| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. பாயஸதா³யகத்தே²ரஅபதா³னவண்ணனா
3. Pāyasadāyakattheraapadānavaṇṇanā
ஸுவண்ணவண்ணோ ஸம்பு³த்³தோ⁴திஆதி³கங் ஆயஸ்மதோ பாயஸதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ஏகஸ்மிங் விப⁴வஸம்பன்னே குலகே³ஹே நிப்³ப³த்தோ விஞ்ஞுதங் பத்வா க⁴ராவாஸங் வஸந்தோ ஹத்தி²அஸ்ஸத⁴னத⁴ஞ்ஞஸத்தரதனாதி³விப⁴வஸம்பன்னோ ஸத்³தா⁴ஸம்பன்னோ கம்மப²லங் ஸத்³த³ஹித்வா ஸஹஸ்ஸமத்தா ஸுவண்ணபாதியோ காரெத்வா தஸ்மிங் கீ²ரபாயஸஸஹஸ்ஸஸ்ஸ பூரெத்வா தா ஸப்³பா³ கா³ஹாபெத்வா ஸிம்ப³லிவனங் அக³மாஸி. தஸ்மிங் ஸமயே விபஸ்ஸீ ப⁴க³வா ச²ப்³ப³ண்ணரங்ஸியோ விஸ்ஸஜ்ஜெத்வா ஆகாஸே சங்கமங் மாபெத்வா சங்கமதி. ஸோ பன ஸெட்டி² தங் அச்ச²ரியங் தி³ஸ்வா அதீவ பஸன்னோ பாதியோ ட²பெத்வா வந்தி³த்வா ஆரோசேஸி படிக்³க³ஹணாய. அத² ப⁴க³வா அனுகம்பங் உபாதா³ய படிக்³க³ஹேஸி, படிக்³க³ஹெத்வா ச பன தஸ்ஸ ஸோமனுஸ்ஸுப்பாத³னத்த²ங் ஸஹஸ்ஸமத்தேஹி பி⁴க்கு²ஸங்கே⁴ஹி ஸத்³தி⁴ங் பரிபு⁴ஞ்ஜி, தத³வஸேஸங் அனேகஸஹஸ்ஸபி⁴க்கூ² பரிபு⁴ஞ்ஜிங்ஸு. ஸோ தேன புஞ்ஞேன ஸுக³தீஸுயேவ ஸங்ஸரந்தோ இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ ஸத்³தா⁴ஜாதோ பப்³ப³ஜித்வா நசிரஸ்ஸேவ அரஹா அஹோஸி.
Suvaṇṇavaṇṇo sambuddhotiādikaṃ āyasmato pāyasadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ vibhavasampanne kulagehe nibbatto viññutaṃ patvā gharāvāsaṃ vasanto hatthiassadhanadhaññasattaratanādivibhavasampanno saddhāsampanno kammaphalaṃ saddahitvā sahassamattā suvaṇṇapātiyo kāretvā tasmiṃ khīrapāyasasahassassa pūretvā tā sabbā gāhāpetvā simbalivanaṃ agamāsi. Tasmiṃ samaye vipassī bhagavā chabbaṇṇaraṃsiyo vissajjetvā ākāse caṅkamaṃ māpetvā caṅkamati. So pana seṭṭhi taṃ acchariyaṃ disvā atīva pasanno pātiyo ṭhapetvā vanditvā ārocesi paṭiggahaṇāya. Atha bhagavā anukampaṃ upādāya paṭiggahesi, paṭiggahetvā ca pana tassa somanussuppādanatthaṃ sahassamattehi bhikkhusaṅghehi saddhiṃ paribhuñji, tadavasesaṃ anekasahassabhikkhū paribhuñjiṃsu. So tena puññena sugatīsuyeva saṃsaranto imasmiṃ buddhuppāde kulagehe nibbatto viññutaṃ patto saddhājāto pabbajitvā nacirasseva arahā ahosi.
26. ஸோ அபரபா⁴கே³ அத்தனோ குஸலங் பச்சவெக்க²மானோ தங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஸுவண்ணவண்ணோ ஸம்பு³த்³தோ⁴திஆதி³மாஹ. தங் ஹெட்டா² வுத்தமேவ.
26. So aparabhāge attano kusalaṃ paccavekkhamāno taṃ saritvā somanassajāto pubbacaritāpadānaṃ pakāsento suvaṇṇavaṇṇo sambuddhotiādimāha. Taṃ heṭṭhā vuttameva.
28. சங்கமங் ஸுஸமாரூள்ஹோதி சதி³னந்தோ பத³விக்கே²பங் கரொந்தோ கமதி க³ச்ச²தீதி சங்கமங், சங்கமஸ்ஸ பத³விக்கே²பஸ்ஸ ஆதா⁴ரபூ⁴தபத²விபதே³ஸோ சங்கமங் நாமாதி அத்தோ², ஏதங் சங்கமங்ஸு விஸேஸேன ஆரூள்ஹோதி ஸம்ப³ந்தோ⁴. அம்ப³ரே அனிலாயனேதி வரீயதி சா²தி³யதி அனேனாதி வரங், ந ப³ரந்தி அம்ப³ரங், ஸேதவத்த²ஸதி³ஸங் ஆகாஸந்தி அத்தோ². நத்தி² நிலீயனங் கோ³பனங் எத்தா²தி அனிலங், ஆ ஸமந்ததோ யந்தி க³ச்ச²ந்தி அனேன இத்³தி⁴மந்தோதி ஆயனங், அனிலஞ்ச தங் ஆயனஞ்சேதி அனிலாயனங், தஸ்மிங் அம்ப³ரே அனிலாயனே சங்கமங் மாபயிந்தி அத்தோ². ஸேஸங் ஸப்³ப³த்த² உத்தானமேவாதி.
28.Caṅkamaṃ susamārūḷhoti cadinanto padavikkhepaṃ karonto kamati gacchatīti caṅkamaṃ, caṅkamassa padavikkhepassa ādhārabhūtapathavipadeso caṅkamaṃ nāmāti attho, etaṃ caṅkamaṃsu visesena ārūḷhoti sambandho. Ambare anilāyaneti varīyati chādiyati anenāti varaṃ, na baranti ambaraṃ, setavatthasadisaṃ ākāsanti attho. Natthi nilīyanaṃ gopanaṃ etthāti anilaṃ, ā samantato yanti gacchanti anena iddhimantoti āyanaṃ, anilañca taṃ āyanañceti anilāyanaṃ, tasmiṃ ambare anilāyane caṅkamaṃ māpayinti attho. Sesaṃ sabbattha uttānamevāti.
பாயஸதா³யகத்தே²ரஅபதா³னவண்ணனா ஸமத்தா.
Pāyasadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. பாயஸதா³யகத்தே²ரஅபதா³னங் • 3. Pāyasadāyakattheraapadānaṃ
