| Library / Tipiṭaka / តិបិដក • Tipiṭaka / មហាវគ្គបាឡិ • Mahāvaggapāḷi |
២៥២. បដិសារណីយកម្មបដិប្បស្សទ្ធិកថា
252. Paṭisāraṇīyakammapaṭippassaddhikathā
៤២៥. ឥធ បន, ភិក្ខវេ, ភិក្ខុ សង្ឃេន បដិសារណីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, បដិសារណីយស្ស កម្មស្ស បដិប្បស្សទ្ធិំ យាចតិ។ តត្រ ចេ ភិក្ខូនំ ឯវំ ហោតិ – ‘‘អយំ ខោ, អាវុសោ, ភិក្ខុ សង្ឃេន បដិសារណីយកម្មកតោ សម្មា វត្តតិ, លោមំ បាតេតិ, នេត្ថារំ វត្តតិ, បដិសារណីយស្ស កម្មស្ស បដិប្បស្សទ្ធិំ យាចតិ។ ហន្ទស្ស មយំ បដិសារណីយកម្មំ បដិប្បស្សម្ភេមា’’តិ។ តេ តស្ស បដិសារណីយកម្មំ បដិប្បស្សម្ភេន្តិ – អធម្មេន វគ្គា។ សោ តម្ហា អាវាសា អញ្ញំ អាវាសំ គច្ឆតិ។ តត្ថបិ ភិក្ខូនំ ឯវំ ហោតិ – ‘‘ឥមស្ស ខោ, អាវុសោ, ភិក្ខុនោ សង្ឃេន បដិសារណីយកម្មំ បដិប្បស្សទ្ធំ អធម្មេន វគ្គេហិ។ ហន្ទស្ស មយំ បដិសារណីយកម្មំ បដិប្បស្សម្ភេមា’’តិ។ តេ តស្ស បដិសារណីយកម្មំ បដិប្បស្សម្ភេន្តិ – អធម្មេន សមគ្គា…បេ.… ធម្មេន វគ្គា… ធម្មបតិរូបកេន វគ្គា… ធម្មបតិរូបកេន សមគ្គា…បេ.…។
425. Idha pana, bhikkhave, bhikkhu saṅghena paṭisāraṇīyakammakato sammā vattati, lomaṃ pāteti, netthāraṃ vattati, paṭisāraṇīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena paṭisāraṇīyakammakato sammā vattati, lomaṃ pāteti, netthāraṃ vattati, paṭisāraṇīyassa kammassa paṭippassaddhiṃ yācati. Handassa mayaṃ paṭisāraṇīyakammaṃ paṭippassambhemā’’ti. Te tassa paṭisāraṇīyakammaṃ paṭippassambhenti – adhammena vaggā. So tamhā āvāsā aññaṃ āvāsaṃ gacchati. Tatthapi bhikkhūnaṃ evaṃ hoti – ‘‘imassa kho, āvuso, bhikkhuno saṅghena paṭisāraṇīyakammaṃ paṭippassaddhaṃ adhammena vaggehi. Handassa mayaṃ paṭisāraṇīyakammaṃ paṭippassambhemā’’ti. Te tassa paṭisāraṇīyakammaṃ paṭippassambhenti – adhammena samaggā…pe… dhammena vaggā… dhammapatirūpakena vaggā… dhammapatirūpakena samaggā…pe….
ចក្កំ កាតព្ពំ។
Cakkaṃ kātabbaṃ.
បដិសារណីយកម្មបដិប្បស្សទ្ធិកថា និដ្ឋិតា។
Paṭisāraṇīyakammapaṭippassaddhikathā niṭṭhitā.
