| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
১০. পত্তপিণ্ডিকসুত্তং
10. Pattapiṇḍikasuttaṃ
১৯০. ‘‘পঞ্চিমে, ভিক্খৰে, পত্তপিণ্ডিকা। কতমে পঞ্চ? মন্দত্তা মোমূহত্তা পত্তপিণ্ডিকো হোতি, পাপিচ্ছো ইচ্ছাপকতো পত্তপিণ্ডিকো হোতি, উম্মাদা চিত্তক্খেপা পত্তপিণ্ডিকো হোতি, ‘ৰণ্ণিতং বুদ্ধেহি বুদ্ধসাৰকেহী’তি পত্তপিণ্ডিকো হোতি, অপ্পিচ্ছতংযেৰ নিস্সায সন্তুট্ঠিংযেৰ নিস্সায সল্লেখংযেৰ নিস্সায পৰিৰেকংযেৰ নিস্সায ইদমত্থিতংযেৰ নিস্সায পত্তপিণ্ডিকো হোতি। ইমে খো, ভিক্খৰে, পঞ্চ পত্তপিণ্ডিকা। ইমেসং খো, ভিক্খৰে, পঞ্চন্নং পত্তপিণ্ডিকানং য্ৰাযং পত্তপিণ্ডিকো অপ্পিচ্ছতংযেৰ নিস্সায সন্তুট্ঠিংযেৰ নিস্সায সল্লেখংযেৰ নিস্সায পৰিৰেকংযেৰ নিস্সায ইদমত্থিতংযেৰ নিস্সায পত্তপিণ্ডিকো হোতি, অযং ইমেসং পঞ্চন্নং পত্তপিণ্ডিকানং অগ্গো চ সেট্ঠো চ মোক্খো চ উত্তমো চ পৰরো চ।
190. ‘‘Pañcime, bhikkhave, pattapiṇḍikā. Katame pañca? Mandattā momūhattā pattapiṇḍiko hoti, pāpiccho icchāpakato pattapiṇḍiko hoti, ummādā cittakkhepā pattapiṇḍiko hoti, ‘vaṇṇitaṃ buddhehi buddhasāvakehī’ti pattapiṇḍiko hoti, appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya pattapiṇḍiko hoti. Ime kho, bhikkhave, pañca pattapiṇḍikā. Imesaṃ kho, bhikkhave, pañcannaṃ pattapiṇḍikānaṃ yvāyaṃ pattapiṇḍiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya pattapiṇḍiko hoti, ayaṃ imesaṃ pañcannaṃ pattapiṇḍikānaṃ aggo ca seṭṭho ca mokkho ca uttamo ca pavaro ca.
‘‘সেয্যথাপি, ভিক্খৰে, গৰা খীরং, খীরম্হা দধি, দধিম্হা নৰনীতং, নৰনীতম্হা সপ্পি, সপ্পিম্হা সপ্পিমণ্ডো, সপ্পিমণ্ডো তত্থ অগ্গমক্খাযতি; এৰমেৰং খো, ভিক্খৰে, ইমেসং পঞ্চন্নং পত্তপিণ্ডিকানং য্ৰাযং পত্তপিণ্ডিকো অপ্পিচ্ছতংযেৰ নিস্সায সন্তুট্ঠিংযেৰ নিস্সায সল্লেখংযেৰ নিস্সায পৰিৰেকংযেৰ নিস্সায ইদমত্থিতংযেৰ নিস্সায পত্তপিণ্ডিকো হোতি, অযং ইমেসং পঞ্চন্নং পত্তপিণ্ডিকানং অগ্গো চ সেট্ঠো চ মোক্খো চ উত্তমো চ পৰরো চা’’তি। দসমং।
‘‘Seyyathāpi, bhikkhave, gavā khīraṃ, khīramhā dadhi, dadhimhā navanītaṃ, navanītamhā sappi, sappimhā sappimaṇḍo, sappimaṇḍo tattha aggamakkhāyati; evamevaṃ kho, bhikkhave, imesaṃ pañcannaṃ pattapiṇḍikānaṃ yvāyaṃ pattapiṇḍiko appicchataṃyeva nissāya santuṭṭhiṃyeva nissāya sallekhaṃyeva nissāya pavivekaṃyeva nissāya idamatthitaṃyeva nissāya pattapiṇḍiko hoti, ayaṃ imesaṃ pañcannaṃ pattapiṇḍikānaṃ aggo ca seṭṭho ca mokkho ca uttamo ca pavaro cā’’ti. Dasamaṃ.
অরঞ্ঞৰগ্গো চতুত্থো।
Araññavaggo catuttho.
তস্সুদ্দানং –
Tassuddānaṃ –
অরঞ্ঞং চীৰরং রুক্খ, সুসানং অব্ভোকাসিকং।
Araññaṃ cīvaraṃ rukkha, susānaṃ abbhokāsikaṃ;
নেসজ্জং সন্থতং একাসনিকং, খলুপচ্ছাপিণ্ডিকেন চাতি॥
Nesajjaṃ santhataṃ ekāsanikaṃ, khalupacchāpiṇḍikena cāti.
