| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๗. ปวารณานิเทฺทโส
7. Pavāraṇāniddeso
ปวารณาติ –
Pavāraṇāti –
๗๓.
73.
เยนีริยาปเถนายํ, ภุญฺชมาโน ปวาริโต;
Yenīriyāpathenāyaṃ, bhuñjamāno pavārito;
ตโต อเญฺญน ภุเญฺชยฺย, ปาจิตฺตินติริตฺตกํฯ
Tato aññena bhuñjeyya, pācittinatirittakaṃ.
๗๔.
74.
อสนํ โภชนเญฺจว, อภิหาโร สมีปตา;
Asanaṃ bhojanañceva, abhihāro samīpatā;
กายวาจาปฎิเกฺขโป, ปญฺจองฺคา ปวารณาฯ
Kāyavācāpaṭikkhepo, pañcaaṅgā pavāraṇā.
๗๕.
75.
โอทโน สตฺตุ กุมฺมาโส, มโจฺฉ มํสญฺจ โภชนํ;
Odano sattu kummāso, maccho maṃsañca bhojanaṃ;
สาลิ วีหิ ยโว กงฺคุ, กุทฺรูสวรโคธุมา;
Sāli vīhi yavo kaṅgu, kudrūsavaragodhumā;
สตฺตนฺนเมสํ ธญฺญานํ, โอทโน โภชฺชยาคุ จฯ
Sattannamesaṃ dhaññānaṃ, odano bhojjayāgu ca.
๗๖.
76.
สามากาทิติณํ กุทฺรูสเก วรกโจรโก;
Sāmākāditiṇaṃ kudrūsake varakacorako;
วรเก สาลิยเญฺจว, นีวาโร สงฺคหํ คโตฯ
Varake sāliyañceva, nīvāro saṅgahaṃ gato.
๗๗.
77.
ภฎฺฐธญฺญมโย สตฺตุ, กุมฺมาโส ยวสมฺภโว;
Bhaṭṭhadhaññamayo sattu, kummāso yavasambhavo;
มํโส จ กปฺปิโย วุโตฺต, มโจฺฉ อุทกสมฺภโวฯ
Maṃso ca kappiyo vutto, maccho udakasambhavo.
๗๘.
78.
ภุญฺชโนฺต โภชนํ กปฺป-มกปฺปํ วา นิเสธยํ;
Bhuñjanto bhojanaṃ kappa-makappaṃ vā nisedhayaṃ;
ปวาเรยฺยาภิหฎํ กปฺปํ, ตนฺนาเมน อิมนฺติ วาฯ
Pavāreyyābhihaṭaṃ kappaṃ, tannāmena imanti vā.
๗๙.
79.
ลาชา ตํสตฺตุภตฺตานิ, โครโส สุทฺธขชฺชโก;
Lājā taṃsattubhattāni, goraso suddhakhajjako;
ตณฺฑุลา ภฎฺฐปิฎฺฐญฺจ, ปุถุกา เวฬุอาทินํฯ
Taṇḍulā bhaṭṭhapiṭṭhañca, puthukā veḷuādinaṃ.
๘๐.
80.
ภตฺตํ วุตฺตาวเสสานํ, รสยาคุ รโสปิ จ;
Bhattaṃ vuttāvasesānaṃ, rasayāgu rasopi ca;
สุทฺธยาคุผลาทีนิ, น ชเนนฺติ ปวารณํฯ
Suddhayāguphalādīni, na janenti pavāraṇaṃ.
๘๑.
81.
ปวาริเตน วุฎฺฐาย, อภุเตฺตน จ โภชนํ;
Pavāritena vuṭṭhāya, abhuttena ca bhojanaṃ;
อติริตฺตํ น กาตพฺพํ, เยน ยํ วา ปุเร กตํฯ
Atirittaṃ na kātabbaṃ, yena yaṃ vā pure kataṃ.
๘๒.
82.
กปฺปิยํ คหิตเญฺจวุ-จฺจาริตํ หตฺถปาสคํ;
Kappiyaṃ gahitañcevu-ccāritaṃ hatthapāsagaṃ;
อติริตฺตํ กโรเนฺตวํ, ‘‘อลเมต’’นฺติ ภาสตุฯ
Atirittaṃ karontevaṃ, ‘‘alameta’’nti bhāsatu.
๘๓.
83.
น กเรนุปสมฺปนฺน-หตฺถคํ เปสยิตฺวาปิ;
Na karenupasampanna-hatthagaṃ pesayitvāpi;
กาเรตุํ ลพฺภเต สโพฺพ, ภุญฺชิตุํ ตมการโกติฯ
Kāretuṃ labbhate sabbo, bhuñjituṃ tamakārakoti.
