| Library / Tipiṭaka / တိပိဋက • Tipiṭaka / ပဉ္စပကရဏ-မူလဋီကာ • Pañcapakaraṇa-mūlaṭīkā |
၇. ပထဝီကမ္မဝိပာကောတိကထာဝဏ္ဏနာ
7. Pathavīkammavipākotikathāvaṇṇanā
၄၉၂. ဖသ္သော သုခဝေဒနီယာဒိဘေဒော ဟောတီတိ ဖသ္သေန သဗ္ဗမ္ပိ ကမ္မဝိပာကံ ဒသ္သေတ္ဝာ ပုန အတ္တဝဇ္ဇေဟိ သမ္ပယောဂဒသ္သနတ္ထံ ‘‘သော စ သညာဒယော စာ’’တိအာဒိ ဝုတ္တံ။ အတ္ထိ စ နေသန္တိ သာဝဇ္ဇနေ စက္ခုဝိညာဏာဒိသဟဇာတဓမ္မေ သန္ဓာယ ဝုတ္တံ။ ယော တတ္ထ ဣဋ္ဌဝိပာကော, တသ္သ ပတ္ထနာတိ ဣဋ္ဌဝိပာကေ ဧဝ ပတ္ထနံ ကတ္ဝာ ကမ္မံ ကရောန္တီတိ ကမ္မူပနိသ္သယဘူတမေဝ ပတ္ထနံ ဒသ္သေတိ, ပစ္စုပ္ပန္နဝေဒနာပစ္စယံ ဝာ တဏ္ဟံ ဥပာဒာနာဒိနိဗ္ဗတ္တနဝသေန ဒုက္ခသ္သ ပဘာဝိတံ။ မူလတဏ္ဟာတိ ပစ္စုပ္ပန္နဝိပာကဝဋ္ဋနိဗ္ဗတ္တကကမ္မသ္သ ဥပနိသ္သယဘူတံ ပုရိမတဏ္ဟံ, ကမ္မသဟာယံ ဝာ ဝိပာကသ္သ ဥပနိသ္သယဘူတံ။
492. Phassosukhavedanīyādibhedo hotīti phassena sabbampi kammavipākaṃ dassetvā puna attavajjehi sampayogadassanatthaṃ ‘‘so ca saññādayo cā’’tiādi vuttaṃ. Atthi ca nesanti sāvajjane cakkhuviññāṇādisahajātadhamme sandhāya vuttaṃ. Yo tattha iṭṭhavipāko, tassa patthanāti iṭṭhavipāke eva patthanaṃ katvā kammaṃ karontīti kammūpanissayabhūtameva patthanaṃ dasseti, paccuppannavedanāpaccayaṃ vā taṇhaṃ upādānādinibbattanavasena dukkhassa pabhāvitaṃ. Mūlataṇhāti paccuppannavipākavaṭṭanibbattakakammassa upanissayabhūtaṃ purimataṇhaṃ, kammasahāyaṃ vā vipākassa upanissayabhūtaṃ.
၄၉၃. သကသမယဝသေန စ စောဒနာယ ပယုဇ္ဇမာနတံ ဒသ္သေတုံ ‘‘တေသဉ္စ လဒ္ဓိယာ’’တိအာဒိမာဟ။
493. Sakasamayavasena ca codanāya payujjamānataṃ dassetuṃ ‘‘tesañca laddhiyā’’tiādimāha.
၄၉၄. ပဋိလာဘဝသေနာတိ ကမ္မေ သတိ ပထဝိယာဒီနံ ပဋိလာဘော ဟောတီတိ ကမ္မံ တံသံဝတ္တနိကံ နာမ ဟောတီတိ ဒသ္သေတိ။
494. Paṭilābhavasenāti kamme sati pathaviyādīnaṃ paṭilābho hotīti kammaṃ taṃsaṃvattanikaṃ nāma hotīti dasseti.
ပထဝီကမ္မဝိပာကောတိကထာဝဏ္ဏနာ နိဋ္ဌိတာ။
Pathavīkammavipākotikathāvaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၆၉) ၇. ပထဝီ ကမ္မဝိပာကောတိကထာ • (69) 7. Pathavī kammavipākotikathā
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၇. ပထဝီကမ္မဝိပာကောတိကထာဝဏ္ဏနာ • 7. Pathavīkammavipākotikathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၇. ပထဝီကမ္မဝိပာကောတိကထာဝဏ္ဏနာ • 7. Pathavīkammavipākotikathāvaṇṇanā
