| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
6. பாடிஹாரியகதா²
6. Pāṭihāriyakathā
பாடிஹாரியகதா²வண்ணனா
Pāṭihāriyakathāvaṇṇanā
30. இதா³னி லோகத்த²சரியாபரியோஸானாய சரியாகதா²ய அனந்தரங் லோகத்தா²னுஸாஸனபரியோஸானங் பாடிஹாரியங் த³ஸ்ஸெந்தேன கதி²தாய ஸுத்தந்தபுப்³ப³ங்க³மாய பாடிஹாரியகதா²ய அபுப்³ப³த்தா²னுவண்ணனா. தத்த² ஸுத்தந்தே தாவ பாடிஹாரியானீதி பச்சனீகபடிஹரணவஸேன பாடிஹாரியானி. இத்³தி⁴பாடிஹாரியந்தி இஜ்ஜ²னவஸேன இத்³தி⁴, படிஹரணவஸேன பாடிஹாரியங், இத்³தி⁴யேவ பாடிஹாரியங் இத்³தி⁴பாடிஹாரியங். இதரேஸு பன ஆதி³ஸ்ஸனவஸேன ஆதே³ஸனங், அனுஸாஸனவஸேன அனுஸாஸனீ. ஸேஸங் வுத்தனயமேவ.
30. Idāni lokatthacariyāpariyosānāya cariyākathāya anantaraṃ lokatthānusāsanapariyosānaṃ pāṭihāriyaṃ dassentena kathitāya suttantapubbaṅgamāya pāṭihāriyakathāya apubbatthānuvaṇṇanā. Tattha suttante tāva pāṭihāriyānīti paccanīkapaṭiharaṇavasena pāṭihāriyāni. Iddhipāṭihāriyanti ijjhanavasena iddhi, paṭiharaṇavasena pāṭihāriyaṃ, iddhiyeva pāṭihāriyaṃ iddhipāṭihāriyaṃ. Itaresu pana ādissanavasena ādesanaṃ, anusāsanavasena anusāsanī. Sesaṃ vuttanayameva.
இதா⁴தி இமஸ்மிங் லோகே. ஏகச்சோதி ஏகோ போஸோ. இத்³தி⁴பாடிஹாரியனித்³தே³ஸோ ஹெட்டா² வுத்தத்தோ²யேவ. நிமித்தேன ஆதி³ஸதீதி ஆக³தனிமித்தேன வா க³தனிமித்தேன வா டி²தனிமித்தேன வா கதே²தி. ஏவம்பி தே மனோதி ஏவம்பி தவ மனோ ஸோமனஸ்ஸிதோ வா தோ³மனஸ்ஸிதோ வா காமவிதக்காதி³ஸம்பயுத்தோ வா. அபி-ஸத்³தோ³ ஸம்பிண்ட³னத்தோ². இத்த²ம்பி தே மனோதி ஸோமனஸ்ஸிதாதி³தோ ஏகேகவிதே⁴பி சித்தே நானப்பகாரபரிதீ³பனங். இதிபி தே சித்தந்தி இதிபி தவ சித்தங், இமஞ்ச இமஞ்ச அத்த²ங் சிந்தயமானங் பவத்ததீதி அத்தோ². ப³ஹுங் சேபி ஆதி³ஸதீதி சித்ததோ அஞ்ஞங் வா இத³ஞ்ச இத³ஞ்ச நாம அஹோஸி ப⁴வதி ப⁴விஸ்ஸதீதி ப³ஹுகம்பி கதே²தி. ததே²வ தங் ஹோதி, நோ அஞ்ஞதா²தி தங் ஸப்³ப³ம்பி யதா² யதா² கதி²தங், ததே²வ ஹோதி, அஞ்ஞதா² ந ஹோதி.
Idhāti imasmiṃ loke. Ekaccoti eko poso. Iddhipāṭihāriyaniddeso heṭṭhā vuttatthoyeva. Nimittena ādisatīti āgatanimittena vā gatanimittena vā ṭhitanimittena vā katheti. Evampi te manoti evampi tava mano somanassito vā domanassito vā kāmavitakkādisampayutto vā. Api-saddo sampiṇḍanattho. Itthampi te manoti somanassitādito ekekavidhepi citte nānappakāraparidīpanaṃ. Itipi te cittanti itipi tava cittaṃ, imañca imañca atthaṃ cintayamānaṃ pavattatīti attho. Bahuṃ cepi ādisatīti cittato aññaṃ vā idañca idañca nāma ahosi bhavati bhavissatīti bahukampi katheti. Tatheva taṃ hoti, no aññathāti taṃ sabbampi yathā yathā kathitaṃ, tatheva hoti, aññathā na hoti.
ந ஹேவ கோ² நிமித்தேன ஆதி³ஸதீதி நிமித்தங் ஜானந்தோபி கேவலங் நிமித்தேனேவ ந கதே²தி. அபிசாதி அபரபரியாயத³ஸ்ஸனங். மனுஸ்ஸானந்தி சித்தங் ஜானநகமனுஸ்ஸானங். அமனுஸ்ஸானந்தி ஸாவிதானங் வா அஸ்ஸாவிதானங் வா யக்க²பிஸாசாதீ³னங். தே³வதானந்தி சாதுமஹாராஜிகாதீ³னங் . ஸத்³த³ங் ஸுத்வாதி அஞ்ஞஸ்ஸ சித்தங் ஞத்வா கதெ²ந்தானங் ஸத்³த³ங் ஸுணித்வா. பனாதி நிபாதோ புன ஆரம்பே⁴. விதக்கயதோதி யங் வா தங் வா விதக்கேன விதக்கெந்தஸ்ஸ. விசாரயதோதி விதக்கஸம்பயுத்தேனேவ விசாரேன விசாரெந்தஸ்ஸ. விதக்கவிப்பா²ரஸத்³த³ங் ஸுத்வாதி விதக்கவேக³வஸேன உப்பன்னங் விப்பலபந்தானங் ஸுத்தப்பமத்தாதீ³னங் கூஜனஸத்³த³ங் ஸுத்வா. யங் விதக்கயதோ ஸோ ஸத்³தோ³ உப்பன்னோ, தஸ்ஸ வஸேன ‘‘ஏவம்பி தே மனோ’’திஆதீ³னி ஆதி³ஸதி.
Na heva kho nimittena ādisatīti nimittaṃ jānantopi kevalaṃ nimitteneva na katheti. Apicāti aparapariyāyadassanaṃ. Manussānanti cittaṃ jānanakamanussānaṃ. Amanussānanti sāvitānaṃ vā assāvitānaṃ vā yakkhapisācādīnaṃ. Devatānanti cātumahārājikādīnaṃ . Saddaṃ sutvāti aññassa cittaṃ ñatvā kathentānaṃ saddaṃ suṇitvā. Panāti nipāto puna ārambhe. Vitakkayatoti yaṃ vā taṃ vā vitakkena vitakkentassa. Vicārayatoti vitakkasampayutteneva vicārena vicārentassa. Vitakkavipphārasaddaṃ sutvāti vitakkavegavasena uppannaṃ vippalapantānaṃ suttappamattādīnaṃ kūjanasaddaṃ sutvā. Yaṃ vitakkayato so saddo uppanno, tassa vasena ‘‘evampi te mano’’tiādīni ādisati.
அவிதக்கங் அவிசாரங் ஸமாதி⁴ந்தி விதக்கவிசாரக்கோ²ப⁴விரஹிதஸந்தசித்தஸ்ஸாபி ஜானநஸமத்த²தங் த³ஸ்ஸெந்தேன வுத்தங், ஸேஸசித்தஜானநே பன வத்தப்³ப³மேவ நத்தி². சேதஸா சேதோ பரிச்ச பஜானாதீதி சேதோபரியஞாணலாபீ⁴. போ⁴தோதி ப⁴வந்தஸ்ஸ. மனோஸங்கா²ரா பணிஹிதாதி சித்தஸங்கா²ரா ட²பிதா. அமுகங் நாம விதக்கங் விதக்கயிஸ்ஸதீதி குஸலாதி³விதக்கங் விதக்கயிஸ்ஸதி பவத்தயிஸ்ஸதீதி பஜானாதி. பஜானந்தோ ச ஆக³மனேன ஜானாதி, புப்³ப³பா⁴கே³ன ஜானாதி, அந்தோஸமாபத்தியங் சித்தங் ஓலோகெத்வா ஜானாதி. ஆக³மனேன ஜானாதி நாம கஸிணபரிகம்மகாலேயேவ ‘‘யேனாகாரேனேஸ கஸிணபா⁴வனங் ஆரத்³தோ⁴ பட²மஜ்ஜா²னங் வா து³தியாதி³ஜ்ஜா²னங் வா அட்ட² ஸமாபத்தியோ வா உப்பாதெ³ஸ்ஸதீ’’தி ஜானாதி. புப்³ப³பா⁴கே³ன ஜானாதி நாம பட²மவிபஸ்ஸனாய ஆரத்³தா⁴ய ஏவங் ஜானாதி, ‘‘யேனாகாரேனேஸ விபஸ்ஸனங் ஆரத்³தோ⁴ ஸோதாபத்திமக்³க³ங் வா உப்பாதெ³ஸ்ஸதி…பே॰… அரஹத்தமக்³க³ங் வா உப்பாதெ³ஸ்ஸதீ’’தி ஜானாதி. அந்தோஸமாபத்தியங் சித்தங் ஓலோகெத்வா ஜானாதி நாம ‘‘யேனாகாரேன இமஸ்ஸ மனோஸங்கா²ரா ட²பிதா, இமஸ்ஸ நாம சித்தஸ்ஸ அனந்தரா இமங் நாம விதக்கங் விதக்கெஸ்ஸதி, இதோ வுட்டி²தஸ்ஸ ஏதஸ்ஸ ஹானபா⁴கி³யோ வா ஸமாதி⁴ ப⁴விஸ்ஸதி, டி²திபா⁴கி³யோ வா விஸேஸபா⁴கி³யோ வா நிப்³பே³த⁴பா⁴கி³யோ வா, அபி⁴ஞ்ஞாயோ வா உப்பாதெ³ஸ்ஸதீ’’தி ஜானாதி. ப³ஹுங் சேபி ஆதி³ஸதீதி சேதோபரியஞாணஸ்ஸ சித்தசேதஸிகானங்யேவ ஆரம்மணகரணதோ ஸராகா³தி³ஸோளஸபபே⁴த³வஸேனேவ ப³ஹுங் சேபி கதே²தி, ந அஞ்ஞவஸேனாதி வேதி³தப்³ப³ங். ததே²வ தங் ஹோதீதி இத³ங் ஏகங்ஸேன ததே²வ ஹோதி. சேதோபரியஞாணவஸேன ஞாதஞ்ஹி அஞ்ஞதா²பா⁴வீ நாம நத்தி².
Avitakkaṃ avicāraṃ samādhinti vitakkavicārakkhobhavirahitasantacittassāpi jānanasamatthataṃ dassentena vuttaṃ, sesacittajānane pana vattabbameva natthi. Cetasā ceto paricca pajānātīti cetopariyañāṇalābhī. Bhototi bhavantassa. Manosaṅkhārā paṇihitāti cittasaṅkhārā ṭhapitā. Amukaṃ nāma vitakkaṃ vitakkayissatīti kusalādivitakkaṃ vitakkayissati pavattayissatīti pajānāti. Pajānanto ca āgamanena jānāti, pubbabhāgena jānāti, antosamāpattiyaṃ cittaṃ oloketvā jānāti. Āgamanena jānāti nāma kasiṇaparikammakāleyeva ‘‘yenākārenesa kasiṇabhāvanaṃ āraddho paṭhamajjhānaṃ vā dutiyādijjhānaṃ vā aṭṭha samāpattiyo vā uppādessatī’’ti jānāti. Pubbabhāgena jānāti nāma paṭhamavipassanāya āraddhāya evaṃ jānāti, ‘‘yenākārenesa vipassanaṃ āraddho sotāpattimaggaṃ vā uppādessati…pe… arahattamaggaṃ vā uppādessatī’’ti jānāti. Antosamāpattiyaṃ cittaṃ oloketvā jānāti nāma ‘‘yenākārena imassa manosaṅkhārā ṭhapitā, imassa nāma cittassa anantarā imaṃ nāma vitakkaṃ vitakkessati, ito vuṭṭhitassa etassa hānabhāgiyo vā samādhi bhavissati, ṭhitibhāgiyo vā visesabhāgiyo vā nibbedhabhāgiyo vā, abhiññāyo vā uppādessatī’’ti jānāti. Bahuṃ cepi ādisatīti cetopariyañāṇassa cittacetasikānaṃyeva ārammaṇakaraṇato sarāgādisoḷasapabhedavaseneva bahuṃ cepi katheti, na aññavasenāti veditabbaṃ. Tatheva taṃ hotīti idaṃ ekaṃsena tatheva hoti. Cetopariyañāṇavasena ñātañhi aññathābhāvī nāma natthi.
ஏவங் விதக்கேதா²தி ஏவங் நெக்க²ம்மவிதக்காத³யோ பவத்தெந்தா விதக்கேத². மா ஏவங் விதக்கயித்தா²தி ஏவங் காமவிதக்காத³யோ பவத்தெந்தா மா விதக்கயித்த² . ஏவங் மனஸி கரோதா²தி ஏவங் அனிச்சஸஞ்ஞமேவ, து³க்க²ஸஞ்ஞாதீ³ஸு வா அஞ்ஞதரங் மனஸி கரோத². மா ஏவங் மனஸாகத்தா²தி ஏவங் நிச்சந்திஆதி³னா நயேன மா மனஸி அகத்த². இத³ங் பஜஹதா²தி இத³ங் பஞ்சகாமகு³ணராகா³தி³ங் பஜஹத². இத³ங் உபஸம்பஜ்ஜ விஹரதா²தி இத³ங் சதுமக்³க³ப²லப்பபே⁴த³ங் லோகுத்தரத⁴ம்மமேவ பாபுணித்வா நிப்பா²தெ³த்வா விஹரத².
Evaṃ vitakkethāti evaṃ nekkhammavitakkādayo pavattentā vitakketha. Mā evaṃ vitakkayitthāti evaṃ kāmavitakkādayo pavattentā mā vitakkayittha . Evaṃ manasi karothāti evaṃ aniccasaññameva, dukkhasaññādīsu vā aññataraṃ manasi karotha. Mā evaṃ manasākatthāti evaṃ niccantiādinā nayena mā manasi akattha. Idaṃpajahathāti idaṃ pañcakāmaguṇarāgādiṃ pajahatha. Idaṃ upasampajja viharathāti idaṃ catumaggaphalappabhedaṃ lokuttaradhammameva pāpuṇitvā nipphādetvā viharatha.
31. இதா³னி இத்³தி⁴பாடிஹாரியே அபரங் பரியாயங் விஸேஸேன த³ஸ்ஸெந்தோ நெக்க²ம்மங் இஜ்ஜ²தீதி இத்³தீ⁴திஆதி³மாஹ. தத்த² காமச்ச²ந்த³ங் படிஹரதீதி அத்தனோ படிபக்க²பூ⁴தங் காமச்ச²ந்த³ங் படிப³லங் ஹுத்வா ஹரதி பஜஹதீதி ததே³வ நெக்க²ம்மங் பாடிஹாரியங் நாமாதி அத்தோ². யே தேன நெக்க²ம்மேன ஸமன்னாக³தாதி ஏவங் காமச்ச²ந்த³படிஹாரகேன தேன நெக்க²ம்மேன யே புக்³க³லா படிலாப⁴வஸேன ஸமன்னாக³தா. விஸுத்³த⁴சித்தாதி காமச்ச²ந்தா³பா⁴வதோ விஸுத்³த⁴சித்தா. அனாவிலஸங்கப்பாதி காமஸங்கப்பேன அனாலுலிதனெக்க²ம்மஸங்கப்பா. இதி ஆதே³ஸனாபாடிஹாரியந்தி பரசித்தகுஸலேன வா அஞ்ஞேன வா ஸம்மாஸம்பு³த்³தே⁴ன வா பு³த்³த⁴ஸாவகேஹி வா ஏவங் ஆதே³ஸனா பாடிஹாரியந்தி அத்தோ². அத² வா இதி ஏவங் ஆதி³ஸனங் ஆதே³ஸனாபாடிஹாரியந்தி ஆதே³ஸனஸத்³தோ³ பாட²ஸேஸங் கத்வா பயுஜ்ஜிதப்³போ³. ஏவங் ஆஸேவிதப்³ப³ந்தி இமினா ச பகாரேன இமினா ச பகாரேன ஆதி³தோ ஸேவிதப்³ப³ங். ஸேஸத்தயேபி ஏஸேவ நயோ. தத³னுத⁴ம்மதா ஸதி உபட்ட²பேதப்³பா³தி தஸ்ஸ நெக்க²ம்மஸ்ஸ அனுகூலபூ⁴தா ஸதி பு⁴ஸங் ட²பேதப்³பா³. இதி அனுஸாஸனீபாடிஹாரியந்தி எத்த² ஆதே³ஸனாபாடிஹாரியயோஜனாய விய யோஜனா காதப்³பா³. அப்³யாபாதா³தீ³ஸுபி ஏஸேவ நயோ. பாடோ² பன ஜா²னாதீ³னி ஸங்கி²பித்வா அந்தே அரஹத்தமக்³க³மேவ த³ஸ்ஸெத்வா லிகி²தோ. தத்த² சதூஸுபி மக்³கே³ஸு ‘‘ஏவங் ஆஸேவிதப்³போ³’’திஆதி³ ஏகசித்தக்க²ணிகத்தா மக்³க³ஸ்ஸ புப்³ப³பா⁴க³வஸேன வுத்தந்தி வேதி³தப்³ப³ங். மக்³க³ஸ்ஸ ஹி புப்³ப³பா⁴க³பூ⁴தாய லோகியமக்³க³ஸங்கா²தாய வுட்டா²னகா³மினியா விபஸ்ஸனாய மக்³கு³ப்பாத³னத்த²ங் ஆஸேவனாதீ³ஸு கதேஸு தாய உப்பன்னோ மக்³கோ³பி ஆஸேவிதோ பா⁴விதோ ப³ஹுலீகதோ நாம ஹோதீதி வேதி³தப்³ப³ங். ஸப்³ப³த்தி²கவாதா³சரியா பன ‘‘ஏகேகமக்³கோ³ ஸோளஸக்க²ணிகோ’’தி வத³ந்தி. தத³னுத⁴ம்மதாஸதிஉபட்டா²பனங் பன புப்³ப³பா⁴கே³ யுஜ்ஜதியேவாதி.
31. Idāni iddhipāṭihāriye aparaṃ pariyāyaṃ visesena dassento nekkhammaṃ ijjhatīti iddhītiādimāha. Tattha kāmacchandaṃ paṭiharatīti attano paṭipakkhabhūtaṃ kāmacchandaṃ paṭibalaṃ hutvā harati pajahatīti tadeva nekkhammaṃ pāṭihāriyaṃ nāmāti attho. Ye tena nekkhammena samannāgatāti evaṃ kāmacchandapaṭihārakena tena nekkhammena ye puggalā paṭilābhavasena samannāgatā. Visuddhacittāti kāmacchandābhāvato visuddhacittā. Anāvilasaṅkappāti kāmasaṅkappena anālulitanekkhammasaṅkappā. Iti ādesanāpāṭihāriyanti paracittakusalena vā aññena vā sammāsambuddhena vā buddhasāvakehi vā evaṃ ādesanā pāṭihāriyanti attho. Atha vā iti evaṃ ādisanaṃ ādesanāpāṭihāriyanti ādesanasaddo pāṭhasesaṃ katvā payujjitabbo. Evaṃ āsevitabbanti iminā ca pakārena iminā ca pakārena ādito sevitabbaṃ. Sesattayepi eseva nayo. Tadanudhammatā sati upaṭṭhapetabbāti tassa nekkhammassa anukūlabhūtā sati bhusaṃ ṭhapetabbā. Iti anusāsanīpāṭihāriyanti ettha ādesanāpāṭihāriyayojanāya viya yojanā kātabbā. Abyāpādādīsupi eseva nayo. Pāṭho pana jhānādīni saṅkhipitvā ante arahattamaggameva dassetvā likhito. Tattha catūsupi maggesu ‘‘evaṃ āsevitabbo’’tiādi ekacittakkhaṇikattā maggassa pubbabhāgavasena vuttanti veditabbaṃ. Maggassa hi pubbabhāgabhūtāya lokiyamaggasaṅkhātāya vuṭṭhānagāminiyā vipassanāya magguppādanatthaṃ āsevanādīsu katesu tāya uppanno maggopi āsevito bhāvito bahulīkato nāma hotīti veditabbaṃ. Sabbatthikavādācariyā pana ‘‘ekekamaggo soḷasakkhaṇiko’’ti vadanti. Tadanudhammatāsatiupaṭṭhāpanaṃ pana pubbabhāge yujjatiyevāti.
32. புன நெக்க²ம்மங் இஜ்ஜ²தீதி இத்³தீ⁴திஆதீ³னி ‘‘இத்³தி⁴பாடிஹாரிய’’ந்திபத³ஸ்ஸ கம்மதா⁴ரயஸமாஸத்ததீ³பனத்த²ங் வுத்தானி. ஸுத்தந்தே வுத்தேஸு தீஸு இத்³தி⁴பாடிஹாரியஸ்ஸேவ ஸமாஸத்தே வுத்தே ஸேஸானங் த்³வின்னம்பி வுத்தோவ ஹோதீதி இமஸ்மிங் பரியாயே மூலபூ⁴தஸ்ஸ இத்³தி⁴பாடிஹாரியஸ்ஸேவ ஸமாஸத்தோ² வுத்தோதி வேதி³தப்³ப³ந்தி.
32. Puna nekkhammaṃ ijjhatīti iddhītiādīni ‘‘iddhipāṭihāriya’’ntipadassa kammadhārayasamāsattadīpanatthaṃ vuttāni. Suttante vuttesu tīsu iddhipāṭihāriyasseva samāsatte vutte sesānaṃ dvinnampi vuttova hotīti imasmiṃ pariyāye mūlabhūtassa iddhipāṭihāriyasseva samāsattho vuttoti veditabbanti.
பாடிஹாரியகதா²வண்ணனா நிட்டி²தா.
Pāṭihāriyakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 6. பாடிஹாரியகதா² • 6. Pāṭihāriyakathā
