| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৩. পেণাহিকঙ্গপঞ্হো
3. Peṇāhikaṅgapañho
৩. ‘‘ভন্তে নাগসেন, ‘পেণাহিকায দ্ৰে অঙ্গানি গহেতব্বানী’তি যং ৰদেসি, কতমানি তানি দ্ৰে অঙ্গানি গহেতব্বানী’’তি? ‘‘যথা, মহারাজ, পেণাহিকা সকপতিম্হি উসূযায ছাপকে ন পোসযতি, এৰমেৰ খো, মহারাজ, যোগিনা যোগাৰচরেন সকমনে 1 কিলেসে উপ্পন্নে উসূযাযিতব্বং, সতিপট্ঠানেন সম্মাসংৰরসুসিরে পক্খিপিত্ৰা মনোদ্ৰারে কাযগতাসতি ভাৰেতব্বা। ইদং, মহারাজ, পেণাহিকায পঠমং অঙ্গং গহেতব্বং।
3. ‘‘Bhante nāgasena, ‘peṇāhikāya dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, peṇāhikā sakapatimhi usūyāya chāpake na posayati, evameva kho, mahārāja, yoginā yogāvacarena sakamane 2 kilese uppanne usūyāyitabbaṃ, satipaṭṭhānena sammāsaṃvarasusire pakkhipitvā manodvāre kāyagatāsati bhāvetabbā. Idaṃ, mahārāja, peṇāhikāya paṭhamaṃ aṅgaṃ gahetabbaṃ.
‘‘পুন চপরং, মহারাজ, পেণাহিকা পৰনে দিৰসং গোচরং চরিত্ৰা সাযং পক্খিগণং উপেতি অত্তনো গুত্তিযা, এৰমেৰ খো, মহারাজ, যোগিনা যোগাৰচরেন এককেন পৰিৰেকং সেৰিতব্বং সংযোজনপরিমুত্তিযা, তত্র রতিং অলভমানেন উপৰাদভযপরিরক্খণায সঙ্ঘং ওসরিত্ৰা সঙ্ঘরক্খিতেন ৰসিতব্বং। ইদং, মহারাজ, পেণাহিকায দুতিযং অঙ্গং গহেতব্বং। ভাসিতম্পেতং, মহারাজ, ব্রহ্মুনা সহম্পতিনা ভগৰতো সন্তিকে –
‘‘Puna caparaṃ, mahārāja, peṇāhikā pavane divasaṃ gocaraṃ caritvā sāyaṃ pakkhigaṇaṃ upeti attano guttiyā, evameva kho, mahārāja, yoginā yogāvacarena ekakena pavivekaṃ sevitabbaṃ saṃyojanaparimuttiyā, tatra ratiṃ alabhamānena upavādabhayaparirakkhaṇāya saṅghaṃ osaritvā saṅgharakkhitena vasitabbaṃ. Idaṃ, mahārāja, peṇāhikāya dutiyaṃ aṅgaṃ gahetabbaṃ. Bhāsitampetaṃ, mahārāja, brahmunā sahampatinā bhagavato santike –
‘‘‘সেৰেথ পন্তানি সেনাসনানি, চরেয্য সংযোজনৰিপ্পমোক্খা।
‘‘‘Sevetha pantāni senāsanāni, careyya saṃyojanavippamokkhā;
সচে রতিং নাধিগচ্ছেয্য তত্থ, সঙ্ঘে ৰসে রক্খিতত্তো সতীমা’’’তি॥
Sace ratiṃ nādhigaccheyya tattha, saṅghe vase rakkhitatto satīmā’’’ti.
পেণাহিকঙ্গপঞ্হো ততিযো।
Peṇāhikaṅgapañho tatiyo.
Footnotes:
