| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৪. পটিসন্দহনপুগ্গলৰেদিযনপঞ্হো
4. Paṭisandahanapuggalavediyanapañho
৪. রাজা আহ ‘‘ভন্তে নাগসেন, যো ন পটিসন্দহতি, ৰেদেতি সো কিঞ্চি দুক্খং ৰেদন’’ন্তি? থেরো আহ ‘‘কিঞ্চি ৰেদেতি, কিঞ্চি ন ৰেদেতী’’তি। ‘‘কিং ৰেদেতি, কিং ন ৰেদেতী’’তি? ‘‘কাযিকং, মহারাজ, ৰেদনং ৰেদেতি, চেতসিকং ৰেদনং ন ৰেদেতী’’তি। ‘‘কথং, ভন্তে, কাযিকং ৰেদনং ৰেদেতি, কথং চেতসিকং ৰেদনং ন ৰেদেতী’’তি? ‘‘যো হেতু যো পচ্চযো কাযিকায দুক্খৰেদনায উপ্পত্তিযা, তস্স হেতুস্স তস্স পচ্চযস্স অনুপরমা কাযিকং দুক্খৰেদনং ৰেদেতি, যো হেতু যো পচ্চযো চেতসিকায দুক্খৰেদনায উপ্পত্তিযা, তস্স হেতুস্স তস্স পচ্চযস্স উপরমা চেতসিকং দুক্খৰেদনং ন ৰেদেতি। ভাসিতম্পেতং, মহারাজ, ভগৰতা – ‘সো একং ৰেদনং ৰেদেতি কাযিকং ন চেতসিক’’’ন্তি।
4. Rājā āha ‘‘bhante nāgasena, yo na paṭisandahati, vedeti so kiñci dukkhaṃ vedana’’nti? Thero āha ‘‘kiñci vedeti, kiñci na vedetī’’ti. ‘‘Kiṃ vedeti, kiṃ na vedetī’’ti? ‘‘Kāyikaṃ, mahārāja, vedanaṃ vedeti, cetasikaṃ vedanaṃ na vedetī’’ti. ‘‘Kathaṃ, bhante, kāyikaṃ vedanaṃ vedeti, kathaṃ cetasikaṃ vedanaṃ na vedetī’’ti? ‘‘Yo hetu yo paccayo kāyikāya dukkhavedanāya uppattiyā, tassa hetussa tassa paccayassa anuparamā kāyikaṃ dukkhavedanaṃ vedeti, yo hetu yo paccayo cetasikāya dukkhavedanāya uppattiyā, tassa hetussa tassa paccayassa uparamā cetasikaṃ dukkhavedanaṃ na vedeti. Bhāsitampetaṃ, mahārāja, bhagavatā – ‘so ekaṃ vedanaṃ vedeti kāyikaṃ na cetasika’’’nti.
‘‘ভন্তে নাগসেন, যো দুক্খং ৰেদনং ৰেদেতি, কস্মা সো ন পরিনিব্বাযতী’’তি? ‘‘নত্থি, মহারাজ, অরহতো অনুনযো ৰা পটিঘো ৰা, ন চ অরহন্তো অপক্কং পাতেন্তি পরিপাকং আগমেন্তি পণ্ডিতা। ভাসিতম্পেতং , মহারাজ, থেরেন সারিপুত্তেন ধম্মসেনাপতিনা –
‘‘Bhante nāgasena, yo dukkhaṃ vedanaṃ vedeti, kasmā so na parinibbāyatī’’ti? ‘‘Natthi, mahārāja, arahato anunayo vā paṭigho vā, na ca arahanto apakkaṃ pātenti paripākaṃ āgamenti paṇḍitā. Bhāsitampetaṃ , mahārāja, therena sāriputtena dhammasenāpatinā –
‘‘‘নাভিনন্দামি মরণং, নাভিনন্দামি জীৰিতং।
‘‘‘Nābhinandāmi maraṇaṃ, nābhinandāmi jīvitaṃ;
কালঞ্চ পটিকঙ্খামি, নিব্বিসং ভতকো যথা॥
Kālañca paṭikaṅkhāmi, nibbisaṃ bhatako yathā.
‘‘‘নাভিনন্দামি মরণং, নাভিনন্দামি জীৰিতং।
‘‘‘Nābhinandāmi maraṇaṃ, nābhinandāmi jīvitaṃ;
কালঞ্চ পটিকঙ্খামি, সম্পজানো পতিস্সতো’’’তি॥
Kālañca paṭikaṅkhāmi, sampajāno patissato’’’ti.
পটিসন্দহনপুগ্গলৰেদিযনপঞ্হো চতুত্থো।
Paṭisandahanapuggalavediyanapañho catuttho.
Footnotes:
