| Library / Tipiṭaka / තිපිටක • Tipiṭaka / සංයුත්තනිකාය • Saṃyuttanikāya |
30. පෙත්තිදෙවපෙත්තිවිසයසුත්තං
30. Pettidevapettivisayasuttaṃ
1201. …පෙ.… ‘‘එවමෙව ඛො, භික්ඛවෙ, අප්පකා තෙ සත්තා යෙ පෙත්තිවිසයා චුතා දෙවෙසු පච්චාජායන්ති; අථ ඛො එතෙව බහුතරා සත්තා යෙ පෙත්තිවිසයා චුතා පෙත්තිවිසයෙ පච්චාජායන්ති. තං කිස්ස හෙතු? අදිට්ඨත්තා භික්ඛවෙ, චතුන්නං අරියසච්චානං. කතමෙසං චතුන්නං ? දුක්ඛස්ස අරියසච්චස්ස, දුක්ඛසමුදයස්ස අරියසච්චස්ස, දුක්ඛනිරොධස්ස අරියසච්චස්ස, දුක්ඛනිරොධගාමිනියා පටිපදාය අරියසච්චස්ස’’.
1201. …Pe… ‘‘evameva kho, bhikkhave, appakā te sattā ye pettivisayā cutā devesu paccājāyanti; atha kho eteva bahutarā sattā ye pettivisayā cutā pettivisaye paccājāyanti. Taṃ kissa hetu? Adiṭṭhattā bhikkhave, catunnaṃ ariyasaccānaṃ. Katamesaṃ catunnaṃ ? Dukkhassa ariyasaccassa, dukkhasamudayassa ariyasaccassa, dukkhanirodhassa ariyasaccassa, dukkhanirodhagāminiyā paṭipadāya ariyasaccassa’’.
‘‘තස්මාතිහ , භික්ඛවෙ, ‘ඉදං දුක්ඛ’න්ති යොගො කරණීයො, ‘අයං දුක්ඛසමුදයො’ති යොගො කරණීයො, ‘අයං දුක්ඛනිරොධො’ති යොගො කරණීයො, ‘අයං දුක්ඛනිරොධගාමිනී පටිපදා’ති යොගො කරණීයො’’ති. ඉදමවොච භගවා. අත්තමනා තෙ භික්ඛූ භගවතො භාසිතං අභිනන්දුන්ති. තිංසතිමං.
‘‘Tasmātiha , bhikkhave, ‘idaṃ dukkha’nti yogo karaṇīyo, ‘ayaṃ dukkhasamudayo’ti yogo karaṇīyo, ‘ayaṃ dukkhanirodho’ti yogo karaṇīyo, ‘ayaṃ dukkhanirodhagāminī paṭipadā’ti yogo karaṇīyo’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Tiṃsatimaṃ.
පඤ්චගතිපෙය්යාලවග්ගො එකාදසමො.
Pañcagatipeyyālavaggo ekādasamo.
තස්සුද්දානං –
Tassuddānaṃ –
මනුස්සතො චුතා ඡාපි, දෙවා චුතා නිරයතො;
Manussato cutā chāpi, devā cutā nirayato;
තිරච්ඡානපෙත්තිවිසයා, තිංසමත්තො ගතිවග්ගොති.
Tiracchānapettivisayā, tiṃsamatto gativaggoti.
සච්චසංයුත්තං ද්වාදසමං.
Saccasaṃyuttaṃ dvādasamaṃ.
මහාවග්ගො පඤ්චමො.
Mahāvaggo pañcamo.
තස්සුද්දානං –
Tassuddānaṃ –
මග්ගබොජ්ඣඞ්ගං සතියා, ඉන්ද්රියං සම්මප්පධානං;
Maggabojjhaṅgaṃ satiyā, indriyaṃ sammappadhānaṃ;
බලිද්ධිපාදානුරුද්ධා, ඣානානාපානසංයුතං;
Baliddhipādānuruddhā, jhānānāpānasaṃyutaṃ;
සොතාපත්ති සච්චඤ්චාති, මහාවග්ගොති වුච්චතීති.
Sotāpatti saccañcāti, mahāvaggoti vuccatīti.
මහාවග්ගසංයුත්තපාළි නිට්ඨිතා.
Mahāvaggasaṃyuttapāḷi niṭṭhitā.
