| Library / Tipiṭaka / ತಿಪಿಟಕ • Tipiṭaka / ಕಥಾವತ್ಥುಪಾಳಿ • Kathāvatthupāḷi |
೭. ಸತ್ತಮವಗ್ಗೋ
7. Sattamavaggo
(೬೯) ೭. ಪಥವೀ ಕಮ್ಮವಿಪಾಕೋತಿಕಥಾ
(69) 7. Pathavī kammavipākotikathā
೪೯೨. ಪಥವೀ ಕಮ್ಮವಿಪಾಕೋತಿ? ಆಮನ್ತಾ। ಸುಖವೇದನಿಯಾ ದುಕ್ಖವೇದನಿಯಾ ಅದುಕ್ಖಮಸುಖವೇದನಿಯಾ, ಸುಖಾಯ ವೇದನಾಯ ಸಮ್ಪಯುತ್ತಾ, ದುಕ್ಖಾಯ ವೇದನಾಯ ಸಮ್ಪಯುತ್ತಾ, ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ, ಫಸ್ಸೇನ ಸಮ್ಪಯುತ್ತಾ, ವೇದನಾಯ ಸಮ್ಪಯುತ್ತಾ, ಸಞ್ಞಾಯ ಸಮ್ಪಯುತ್ತಾ, ಚೇತನಾಯ ಸಮ್ಪಯುತ್ತಾ, ಚಿತ್ತೇನ ಸಮ್ಪಯುತ್ತಾ, ಸಾರಮ್ಮಣಾ; ಅತ್ಥಿ ತಾಯ ಆವಟ್ಟನಾ 1 ಆಭೋಗೋ ಸಮನ್ನಾಹಾರೋ ಮನಸಿಕಾರೋ ಚೇತನಾ ಪತ್ಥನಾ ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ॰… ನನು ನ ಸುಖವೇದನಿಯಾ ನ ದುಕ್ಖವೇದನಿಯಾ ನ ಅದುಕ್ಖಮಸುಖವೇದನಿಯಾ, ನ ಸುಖಾಯ ವೇದನಾಯ ಸಮ್ಪಯುತ್ತಾ, ನ ದುಕ್ಖಾಯ ವೇದನಾಯ ಸಮ್ಪಯುತ್ತಾ, ನ ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ, ನ ಫಸ್ಸೇನ ಸಮ್ಪಯುತ್ತಾ, ನ ವೇದನಾಯ ಸಮ್ಪಯುತ್ತಾ, ನ ಸಞ್ಞಾಯ ಸಮ್ಪಯುತ್ತಾ, ನ ಚೇತನಾಯ ಸಮ್ಪಯುತ್ತಾ, ನ ಚಿತ್ತೇನ ಸಮ್ಪಯುತ್ತಾ, ಅನಾರಮ್ಮಣಾ; ನತ್ಥಿ ತಾಯ ಆವಟ್ಟನಾ ಆಭೋಗೋ ಸಮನ್ನಾಹಾರೋ ಮನಸಿಕಾರೋ ಚೇತನಾ ಪತ್ಥನಾ ಪಣಿಧೀತಿ? ಆಮನ್ತಾ। ಹಞ್ಚಿ ನ ಸುಖವೇದನಿಯಾ ನ ದುಕ್ಖವೇದನಿಯಾ…ಪೇ॰… ಅನಾರಮ್ಮಣಾ; ನತ್ಥಿ ತಾಯ ಆವಟ್ಟನಾ…ಪೇ॰… ಪಣಿಧಿ, ನೋ ಚ ವತ ರೇ ವತ್ತಬ್ಬೇ – ‘‘ಪಥವೀ ಕಮ್ಮವಿಪಾಕೋ’’ತಿ।
492. Pathavī kammavipākoti? Āmantā. Sukhavedaniyā dukkhavedaniyā adukkhamasukhavedaniyā, sukhāya vedanāya sampayuttā, dukkhāya vedanāya sampayuttā, adukkhamasukhāya vedanāya sampayuttā, phassena sampayuttā, vedanāya sampayuttā, saññāya sampayuttā, cetanāya sampayuttā, cittena sampayuttā, sārammaṇā; atthi tāya āvaṭṭanā 2 ābhogo samannāhāro manasikāro cetanā patthanā paṇidhīti? Na hevaṃ vattabbe…pe… nanu na sukhavedaniyā na dukkhavedaniyā na adukkhamasukhavedaniyā, na sukhāya vedanāya sampayuttā, na dukkhāya vedanāya sampayuttā, na adukkhamasukhāya vedanāya sampayuttā, na phassena sampayuttā, na vedanāya sampayuttā, na saññāya sampayuttā, na cetanāya sampayuttā, na cittena sampayuttā, anārammaṇā; natthi tāya āvaṭṭanā ābhogo samannāhāro manasikāro cetanā patthanā paṇidhīti? Āmantā. Hañci na sukhavedaniyā na dukkhavedaniyā…pe… anārammaṇā; natthi tāya āvaṭṭanā…pe… paṇidhi, no ca vata re vattabbe – ‘‘pathavī kammavipāko’’ti.
