| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
4. ப²ருஸவாசாபா⁴வபஞ்ஹோ
4. Pharusavācābhāvapañho
4. ‘‘ப⁴ந்தே நாக³ஸேன, பா⁴ஸிதம்பேதங் தே²ரேன ஸாரிபுத்தேன த⁴ம்மஸேனாபதினா ‘பரிஸுத்³த⁴வசீஸமாசாரோ ஆவுஸோ ததா²க³தோ, நத்தி² ததா²க³தஸ்ஸ வசீது³ச்சரிதங், யங் ததா²க³தோ ரக்கெ²ய்ய ‘மா மே இத³ங் பரோ அஞ்ஞாஸீ’தி. புன ச ததா²க³தோ தே²ரஸ்ஸ ஸுதி³ன்னஸ்ஸ கலந்த³புத்தஸ்ஸ அபராதே⁴ பாராஜிகங் பஞ்ஞபெந்தோ ப²ருஸாஹி வாசாஹி மோக⁴புரிஸவாதே³ன ஸமுதா³சரி, தேன ச ஸோ தே²ரோ மோக⁴புரிஸவாதே³ன மங்குசித்தவஸேன ருந்தி⁴தத்தா விப்படிஸாரீ நாஸக்கி² அரியமக்³க³ங் படிவிஜ்ஜி²துங். யதி³, ப⁴ந்தே நாக³ஸேன, பரிஸுத்³த⁴வசீஸமாசாரோ ததா²க³தோ, நத்தி² ததா²க³தஸ்ஸ வசீது³ச்சரிதங், தேன ஹி ததா²க³தேன தே²ரஸ்ஸ ஸுதி³ன்னஸ்ஸ கலந்த³புத்தஸ்ஸ அபராதே⁴ மோக⁴புரிஸவாதே³ன ஸமுதா³சிண்ணந்தி யங் வசனங், தங் மிச்சா². யதி³ ப⁴க³வதா தே²ரஸ்ஸ ஸுதி³ன்னஸ்ஸ கலந்த³புத்தஸ்ஸ அபராதே⁴ மோக⁴புரிஸவாதே³ன ஸமுதா³சிண்ணங், தேன ஹி பரிஸுத்³த⁴வசீஸமாசாரோ ததா²க³தோ, நத்தி² ததா²க³தஸ்ஸ வசீது³ச்சரிதந்தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
4. ‘‘Bhante nāgasena, bhāsitampetaṃ therena sāriputtena dhammasenāpatinā ‘parisuddhavacīsamācāro āvuso tathāgato, natthi tathāgatassa vacīduccaritaṃ, yaṃ tathāgato rakkheyya ‘mā me idaṃ paro aññāsī’ti. Puna ca tathāgato therassa sudinnassa kalandaputtassa aparādhe pārājikaṃ paññapento pharusāhi vācāhi moghapurisavādena samudācari, tena ca so thero moghapurisavādena maṅkucittavasena rundhitattā vippaṭisārī nāsakkhi ariyamaggaṃ paṭivijjhituṃ. Yadi, bhante nāgasena, parisuddhavacīsamācāro tathāgato, natthi tathāgatassa vacīduccaritaṃ, tena hi tathāgatena therassa sudinnassa kalandaputtassa aparādhe moghapurisavādena samudāciṇṇanti yaṃ vacanaṃ, taṃ micchā. Yadi bhagavatā therassa sudinnassa kalandaputtassa aparādhe moghapurisavādena samudāciṇṇaṃ, tena hi parisuddhavacīsamācāro tathāgato, natthi tathāgatassa vacīduccaritanti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘பா⁴ஸிதம்பேதங், மஹாராஜ, தே²ரேன ஸாரிபுத்தேன த⁴ம்மஸேனாபதினா ‘பரிஸுத்³த⁴வசீஸமாசாரோ ஆவுஸோ ததா²க³தோ, நத்தி² ததா²க³தஸ்ஸ வசீது³ச்சரிதங், யங் ததா²க³தோ ரக்கெ²ய்ய ‘மா மே இத³ங் பரோ அஞ்ஞாஸீ’தி. ஆயஸ்மதோ ச ஸுதி³ன்னஸ்ஸ கலந்த³புத்தஸ்ஸ அபராதே⁴ பாராஜிகங் பஞ்ஞபெந்தேன ப⁴க³வதா மோக⁴புரிஸவாதே³ன ஸமுதா³சிண்ணங், தஞ்ச பன அது³ட்ட²சித்தேன அஸாரம்பே⁴ன யாதா²வலக்க²ணேன. கிஞ்ச தத்த² யாதா²வலக்க²ணங், யஸ்ஸ, மஹாராஜ, புக்³க³லஸ்ஸ இமஸ்மிங் அத்தபா⁴வே சதுஸச்சாபி⁴ஸமயோ ந ஹோதி, தஸ்ஸ புரிஸத்தனங் மோக⁴ங் அஞ்ஞங் கயிரமானங் அஞ்ஞேன ஸம்ப⁴வதி, தேன வுச்சதி ‘மோக⁴புரிஸோ’தி. இதி, மஹாராஜ, ப⁴க³வதா ஆயஸ்மதோ ஸுதி³ன்னஸ்ஸ கலந்த³புத்தஸ்ஸ ஸதாவவசனேன ஸமுதா³சிண்ணங், நோ அபூ⁴தவாதே³னா’’தி.
‘‘Bhāsitampetaṃ, mahārāja, therena sāriputtena dhammasenāpatinā ‘parisuddhavacīsamācāro āvuso tathāgato, natthi tathāgatassa vacīduccaritaṃ, yaṃ tathāgato rakkheyya ‘mā me idaṃ paro aññāsī’ti. Āyasmato ca sudinnassa kalandaputtassa aparādhe pārājikaṃ paññapentena bhagavatā moghapurisavādena samudāciṇṇaṃ, tañca pana aduṭṭhacittena asārambhena yāthāvalakkhaṇena. Kiñca tattha yāthāvalakkhaṇaṃ, yassa, mahārāja, puggalassa imasmiṃ attabhāve catusaccābhisamayo na hoti, tassa purisattanaṃ moghaṃ aññaṃ kayiramānaṃ aññena sambhavati, tena vuccati ‘moghapuriso’ti. Iti, mahārāja, bhagavatā āyasmato sudinnassa kalandaputtassa satāvavacanena samudāciṇṇaṃ, no abhūtavādenā’’ti.
‘‘ஸபா⁴வம்பி, ப⁴ந்தே நாக³ஸேன, யோ அக்கோஸந்தோ ப⁴ணதி, தஸ்ஸ மயங் கஹாபணங் த³ண்ட³ங் தா⁴ரேம, அபராதோ⁴ யேவ ஸோ வத்து²ங் நிஸ்ஸாய விஸுங் வோஹாரங் ஆசரந்தோ அக்கோஸதீ’’தி. ‘‘அத்தி² பன, மஹாராஜ, ஸுதபுப்³ப³ங் தயா க²லிதஸ்ஸ அபி⁴வாத³னங் வா பச்சுட்டா²னங் வா ஸக்காரங் வா உபாயனானுப்பதா³னங் வா’’தி? ‘‘ந ஹி, ப⁴ந்தே, யதோ குதோசி யத்த² கத்த²சி க²லிதோ, ஸோ பரிபா⁴ஸனாரஹோ ஹோதி தஜ்ஜனாரஹோ, உத்தமங்க³ம்பிஸ்ஸ சி²ந்த³ந்தி ஹனந்திபி ப³ந்த⁴ந்திபி கா⁴தெந்திபி ஜா²பெந்திபீ’’தி 1. ‘‘தேன ஹி, மஹாராஜ, ப⁴க³வதா கிரியா யேவ கதா, நோ அகிரியா’’தி.
‘‘Sabhāvampi, bhante nāgasena, yo akkosanto bhaṇati, tassa mayaṃ kahāpaṇaṃ daṇḍaṃ dhārema, aparādho yeva so vatthuṃ nissāya visuṃ vohāraṃ ācaranto akkosatī’’ti. ‘‘Atthi pana, mahārāja, sutapubbaṃ tayā khalitassa abhivādanaṃ vā paccuṭṭhānaṃ vā sakkāraṃ vā upāyanānuppadānaṃ vā’’ti? ‘‘Na hi, bhante, yato kutoci yattha katthaci khalito, so paribhāsanāraho hoti tajjanāraho, uttamaṅgampissa chindanti hanantipi bandhantipi ghātentipi jhāpentipī’’ti 2. ‘‘Tena hi, mahārāja, bhagavatā kiriyā yeva katā, no akiriyā’’ti.
