| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā |
೧೨. ಫಲಞಾಣನಿದ್ದೇಸವಣ್ಣನಾ
12. Phalañāṇaniddesavaṇṇanā
೬೩. ಫಲಞಾಣನಿದ್ದೇಸೇ ತಂಪಯೋಗಪ್ಪಟಿಪ್ಪಸ್ಸದ್ಧತ್ತಾತಿ ತಸ್ಸ ಅಜ್ಝತ್ತಬಹಿದ್ಧಾ ವುಟ್ಠಾನಪಯೋಗಸ್ಸ ಪಟಿಪ್ಪಸ್ಸದ್ಧತ್ತಾ। ಮಗ್ಗೋ ಹಿ ಸಕಕ್ಖಣೇ ಕಿಲೇಸಪ್ಪಹಾನೇನ ಉಭತೋ ವುಟ್ಠಾನಪಯೋಗಂ ಕರೋತಿ ನಾಮ, ಫಲಕ್ಖಣೇ ಕಿಲೇಸಾನಂ ಪಹೀನತ್ತಾ ಮಗ್ಗಸ್ಸ ಉಭತೋ ವುಟ್ಠಾನಪಯೋಗೋ ಪಟಿಪ್ಪಸ್ಸದ್ಧೋ ವೂಪಸನ್ತೋ ನಾಮ ಹೋತಿ। ಉಪ್ಪಜ್ಜತೀತಿ ಮಗ್ಗಾನನ್ತರಂ ಸಕಿಂ ವಾ ದ್ವಿಕ್ಖತ್ತುಂ ವಾ ಉಪ್ಪಜ್ಜತಿ, ಫಲಸಮಾಪತ್ತಿಕಾಲೇ ಪನ ಬಹುಕ್ಖತ್ತುಂ, ನಿರೋಧಾ ವುಟ್ಠಹನ್ತಸ್ಸ ದ್ವಿಕ್ಖತ್ತುಂ ಉಪ್ಪಜ್ಜತಿ, ಸಬ್ಬಮ್ಪಿ ಹಿ ತಂ ಪಯೋಗಪ್ಪಟಿಪ್ಪಸ್ಸದ್ಧತ್ತಾ ಉಪ್ಪಜ್ಜತಿ। ಮಗ್ಗಸ್ಸೇತಂ ಫಲನ್ತಿ ಫಲಂ ಅಪೇಕ್ಖಿತ್ವಾ ನಪುಂಸಕವಚನಂ ಕತಂ। ಸಕದಾಗಾಮಿಮಗ್ಗಕ್ಖಣಾದೀಸುಪಿ ಏಕೇಕಮಗ್ಗಙ್ಗವಸೇನೇವ ವುಟ್ಠಾನಯೋಜನಾ ವೇದಿತಬ್ಬಾ।
63. Phalañāṇaniddese taṃpayogappaṭippassaddhattāti tassa ajjhattabahiddhā vuṭṭhānapayogassa paṭippassaddhattā. Maggo hi sakakkhaṇe kilesappahānena ubhato vuṭṭhānapayogaṃ karoti nāma, phalakkhaṇe kilesānaṃ pahīnattā maggassa ubhato vuṭṭhānapayogo paṭippassaddho vūpasanto nāma hoti. Uppajjatīti maggānantaraṃ sakiṃ vā dvikkhattuṃ vā uppajjati, phalasamāpattikāle pana bahukkhattuṃ, nirodhā vuṭṭhahantassa dvikkhattuṃ uppajjati, sabbampi hi taṃ payogappaṭippassaddhattā uppajjati. Maggassetaṃ phalanti phalaṃ apekkhitvā napuṃsakavacanaṃ kataṃ. Sakadāgāmimaggakkhaṇādīsupi ekekamaggaṅgavaseneva vuṭṭhānayojanā veditabbā.
ಫಲಞಾಣನಿದ್ದೇಸವಣ್ಣನಾ ನಿಟ್ಠಿತಾ।
Phalañāṇaniddesavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi / ೧೨. ಫಲಞಾಣನಿದ್ದೇಸೋ • 12. Phalañāṇaniddeso
