| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
३०. पेत्तिदेवपेत्तिविसयसुत्तं
30. Pettidevapettivisayasuttaṃ
१२०१. …पे॰… ‘‘एवमेव खो, भिक्खवे, अप्पका ते सत्ता ये पेत्तिविसया चुता देवेसु पच्चाजायन्ति; अथ खो एतेव बहुतरा सत्ता ये पेत्तिविसया चुता पेत्तिविसये पच्चाजायन्ति। तं किस्स हेतु? अदिट्ठत्ता भिक्खवे, चतुन्नं अरियसच्चानं। कतमेसं चतुन्नं ? दुक्खस्स अरियसच्चस्स, दुक्खसमुदयस्स अरियसच्चस्स, दुक्खनिरोधस्स अरियसच्चस्स, दुक्खनिरोधगामिनिया पटिपदाय अरियसच्चस्स’’।
1201. …Pe… ‘‘evameva kho, bhikkhave, appakā te sattā ye pettivisayā cutā devesu paccājāyanti; atha kho eteva bahutarā sattā ye pettivisayā cutā pettivisaye paccājāyanti. Taṃ kissa hetu? Adiṭṭhattā bhikkhave, catunnaṃ ariyasaccānaṃ. Katamesaṃ catunnaṃ ? Dukkhassa ariyasaccassa, dukkhasamudayassa ariyasaccassa, dukkhanirodhassa ariyasaccassa, dukkhanirodhagāminiyā paṭipadāya ariyasaccassa’’.
‘‘तस्मातिह , भिक्खवे, ‘इदं दुक्ख’न्ति योगो करणीयो, ‘अयं दुक्खसमुदयो’ति योगो करणीयो, ‘अयं दुक्खनिरोधो’ति योगो करणीयो, ‘अयं दुक्खनिरोधगामिनी पटिपदा’ति योगो करणीयो’’ति। इदमवोच भगवा। अत्तमना ते भिक्खू भगवतो भासितं अभिनन्दुन्ति। तिंसतिमं।
‘‘Tasmātiha , bhikkhave, ‘idaṃ dukkha’nti yogo karaṇīyo, ‘ayaṃ dukkhasamudayo’ti yogo karaṇīyo, ‘ayaṃ dukkhanirodho’ti yogo karaṇīyo, ‘ayaṃ dukkhanirodhagāminī paṭipadā’ti yogo karaṇīyo’’ti. Idamavoca bhagavā. Attamanā te bhikkhū bhagavato bhāsitaṃ abhinandunti. Tiṃsatimaṃ.
पञ्चगतिपेय्यालवग्गो एकादसमो।
Pañcagatipeyyālavaggo ekādasamo.
तस्सुद्दानं –
Tassuddānaṃ –
मनुस्सतो चुता छापि, देवा चुता निरयतो।
Manussato cutā chāpi, devā cutā nirayato;
तिरच्छानपेत्तिविसया, तिंसमत्तो गतिवग्गोति॥
Tiracchānapettivisayā, tiṃsamatto gativaggoti.
सच्चसंयुत्तं द्वादसमं।
Saccasaṃyuttaṃ dvādasamaṃ.
महावग्गो पञ्चमो।
Mahāvaggo pañcamo.
तस्सुद्दानं –
Tassuddānaṃ –
मग्गबोज्झङ्गं सतिया, इन्द्रियं सम्मप्पधानं।
Maggabojjhaṅgaṃ satiyā, indriyaṃ sammappadhānaṃ;
बलिद्धिपादानुरुद्धा, झानानापानसंयुतं।
Baliddhipādānuruddhā, jhānānāpānasaṃyutaṃ;
सोतापत्ति सच्चञ्चाति, महावग्गोति वुच्चतीति॥
Sotāpatti saccañcāti, mahāvaggoti vuccatīti.
महावग्गसंयुत्तपाळि निट्ठिता।
Mahāvaggasaṃyuttapāḷi niṭṭhitā.