ಫಸ್ಸೋ ಕಮ್ಮವಿಪಾಕೋ, ಫಸ್ಸೋ ಸುಖವೇದನಿಯೋ ದುಕ್ಖವೇದನಿಯೋ ಅದುಕ್ಖಮಸುಖವೇದನಿಯೋ ಸುಖಾಯ ವೇದನಾಯ ಸಮ್ಪಯುತ್ತೋ ದುಕ್ಖಾಯ…ಪೇ॰… ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತೋ ಫಸ್ಸೇನ ಸಮ್ಪಯುತ್ತೋ ವೇದನಾಯ ಸಮ್ಪಯುತ್ತೋ ಸಞ್ಞಾಯ ಸಮ್ಪಯುತ್ತೋ ಚೇತನಾಯ ಸಮ್ಪಯುತ್ತೋ ಚಿತ್ತೇನ ಸಮ್ಪಯುತ್ತೋ ಸಾರಮ್ಮಣೋ; ಅತ್ಥಿ ತಸ್ಸ ಆವಟ್ಟನಾ…ಪೇ॰… ಪಣಿಧೀತಿ? ಆಮನ್ತಾ। ಪಥವೀ ಕಮ್ಮವಿಪಾಕೋ, ಪಥವೀ ಸುಖವೇದನಿಯಾ ದುಕ್ಖವೇದನಿಯಾ ಅದುಕ್ಖಮಸುಖವೇದನಿಯಾ ಸುಖಾಯ ವೇದನಾಯ ಸಮ್ಪಯುತ್ತಾ ದುಕ್ಖಾಯ…ಪೇ॰… ಅದುಕ್ಖಮಸುಖಾಯ ವೇದನಾಯ ಸಮ್ಪಯುತ್ತಾ ಫಸ್ಸೇನ ಸಮ್ಪಯುತ್ತಾ ವೇದನಾಯ ಸಮ್ಪಯುತ್ತಾ ಸಞ್ಞಾಯ ಸಮ್ಪಯುತ್ತಾ ಚೇತನಾಯ ಸಮ್ಪಯುತ್ತಾ ಚಿತ್ತೇನ ಸಮ್ಪಯುತ್ತಾ ಸಾರಮ್ಮಣಾ; ಅತ್ಥಿ ತಾಯ ಆವಟ್ಟನಾ ಆಭೋಗೋ ಸಮನ್ನಾಹಾರೋ ಮನಸಿಕಾರೋ ಚೇತನಾ ಪತ್ಥನಾ ಪಣಿಧೀತಿ? ನ ಹೇವಂ ವತ್ತಬ್ಬೇ …ಪೇ॰… ಪಥವೀ ಕಮ್ಮವಿಪಾಕೋ, ಪಥವೀ ನ ಸುಖವೇದನಿಯಾ ನ ದುಕ್ಖವೇದನಿಯಾ…ಪೇ॰… ಅನಾರಮ್ಮಣಾ; ನತ್ಥಿ ತಾಯ ಆವಟ್ಟನಾ…ಪೇ॰… ಪಣಿಧೀತಿ? ಆಮನ್ತಾ। ಫಸ್ಸೋ ಕಮ್ಮವಿಪಾಕೋ, ಫಸ್ಸೋ ನ ಸುಖವೇದನಿಯೋ ನ ದುಕ್ಖವೇದನಿಯೋ …ಪೇ॰… ಅನಾರಮ್ಮಣೋ; ನತ್ಥಿ ತಸ್ಸ ಆವಟ್ಟನಾ…ಪೇ॰… ಪಣಿಧೀತಿ? ನ ಹೇವಂ ವತ್ತಬ್ಬೇ…ಪೇ॰…।
Phasso kammavipāko, phasso sukhavedaniyo dukkhavedaniyo adukkhamasukhavedaniyo sukhāya vedanāya sampayutto dukkhāya…pe… adukkhamasukhāya vedanāya sampayutto phassena sampayutto vedanāya sampayutto saññāya sampayutto cetanāya sampayutto cittena sampayutto sārammaṇo; atthi tassa āvaṭṭanā…pe… paṇidhīti? Āmantā. Pathavī kammavipāko, pathavī sukhavedaniyā dukkhavedaniyā adukkhamasukhavedaniyā sukhāya vedanāya sampayuttā dukkhāya…pe… adukkhamasukhāya vedanāya sampayuttā phassena sampayuttā vedanāya sampayuttā saññāya sampayuttā cetanāya sampayuttā cittena sampayuttā sārammaṇā; atthi tāya āvaṭṭanā ābhogo samannāhāro manasikāro cetanā patthanā paṇidhīti? Na hevaṃ vattabbe …pe… pathavī kammavipāko, pathavī na sukhavedaniyā na dukkhavedaniyā…pe… anārammaṇā; natthi tāya āvaṭṭanā…pe… paṇidhīti? Āmantā. Phasso kammavipāko, phasso na sukhavedaniyo na dukkhavedaniyo …pe… anārammaṇo; natthi tassa āvaṭṭanā…pe… paṇidhīti? Na hevaṃ vattabbe…pe….
ಪಥವೀ ಕಮ್ಮವಿಪಾಕೋತಿ? ಆಮನ್ತಾ। ಪಥವೀ ಪಗ್ಗಹನಿಗ್ಗಹುಪಗಾ ಛೇದನಭೇದನುಪಗಾತಿ? ಆಮನ್ತಾ । ಕಮ್ಮವಿಪಾಕೋ ಪಗ್ಗಹನಿಗ್ಗಹುಪಗೋ ಛೇದನಭೇದನುಪಗೋತಿ? ನ ಹೇವಂ ವತ್ತಬ್ಬೇ…ಪೇ॰…।
Pathavī kammavipākoti? Āmantā. Pathavī paggahaniggahupagā chedanabhedanupagāti? Āmantā . Kammavipāko paggahaniggahupago chedanabhedanupagoti? Na hevaṃ vattabbe…pe….
ಲಬ್ಭಾ ಪಥವೀ ಕೇತುಂ ವಿಕ್ಕೇತುಂ ಆಠಪೇತುಂ ಓಚಿನಿತುಂ ವಿಚಿನಿತುನ್ತಿ? ಆಮನ್ತಾ। ಲಬ್ಭಾ ಕಮ್ಮವಿಪಾಕೋ ಕೇತುಂ ವಿಕ್ಕೇತುಂ ಆಠಪೇತುಂ ಓಚಿನಿತುಂ ವಿಚಿನಿತುನ್ತಿ? ನ ಹೇವಂ ವತ್ತಬ್ಬೇ…ಪೇ॰…।
Labbhā pathavī ketuṃ vikketuṃ āṭhapetuṃ ocinituṃ vicinitunti? Āmantā. Labbhā kammavipāko ketuṃ vikketuṃ āṭhapetuṃ ocinituṃ vicinitunti? Na hevaṃ vattabbe…pe….
೪೯೩. ಪಥವೀ ಪರೇಸಂ ಸಾಧಾರಣಾತಿ? ಆಮನ್ತಾ। ಕಮ್ಮವಿಪಾಕೋ ಪರೇಸಂ ಸಾಧಾರಣೋತಿ? ನ ಹೇವಂ ವತ್ತಬ್ಬೇ…ಪೇ॰…।
493. Pathavī paresaṃ sādhāraṇāti? Āmantā. Kammavipāko paresaṃ sādhāraṇoti? Na hevaṃ vattabbe…pe….
ಕಮ್ಮವಿಪಾಕೋ ಪರೇಸಂ ಸಾಧಾರಣೋತಿ? ಆಮನ್ತಾ। ನನು ವುತ್ತಂ ಭಗವತಾ –
Kammavipāko paresaṃ sādhāraṇoti? Āmantā. Nanu vuttaṃ bhagavatā –
‘‘ಅಸಾಧಾರಣಮಞ್ಞೇಸಂ, ಅಚೋರಹರಣೋ ನಿಧಿ।
‘‘Asādhāraṇamaññesaṃ, acoraharaṇo nidhi;
ಅತ್ಥೇವ ಸುತ್ತನ್ತೋತಿ? ಆಮನ್ತಾ। ತೇನ ಹಿ ನ ವತ್ತಬ್ಬಂ – ‘‘ಕಮ್ಮವಿಪಾಕೋ ಪರೇಸಂ ಸಾಧಾರಣೋ’’ತಿ।
Attheva suttantoti? Āmantā. Tena hi na vattabbaṃ – ‘‘kammavipāko paresaṃ sādhāraṇo’’ti.
ಪಥವೀ ಕಮ್ಮವಿಪಾಕೋತಿ? ಆಮನ್ತಾ। ಪಠಮಂ ಪಥವೀ ಸಣ್ಠಾತಿ, ಪಚ್ಛಾ ಸತ್ತಾ ಉಪ್ಪಜ್ಜನ್ತೀತಿ? ಆಮನ್ತಾ। ಪಠಮಂ ವಿಪಾಕೋ ಉಪ್ಪಜ್ಜತಿ, ಪಚ್ಛಾ ವಿಪಾಕಪಟಿಲಾಭಾಯ ಕಮ್ಮಂ ಕರೋನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Pathavī kammavipākoti? Āmantā. Paṭhamaṃ pathavī saṇṭhāti, pacchā sattā uppajjantīti? Āmantā. Paṭhamaṃ vipāko uppajjati, pacchā vipākapaṭilābhāya kammaṃ karontīti? Na hevaṃ vattabbe…pe….
ಪಥವೀ ಸಬ್ಬಸತ್ತಾನಂ ಕಮ್ಮವಿಪಾಕೋತಿ? ಆಮನ್ತಾ । ಸಬ್ಬೇ ಸತ್ತಾ ಪಥವಿಂ ಪರಿಭುಞ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰… ಸಬ್ಬೇ ಸತ್ತಾ ಪಥವಿಂ ಪರಿಭುಞ್ಜನ್ತೀತಿ? ಆಮನ್ತಾ। ಅತ್ಥಿ ಕೇಚಿ ಪಥವಿಂ ಅಪರಿಭುಞ್ಜಿತ್ವಾ ಪರಿನಿಬ್ಬಾಯನ್ತೀತಿ? ಆಮನ್ತಾ। ಅತ್ಥಿ ಕೇಚಿ ಕಮ್ಮವಿಪಾಕಂ ಅಖೇಪೇತ್ವಾ ಪರಿನಿಬ್ಬಾಯನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Pathavī sabbasattānaṃ kammavipākoti? Āmantā . Sabbe sattā pathaviṃ paribhuñjantīti? Na hevaṃ vattabbe…pe… sabbe sattā pathaviṃ paribhuñjantīti? Āmantā. Atthi keci pathaviṃ aparibhuñjitvā parinibbāyantīti? Āmantā. Atthi keci kammavipākaṃ akhepetvā parinibbāyantīti? Na hevaṃ vattabbe…pe….
ಪಥವೀ ಚಕ್ಕವತ್ತಿಸತ್ತಸ್ಸ ಕಮ್ಮವಿಪಾಕೋತಿ? ಆಮನ್ತಾ। ಅಞ್ಞೇ ಸತ್ತಾ ಪಥವಿಂ ಪರಿಭುಞ್ಜನ್ತೀತಿ? ಆಮನ್ತಾ। ಚಕ್ಕವತ್ತಿಸತ್ತಸ್ಸ ಕಮ್ಮವಿಪಾಕಂ ಅಞ್ಞೇ ಸತ್ತಾ ಪರಿಭುಞ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰… ಚಕ್ಕವತ್ತಿಸತ್ತಸ್ಸ ಕಮ್ಮವಿಪಾಕಂ ಅಞ್ಞೇ ಸತ್ತಾ ಪರಿಭುಞ್ಜನ್ತೀತಿ? ಆಮನ್ತಾ । ಚಕ್ಕವತ್ತಿಸತ್ತಸ್ಸ ಫಸ್ಸಂ ವೇದನಂ ಸಞ್ಞಂ ಚೇತನಂ ಚಿತ್ತಂ ಸದ್ಧಂ ವೀರಿಯಂ ಸತಿಂ ಸಮಾಧಿಂ ಪಞ್ಞಂ ಅಞ್ಞೇ ಸತ್ತಾ ಪರಿಭುಞ್ಜನ್ತೀತಿ? ನ ಹೇವಂ ವತ್ತಬ್ಬೇ…ಪೇ॰…।
Pathavī cakkavattisattassa kammavipākoti? Āmantā. Aññe sattā pathaviṃ paribhuñjantīti? Āmantā. Cakkavattisattassa kammavipākaṃ aññe sattā paribhuñjantīti? Na hevaṃ vattabbe…pe… cakkavattisattassa kammavipākaṃ aññe sattā paribhuñjantīti? Āmantā . Cakkavattisattassa phassaṃ vedanaṃ saññaṃ cetanaṃ cittaṃ saddhaṃ vīriyaṃ satiṃ samādhiṃ paññaṃ aññe sattā paribhuñjantīti? Na hevaṃ vattabbe…pe….
೪೯೪. ನ ವತ್ತಬ್ಬಂ – ‘‘ಪಥವೀ ಕಮ್ಮವಿಪಾಕೋ’’ತಿ? ಆಮನ್ತಾ। ನನು ಅತ್ಥಿ ಇಸ್ಸರಿಯಸಂವತ್ತನಿಯಂ ಕಮ್ಮಂ ಅಧಿಪಚ್ಚಸಂವತ್ತನಿಯಂ ಕಮ್ಮನ್ತಿ? ಆಮನ್ತಾ। ಹಞ್ಚಿ ಅತ್ಥಿ ಇಸ್ಸರಿಯಸಂವತ್ತನಿಯಂ ಕಮ್ಮಂ ಅಧಿಪಚ್ಚಸಂವತ್ತನಿಯಂ ಕಮ್ಮಂ, ತೇನ ವತ ರೇ ವತ್ತಬ್ಬೇ – ‘‘ಪಥವೀ ಕಮ್ಮವಿಪಾಕೋ’’ತಿ।
494. Na vattabbaṃ – ‘‘pathavī kammavipāko’’ti? Āmantā. Nanu atthi issariyasaṃvattaniyaṃ kammaṃ adhipaccasaṃvattaniyaṃ kammanti? Āmantā. Hañci atthi issariyasaṃvattaniyaṃ kammaṃ adhipaccasaṃvattaniyaṃ kammaṃ, tena vata re vattabbe – ‘‘pathavī kammavipāko’’ti.
ಪಥವೀ ಕಮ್ಮವಿಪಾಕೋತಿಕಥಾ ನಿಟ್ಠಿತಾ।
Pathavī kammavipākotikathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೭. ಪಥವೀಕಮ್ಮವಿಪಾಕೋತಿಕಥಾವಣ್ಣನಾ • 7. Pathavīkammavipākotikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā / ೭. ಪಥವೀಕಮ್ಮವಿಪಾಕೋತಿಕಥಾವಣ್ಣನಾ • 7. Pathavīkammavipākotikathāvaṇṇanā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೭. ಪಥವೀಕಮ್ಮವಿಪಾಕೋತಿಕಥಾವಣ್ಣನಾ • 7. Pathavīkammavipākotikathāvaṇṇanā
