| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
७. पवारणानिद्देसो
7. Pavāraṇāniddeso
पवारणाति –
Pavāraṇāti –
७३.
73.
येनीरियापथेनायं, भुञ्जमानो पवारितो।
Yenīriyāpathenāyaṃ, bhuñjamāno pavārito;
ततो अञ्ञेन भुञ्जेय्य, पाचित्तिनतिरित्तकं॥
Tato aññena bhuñjeyya, pācittinatirittakaṃ.
७४.
74.
असनं भोजनञ्चेव, अभिहारो समीपता।
Asanaṃ bhojanañceva, abhihāro samīpatā;
कायवाचापटिक्खेपो, पञ्चअङ्गा पवारणा॥
Kāyavācāpaṭikkhepo, pañcaaṅgā pavāraṇā.
७५.
75.
ओदनो सत्तु कुम्मासो, मच्छो मंसञ्च भोजनं।
Odano sattu kummāso, maccho maṃsañca bhojanaṃ;
सालि वीहि यवो कङ्गु, कुद्रूसवरगोधुमा।
Sāli vīhi yavo kaṅgu, kudrūsavaragodhumā;
सत्तन्नमेसं धञ्ञानं, ओदनो भोज्जयागु च॥
Sattannamesaṃ dhaññānaṃ, odano bhojjayāgu ca.
७६.
76.
सामाकादितिणं कुद्रूसके वरकचोरको।
Sāmākāditiṇaṃ kudrūsake varakacorako;
वरके सालियञ्चेव, नीवारो सङ्गहं गतो॥
Varake sāliyañceva, nīvāro saṅgahaṃ gato.
७७.
77.
भट्ठधञ्ञमयो सत्तु, कुम्मासो यवसम्भवो।
Bhaṭṭhadhaññamayo sattu, kummāso yavasambhavo;
मंसो च कप्पियो वुत्तो, मच्छो उदकसम्भवो॥
Maṃso ca kappiyo vutto, maccho udakasambhavo.
७८.
78.
भुञ्जन्तो भोजनं कप्प-मकप्पं वा निसेधयं।
Bhuñjanto bhojanaṃ kappa-makappaṃ vā nisedhayaṃ;
पवारेय्याभिहटं कप्पं, तन्नामेन इमन्ति वा॥
Pavāreyyābhihaṭaṃ kappaṃ, tannāmena imanti vā.
७९.
79.
लाजा तंसत्तुभत्तानि, गोरसो सुद्धखज्जको।
Lājā taṃsattubhattāni, goraso suddhakhajjako;
तण्डुला भट्ठपिट्ठञ्च, पुथुका वेळुआदिनं॥
Taṇḍulā bhaṭṭhapiṭṭhañca, puthukā veḷuādinaṃ.
८०.
80.
भत्तं वुत्तावसेसानं, रसयागु रसोपि च।
Bhattaṃ vuttāvasesānaṃ, rasayāgu rasopi ca;
सुद्धयागुफलादीनि, न जनेन्ति पवारणं॥
Suddhayāguphalādīni, na janenti pavāraṇaṃ.
८१.
81.
पवारितेन वुट्ठाय, अभुत्तेन च भोजनं।
Pavāritena vuṭṭhāya, abhuttena ca bhojanaṃ;
अतिरित्तं न कातब्बं, येन यं वा पुरे कतं॥
Atirittaṃ na kātabbaṃ, yena yaṃ vā pure kataṃ.
८२.
82.
कप्पियं गहितञ्चेवु-च्चारितं हत्थपासगं।
Kappiyaṃ gahitañcevu-ccāritaṃ hatthapāsagaṃ;
अतिरित्तं करोन्तेवं, ‘‘अलमेत’’न्ति भासतु॥
Atirittaṃ karontevaṃ, ‘‘alameta’’nti bhāsatu.
८३.
83.
न करेनुपसम्पन्न-हत्थगं पेसयित्वापि।
Na karenupasampanna-hatthagaṃ pesayitvāpi;
कारेतुं लब्भते सब्बो, भुञ्जितुं तमकारकोति॥
Kāretuṃ labbhate sabbo, bhuñjituṃ tamakārakoti.
