| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൬. ഛട്ഠവഗ്ഗോ
6. Chaṭṭhavaggo
(൬൦) ൮. പഥവീധാതു സനിദസ്സനാതിആദികഥാ
(60) 8. Pathavīdhātu sanidassanātiādikathā
൪൬൫. പഥവീധാതു സനിദസ്സനാതി? ആമന്താ. രൂപം രൂപായതനം രൂപധാതു നീലം പീതകം ലോഹിതകം ഓദാതം ചക്ഖുവിഞ്ഞേയ്യം ചക്ഖുസ്മിം പടിഹഞ്ഞതി ചക്ഖുസ്സ ആപാഥം ആഗച്ഛതീതി? ന ഹേവം വത്തബ്ബേ…പേ॰….
465. Pathavīdhātu sanidassanāti? Āmantā. Rūpaṃ rūpāyatanaṃ rūpadhātu nīlaṃ pītakaṃ lohitakaṃ odātaṃ cakkhuviññeyyaṃ cakkhusmiṃ paṭihaññati cakkhussa āpāthaṃ āgacchatīti? Na hevaṃ vattabbe…pe….
പഥവീധാതു സനിദസ്സനാതി? ആമന്താ. ചക്ഖുഞ്ച പടിച്ച പഥവീധാതുഞ്ച ഉപ്പജ്ജതി ചക്ഖുവിഞ്ഞാണന്തി? ന ഹേവം വത്തബ്ബേ…പേ॰….
Pathavīdhātu sanidassanāti? Āmantā. Cakkhuñca paṭicca pathavīdhātuñca uppajjati cakkhuviññāṇanti? Na hevaṃ vattabbe…pe….
ചക്ഖുഞ്ച പടിച്ച പഥവീധാതുഞ്ച ഉപ്പജ്ജതി ചക്ഖുവിഞ്ഞാണന്തി? ആമന്താ. ‘‘ചക്ഖുഞ്ച പടിച്ച പഥവീധാതുഞ്ച ഉപ്പജ്ജതി ചക്ഖുവിഞ്ഞാണ’’ന്തി – അത്ഥേവ സുത്തന്തോതി? നത്ഥി. ‘‘ചക്ഖുഞ്ച പടിച്ച രൂപേ ച ഉപ്പജ്ജതി ചക്ഖുവിഞ്ഞാണ’’ന്തി – അത്ഥേവ സുത്തന്തോതി? ആമന്താ. ഹഞ്ചി ‘‘ചക്ഖുഞ്ച പടിച്ച രൂപേ ച ഉപ്പജ്ജതി ചക്ഖുവിഞ്ഞാണ’’ന്തി – അത്ഥേവ സുത്തന്തോ, നോ ച വത രേ വത്തബ്ബേ – ‘‘ചക്ഖുഞ്ച പടിച്ച പഥവീധാതുഞ്ച ഉപ്പജ്ജതി ചക്ഖുവിഞ്ഞാണ’’ന്തി.
Cakkhuñca paṭicca pathavīdhātuñca uppajjati cakkhuviññāṇanti? Āmantā. ‘‘Cakkhuñca paṭicca pathavīdhātuñca uppajjati cakkhuviññāṇa’’nti – attheva suttantoti? Natthi. ‘‘Cakkhuñca paṭicca rūpe ca uppajjati cakkhuviññāṇa’’nti – attheva suttantoti? Āmantā. Hañci ‘‘cakkhuñca paṭicca rūpe ca uppajjati cakkhuviññāṇa’’nti – attheva suttanto, no ca vata re vattabbe – ‘‘cakkhuñca paṭicca pathavīdhātuñca uppajjati cakkhuviññāṇa’’nti.
൪൬൬. ന വത്തബ്ബം – ‘‘പഥവീധാതു സനിദസ്സനാ’’തി? ആമന്താ. നനു പസ്സതി ഭൂമിം പാസാണം പബ്ബതന്തി? ആമന്താ. ഹഞ്ചി പസ്സതി 1 ഭൂമിം പാസാണം പബ്ബതം, തേന വത രേ വത്തബ്ബേ – ‘‘പഥവീധാതു സനിദസ്സനാ’’തി…പേ॰….
466. Na vattabbaṃ – ‘‘pathavīdhātu sanidassanā’’ti? Āmantā. Nanu passati bhūmiṃ pāsāṇaṃ pabbatanti? Āmantā. Hañci passati 2 bhūmiṃ pāsāṇaṃ pabbataṃ, tena vata re vattabbe – ‘‘pathavīdhātu sanidassanā’’ti…pe….
ന വത്തബ്ബം – ‘‘ആപോധാതു സനിദസ്സനാ’’തി? ആമന്താ. നനു പസ്സതി ഉദകന്തി? ആമന്താ. ഹഞ്ചി പസ്സതി ഉദകം, തേന വത രേ വത്തബ്ബേ – ‘‘ആപോധാതു സനിദസ്സനാതി…പേ॰….
Na vattabbaṃ – ‘‘āpodhātu sanidassanā’’ti? Āmantā. Nanu passati udakanti? Āmantā. Hañci passati udakaṃ, tena vata re vattabbe – ‘‘āpodhātu sanidassanāti…pe….
ന വത്തബ്ബം – തേജോധാതു സനിദസ്സനാതി? ആമന്താ. നനു പസ്സതി അഗ്ഗിം ജലന്തന്തി? ആമന്താ. ഹഞ്ചി പസ്സതി അഗ്ഗിം ജലന്തം, തേന വത രേ വത്തബ്ബേ – ‘‘തേജോധാതു സനിദസ്സനാ’’തി…പേ॰….
Na vattabbaṃ – tejodhātu sanidassanāti? Āmantā. Nanu passati aggiṃ jalantanti? Āmantā. Hañci passati aggiṃ jalantaṃ, tena vata re vattabbe – ‘‘tejodhātu sanidassanā’’ti…pe….
ന വത്തബ്ബം – ‘‘വായോധാതു സനിദസ്സനാ’’തി? ആമന്താ. നനു പസ്സതി വാതേന രുക്ഖേ സഞ്ചാലിയമാനേതി? ആമന്താ. ഹഞ്ചി പസ്സതി വാതേന രുക്ഖേ സഞ്ചാലിയമാനേ, തേന വത രേ വത്തബ്ബേ – ‘‘വായോധാതു സനിദസ്സനാ’’തി…പേ॰….
Na vattabbaṃ – ‘‘vāyodhātu sanidassanā’’ti? Āmantā. Nanu passati vātena rukkhe sañcāliyamāneti? Āmantā. Hañci passati vātena rukkhe sañcāliyamāne, tena vata re vattabbe – ‘‘vāyodhātu sanidassanā’’ti…pe….
പഥവീധാതു സനിദസ്സനാതിആദികഥാ നിട്ഠിതാ.
Pathavīdhātu sanidassanātiādikathā niṭṭhitā.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൧൦. പഥവീധാതുസനിദസ്സനാതിആദികഥാവണ്ണനാ • 10. Pathavīdhātusanidassanātiādikathāvaṇṇanā
