṃ pahānena, pātālaṃ daṭṭhabbena ca;
སལླེན ཙེཝ གེལཉྙཱ, ཨནིཙྩ ཕསྶམཱུལཀཱཏི༎
Sallena ceva gelaññā, anicca phassamūlakāti.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡༠. ཕསྶམཱུལཀསུཏྟཝཎྞནཱ • 10. Phassamūlakasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡༠. ཕསྶམཱུལཀསུཏྟཝཎྞནཱ • 10. Phassamūlakasuttavaṇṇanā
