| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
२. पटिभानसुत्तवण्णना
2. Paṭibhānasuttavaṇṇanā
१३२. दुतिये पटिभानं वुच्चति ञाणम्पि ञाणस्स उपट्ठितवचनम्पि, तं इध अधिप्पेतं, अत्थयुत्तं कारणयुत्तञ्च पटिभानमस्साति युत्तप्पटिभानो। पुच्छानन्तरमेव सीघं ब्याकातुं असमत्थताय नोमुत्तप्पटिभानमस्साति नोमुत्तप्पटिभानो। इमिना नयेन सेसा वेदितब्बा। एत्थ पन पठमो कञ्चि कालं वीमंसित्वा युत्तमेव पेक्खति तिपिटकचूळनागत्थेरो विय। सो पन पञ्हं पुट्ठो परिग्गहेत्वा युत्तप्पत्तकारणमेव कथेति। दुतियो पुच्छानन्तरमेव येन वा तेन वा वचनेन पटिबाहति, वीमंसित्वापि च युत्तं न पक्खेति चतुनिकायिकपिण्डतिस्सत्थेरो विय। सो पन पञ्हं पुट्ठो पञ्हपरियोसानम्पि नागमेति, यं वा तं वा कथेतियेव, वचनत्थं पनस्स वीमंसियमानं कत्थचि न लगति। ततियो पुच्छासमकालमेव युत्तं पेक्खति, तंखणंयेव च नं ब्याकरोति तिपिटकचूळाभयत्थेरो विय। सो पन पञ्हं पुट्ठो सीघमेव कथेति, युत्तप्पत्तकारणो च होति। चतुत्थो पुट्ठो समानो नेव युत्तं पेक्खति, न येन वा तेन वा पटिबाहितुं सक्कोति, तिब्बन्धकारनिमुग्गो विय होति लाळुदायित्थेरो विय।
132. Dutiye paṭibhānaṃ vuccati ñāṇampi ñāṇassa upaṭṭhitavacanampi, taṃ idha adhippetaṃ, atthayuttaṃ kāraṇayuttañca paṭibhānamassāti yuttappaṭibhāno. Pucchānantarameva sīghaṃ byākātuṃ asamatthatāya nomuttappaṭibhānamassāti nomuttappaṭibhāno. Iminā nayena sesā veditabbā. Ettha pana paṭhamo kañci kālaṃ vīmaṃsitvā yuttameva pekkhati tipiṭakacūḷanāgatthero viya. So pana pañhaṃ puṭṭho pariggahetvā yuttappattakāraṇameva katheti. Dutiyo pucchānantarameva yena vā tena vā vacanena paṭibāhati, vīmaṃsitvāpi ca yuttaṃ na pakkheti catunikāyikapiṇḍatissatthero viya. So pana pañhaṃ puṭṭho pañhapariyosānampi nāgameti, yaṃ vā taṃ vā kathetiyeva, vacanatthaṃ panassa vīmaṃsiyamānaṃ katthaci na lagati. Tatiyo pucchāsamakālameva yuttaṃ pekkhati, taṃkhaṇaṃyeva ca naṃ byākaroti tipiṭakacūḷābhayatthero viya. So pana pañhaṃ puṭṭho sīghameva katheti, yuttappattakāraṇo ca hoti. Catuttho puṭṭho samāno neva yuttaṃ pekkhati, na yena vā tena vā paṭibāhituṃ sakkoti, tibbandhakāranimuggo viya hoti lāḷudāyitthero viya.
पटिभानसुत्तवण्णना निट्ठिता।
Paṭibhānasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya / २. पटिभानसुत्तं • 2. Paṭibhānasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā) / २. पटिभानसुत्तवण्णना • 2. Paṭibhānasuttavaṇṇanā