‘‘கிரியம்பி, ப⁴ந்தே நாக³ஸேன, குருமானேன பதிரூபேன காதப்³ப³ங் அனுச்ச²விகேன, ஸவனேனபி, ப⁴ந்தே நாக³ஸேன, ததா²க³தஸ்ஸ ஸதே³வகோ லோகோ ஒத்தப்பதி ஹிரியதி பி⁴ய்யோ த³ஸ்ஸனேன ததுத்தரிங் உபஸங்கமனேன பயிருபாஸனேனா’’தி. ‘‘அபி நு கோ², மஹாராஜ, திகிச்ச²கோ அபி⁴ஸன்னே காயே குபிதே தோ³ஸே ஸினேஹனீயானி பே⁴ஸஜ்ஜானி தே³தீ’’தி? ‘‘ந ஹி, ப⁴ந்தே, திண்ஹானி லேக²னீயானி பே⁴ஸஜ்ஜானி தே³தீ’’தி. ‘‘ஏவமேவ கோ², மஹாராஜ, ததா²க³தோ ஸப்³ப³கிலேஸப்³யாதி⁴வூபஸமாய அனுஸிட்டி²ங் தே³தி, ப²ருஸாபி, மஹாராஜ, ததா²க³தஸ்ஸ வாசா ஸத்தே ஸினேஹயதி, முது³கே கரோதி. யதா², மஹாராஜ, உண்ஹம்பி உத³கங் யங் கிஞ்சி ஸினேஹனீயங் ஸினேஹயதி, முது³கங் கரோதி, ஏவமேவ கோ², மஹாராஜ, ப²ருஸாபி ததா²க³தஸ்ஸ வாசா அத்த²வதீ ஹோதி கருணாஸஹக³தா. யதா², மஹாராஜ, பிதுவசனங் புத்தானங் அத்த²வந்தங் ஹோதி கருணாஸஹக³தங், ஏவமேவ கோ², மஹாராஜ, ப²ருஸாபி ததா²க³தஸ்ஸ வாசா அத்த²வதீ ஹோதி கருணாஸஹக³தா. ப²ருஸாபி, மஹாராஜ, ததா²க³தஸ்ஸ வாசா ஸத்தானங் கிலேஸப்பஹானா 3 ஹோதி. யதா², மஹாராஜ, து³க்³க³ந்த⁴ம்பி கோ³முத்தங் பீதங் விரஸம்பி அக³த³ங் கா²யிதங் ஸத்தானங் ப்³யாதி⁴ங் ஹனதி, ஏவமேவ கோ², மஹாராஜ, ப²ருஸாபி ததா²க³தஸ்ஸ வாசா அத்த²வதீ கருணாஸஹக³தா. யதா², மஹாராஜ, மஹந்தோபி தூலபுஞ்ஜோ 4 பரஸ்ஸ காயே நிபதித்வா ருஜங் ந கரோதி, ஏவமேவ கோ², மஹாராஜ, ப²ருஸாபி ததா²க³தஸ்ஸ வாசா ந கஸ்ஸசி து³க்க²ங் உப்பாதே³தீ’’தி. ‘‘ஸுவினிச்சி²தோ, ப⁴ந்தே நாக³ஸேன, பஞ்ஹோ ப³ஹூஹி காரணேஹி, ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Kiriyampi, bhante nāgasena, kurumānena patirūpena kātabbaṃ anucchavikena, savanenapi, bhante nāgasena, tathāgatassa sadevako loko ottappati hiriyati bhiyyo dassanena tatuttariṃ upasaṅkamanena payirupāsanenā’’ti. ‘‘Api nu kho, mahārāja, tikicchako abhisanne kāye kupite dose sinehanīyāni bhesajjāni detī’’ti? ‘‘Na hi, bhante, tiṇhāni lekhanīyāni bhesajjāni detī’’ti. ‘‘Evameva kho, mahārāja, tathāgato sabbakilesabyādhivūpasamāya anusiṭṭhiṃ deti, pharusāpi, mahārāja, tathāgatassa vācā satte sinehayati, muduke karoti. Yathā, mahārāja, uṇhampi udakaṃ yaṃ kiñci sinehanīyaṃ sinehayati, mudukaṃ karoti, evameva kho, mahārāja, pharusāpi tathāgatassa vācā atthavatī hoti karuṇāsahagatā. Yathā, mahārāja, pituvacanaṃ puttānaṃ atthavantaṃ hoti karuṇāsahagataṃ, evameva kho, mahārāja, pharusāpi tathāgatassa vācā atthavatī hoti karuṇāsahagatā. Pharusāpi, mahārāja, tathāgatassa vācā sattānaṃ kilesappahānā 5 hoti. Yathā, mahārāja, duggandhampi gomuttaṃ pītaṃ virasampi agadaṃ khāyitaṃ sattānaṃ byādhiṃ hanati, evameva kho, mahārāja, pharusāpi tathāgatassa vācā atthavatī karuṇāsahagatā. Yathā, mahārāja, mahantopi tūlapuñjo 6 parassa kāye nipatitvā rujaṃ na karoti, evameva kho, mahārāja, pharusāpi tathāgatassa vācā na kassaci dukkhaṃ uppādetī’’ti. ‘‘Suvinicchito, bhante nāgasena, pañho bahūhi kāraṇehi, sādhu, bhante nāgasena, evametaṃ tathā sampaṭicchāmī’’ti.
ப²ருஸவாசாபா⁴வபஞ்ஹோ சதுத்தோ².
Pharusavācābhāvapañho catuttho.
Footnotes:
