| Library / Tipiṭaka / ཏིཔིཊཀ • Tipiṭaka / ཝིནཡཝིནིཙྪཡ-ཊཱིཀཱ • Vinayavinicchaya-ṭīkā |
པཱཊིདེསནཱིཡཀཐཱཝཎྞནཱ
Pāṭidesanīyakathāvaṇṇanā
༢༤༣༢. ཨེཝཾ པཱཙིཏྟིཡཝིནིཙྪཡཾ དསྶེཏྭཱ ཨིདཱནི པཱཊིདེསནཱིཡཾ དསྶེཏུམཱཧ ‘‘ཨགིལཱནཱ’’ཏིཨཱདི། ཡཱ པན བྷིཀྑུནཱི ཨགིལཱནཱ སཡཾ ཨཏྟནཱ ཝིཉྙཏྟིཡཱ ལདྡྷཾ སཔྤིཾ སཙེ ‘‘བྷུཉྫིསྶཱམཱི’’ཏི གཎྷཏི, ཏསྶཱ ཨེཝཾ གཧཎེ དུཀྐཊཾ པརིདཱིཔིཏནྟི ཡོཛནཱ། ཏཏྠ ཡསྶཱ ཝིནཱ སཔྤིནཱ ཕཱསུ ཧོཏི, སཱ ཨགིལཱནཱ ནཱམ། སཔྤིནྟི པུབྦེ ཝུཏྟཝིནིཙྪཡཾ པཱལི༹ཨཱགཏཾ གོསཔྤིཨཱདིཀམེཝ།
2432. Evaṃ pācittiyavinicchayaṃ dassetvā idāni pāṭidesanīyaṃ dassetumāha ‘‘agilānā’’tiādi. Yā pana bhikkhunī agilānā sayaṃ attanā viññattiyā laddhaṃ sappiṃ sace ‘‘bhuñjissāmī’’ti gaṇhati, tassā evaṃ gahaṇe dukkaṭaṃ paridīpitanti yojanā. Tattha yassā vinā sappinā phāsu hoti, sā agilānā nāma. Sappinti pubbe vuttavinicchayaṃ pāḷiāgataṃ gosappiādikameva.
༢༤༣༣. ཏིཔཱཊིདེསནཱིཡནྟི ཨགིལཱནཱ ཨགིལཱནསཉྙཱ, ཝེམཏིཀཱ, གིལཱནསཉྙཱཏི ཏཱིསུ ཝིཀཔྤེསུ ཏཱིཎི པཱཊིདེསནཱིཡཱནི། གིལཱནཱ དྭིཀདུཀྐཊནྟི གིལཱནཱཡ དྭིཀདུཀྐཊཾ། གིལཱནཱ ཨགིལཱནསཉྙཱ, ཝེམཏིཀཱ ཝཱཏི དྭཱིསུ ཝིཀཔྤེསུ དྭེ དུཀྐཊཱནི།
2433.Tipāṭidesanīyanti agilānā agilānasaññā, vematikā, gilānasaññāti tīsu vikappesu tīṇi pāṭidesanīyāni. Gilānā dvikadukkaṭanti gilānāya dvikadukkaṭaṃ. Gilānā agilānasaññā, vematikā vāti dvīsu vikappesu dve dukkaṭāni.
༢༤༣༤-༥. གིལཱནཱ ཧུཏྭཱ སཔྤིཾ ཝིཉྙཱཔེཏྭཱ པཙྪཱ ཝཱུཔསནྟགེལཉྙཱ ཧུཏྭཱ སེཝནྟིཡཱ པརིབྷུཉྫནྟིཡཱཔི ཙ གིལཱནཱཡ ཨཝསེསཾ པརིབྷུཉྫནྟིཡཱ ཝཱ ཉཱཏཀཱདིཏོ ཉཱཏཀཔཝཱརིཏཊྛཱནཏོ ཝིཉྙཏྟཾ བྷུཉྫནྟིཡཱ ཝཱ ཨཉྙསྶཏྠཱཡ ཝིཉྙཏྟཾ པརིབྷུཉྫནྟིཡཱ ཝཱ ཨཏྟནོ དྷནེན གཧིཏཾ བྷུཉྫནྟིཡཱ ཝཱ ཨུམྨཏྟིཀཱཡ ཝཱ ཨནཱཔཏྟཱིཏི ཡོཛནཱ།
2434-5. Gilānā hutvā sappiṃ viññāpetvā pacchā vūpasantagelaññā hutvā sevantiyā paribhuñjantiyāpi ca gilānāya avasesaṃ paribhuñjantiyā vā ñātakādito ñātakapavāritaṭṭhānato viññattaṃ bhuñjantiyā vā aññassatthāya viññattaṃ paribhuñjantiyā vā attano dhanena gahitaṃ bhuñjantiyā vā ummattikāya vā anāpattīti yojanā.
པཋམཾ།
Paṭhamaṃ.
༢༤༣༦. སེསེསུ དུཏིཡཱདཱིསཱུཏི ‘‘ཡཱ པན བྷིཀྑུནཱི ཨགིལཱནཱ ཏེལཾ…པེ॰… མདྷུཾ…པེ॰… ཕཱཎིཏཾ…པེ॰… མཙྪཾ…པེ॰… མཾསཾ…པེ॰… ཁཱིརཾ…པེ॰… དདྷིཾ ཝིཉྙཱཔེཏྭཱ བྷུཉྫེཡྻ, པཊིདེསེཏབྦཾ ཏཱཡ བྷིཀྑུནིཡཱ གཱརཡ྄ཧཾ ཨཡྻེ དྷམྨཾ ཨཱཔཛྫིཾ ཨསཔྤཱཡཾ པཱཊིདེསནཱིཡཾ, ཏཾ པཊིདེསེམཱི’’ཏི (པཱཙི॰ ༡༢༣༦) ཨེཝཾ དུཏིཡཱདཱིསུ སཏྟསུ པཱཊིདེསནཱིཡེསུ། ནཏྠི ཀཱཙི ཝིསེསཏཱཏི ཏེལཱདིཔདཱནི ཝིནཱ ཨཉྙོ ཀོཙི ཝིསེསོ ནཏྠཱིཏི ཨཏྠོ།
2436.Sesesu dutiyādīsūti ‘‘yā pana bhikkhunī agilānā telaṃ…pe… madhuṃ…pe… phāṇitaṃ…pe… macchaṃ…pe… maṃsaṃ…pe… khīraṃ…pe… dadhiṃ viññāpetvā bhuñjeyya, paṭidesetabbaṃ tāya bhikkhuniyā gārayhaṃ ayye dhammaṃ āpajjiṃ asappāyaṃ pāṭidesanīyaṃ, taṃ paṭidesemī’’ti (pāci. 1236) evaṃ dutiyādīsu sattasu pāṭidesanīyesu. Natthi kāci visesatāti telādipadāni vinā añño koci viseso natthīti attho.
༢༤༣༧. པཱལི༹ཡཾ ཨནཱགཏེསུ སབྦེསུ སཔྤིཨཱདཱིསུ ཨཊྛསུ ཨཉྙཏརཾ ཝིཉྙཱཔེཏྭཱ བྷུཉྫནྟིཡཱཔི དུཀྐཊནྟི ཡོཛནཱ།
2437. Pāḷiyaṃ anāgatesu sabbesu sappiādīsu aṭṭhasu aññataraṃ viññāpetvā bhuñjantiyāpi dukkaṭanti yojanā.
ཨིཏི ཝིནཡཏྠསཱརསནྡཱིཔནིཡཱ ཝིནཡཝིནིཙྪཡཝཎྞནཱཡ
Iti vinayatthasārasandīpaniyā vinayavinicchayavaṇṇanāya
པཱཊིདེསནཱིཡཀཐཱཝཎྞནཱ ནིཊྛིཏཱ།
Pāṭidesanīyakathāvaṇṇanā niṭṭhitā.
