| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
៨. វិនយវគ្គោ
8. Vinayavaggo
១-៨. បឋមវិនយធរសុត្តាទិវណ្ណនា
1-8. Paṭhamavinayadharasuttādivaṇṇanā
៧៥-៨២. អដ្ឋមស្ស បឋមំ ទុតិយញ្ច ឧត្តានត្ថមេវ។ តតិយេ វិនយលក្ខណេ បតិដ្ឋិតោ លជ្ជិភាវេន វិនយលក្ខណេ ឋិតោ ហោតិ។ អលជ្ជី (បារា. អដ្ឋ. ១.៤៥) ហិ ពហុស្សុតោបិ សមានោ លាភគរុកតាយ តន្តិំ វិសំវាទេត្វា ឧទ្ធម្មំ ឧព្ពិនយំ សត្ថុសាសនំ ទីបេត្វា សាសនេ មហន្តំ ឧបទ្ទវំ ករោតិ, សង្ឃភេទម្បិ សង្ឃរាជិម្បិ ឧប្បាទេតិ។ លជ្ជី បន កុក្កុច្ចកោ សិក្ខាកាមោ ជីវិតហេតុបិ តន្តិំ អវិសំវាទេត្វា ធម្មមេវ វិនយមេវ ច ទីបេតិ, សត្ថុសាសនំ គរុំ កត្វា ឋបេតិ។ ឯវំ យោ លជ្ជី, សោ វិនយំ អជហន្តោ អវោក្កមន្តោវ លជ្ជិភាវេន វិនយលក្ខណេ ឋិតោ ហោតិ បតិដ្ឋិតោ។
75-82. Aṭṭhamassa paṭhamaṃ dutiyañca uttānatthameva. Tatiye vinayalakkhaṇe patiṭṭhito lajjibhāvena vinayalakkhaṇe ṭhito hoti. Alajjī (pārā. aṭṭha. 1.45) hi bahussutopi samāno lābhagarukatāya tantiṃ visaṃvādetvā uddhammaṃ ubbinayaṃ satthusāsanaṃ dīpetvā sāsane mahantaṃ upaddavaṃ karoti, saṅghabhedampi saṅgharājimpi uppādeti. Lajjī pana kukkuccako sikkhākāmo jīvitahetupi tantiṃ avisaṃvādetvā dhammameva vinayameva ca dīpeti, satthusāsanaṃ garuṃ katvā ṭhapeti. Evaṃ yo lajjī, so vinayaṃ ajahanto avokkamantova lajjibhāvena vinayalakkhaṇe ṭhito hoti patiṭṭhito.
អសំហីរោតិ ឯត្ថ សំហីរោ នាម យោ បាឡិយំ វា អដ្ឋកថាយំ វា ហេដ្ឋា វា ឧបរិតោ វា បទបដិបាដិយា វា បុច្ឆិយមានោ វិត្ថុនតិ វិប្ផន្ទតិ, សណ្ឋាតុំ ន សក្កោតិ, យំ យំ បរេន វុច្ចតិ, តំ តំ អនុជានាតិ, សកវាទំ ឆឌ្ឌេត្វា បរវាទំ គណ្ហាតិ។ យោ បន បាឡិយំ វា អដ្ឋកថាយំ វា ហេដ្ឋុបរិយវសេន វា បទបដិបាដិយា វា បុច្ឆិយមានោ ន វិត្ថុនតិ ន វិប្ផន្ទតិ, ឯកេកលោមំ សណ្ឌាសេន គណ្ហន្តោ វិយ ‘‘ឯវំ មយំ វទាម, ឯវំ នោ អាចរិយា វទន្តី’’តិ វិស្សជ្ជេតិ។ យម្ហិ បាឡិ ច បាឡិវិនិច្ឆយោ ច សុវណ្ណភាជនេ បក្ខិត្តសីហវសា វិយ បរិក្ខយំ បរិយាទានំ អគច្ឆន្តោ តិដ្ឋតិ, អយំ វុច្ចតិ អសំហីរោ។ យស្មា បន ឯវរូបោ យំ យំ បរេន វុច្ចតិ, តំ តំ នានុជានាតិ, អត្តនា សុវិនិច្ឆិនិតំ កត្វា គហិតំ អវិបរីតមត្ថំ ន វិស្សជ្ជេតិ, តស្មា វុត្តំ ‘‘ន សក្កោតិ គហិតគ្គហណំ វិស្សជ្ជាបេតុ’’ន្តិ។ ចតុត្ថាទីនិ សុវិញ្ញេយ្យានិ។
Asaṃhīroti ettha saṃhīro nāma yo pāḷiyaṃ vā aṭṭhakathāyaṃ vā heṭṭhā vā uparito vā padapaṭipāṭiyā vā pucchiyamāno vitthunati vipphandati, saṇṭhātuṃ na sakkoti, yaṃ yaṃ parena vuccati, taṃ taṃ anujānāti, sakavādaṃ chaḍḍetvā paravādaṃ gaṇhāti. Yo pana pāḷiyaṃ vā aṭṭhakathāyaṃ vā heṭṭhupariyavasena vā padapaṭipāṭiyā vā pucchiyamāno na vitthunati na vipphandati, ekekalomaṃ saṇḍāsena gaṇhanto viya ‘‘evaṃ mayaṃ vadāma, evaṃ no ācariyā vadantī’’ti vissajjeti. Yamhi pāḷi ca pāḷivinicchayo ca suvaṇṇabhājane pakkhittasīhavasā viya parikkhayaṃ pariyādānaṃ agacchanto tiṭṭhati, ayaṃ vuccati asaṃhīro. Yasmā pana evarūpo yaṃ yaṃ parena vuccati, taṃ taṃ nānujānāti, attanā suvinicchinitaṃ katvā gahitaṃ aviparītamatthaṃ na vissajjeti, tasmā vuttaṃ ‘‘na sakkoti gahitaggahaṇaṃ vissajjāpetu’’nti. Catutthādīni suviññeyyāni.
បឋមវិនយធរសុត្តាទិវណ្ណនា និដ្ឋិតា។
Paṭhamavinayadharasuttādivaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya
១. បឋមវិនយធរសុត្តំ • 1. Paṭhamavinayadharasuttaṃ
២. ទុតិយវិនយធរសុត្តំ • 2. Dutiyavinayadharasuttaṃ
៣. តតិយវិនយធរសុត្តំ • 3. Tatiyavinayadharasuttaṃ
៤. ចតុត្ថវិនយធរសុត្តំ • 4. Catutthavinayadharasuttaṃ
៥. បឋមវិនយធរសោភនសុត្តំ • 5. Paṭhamavinayadharasobhanasuttaṃ
៦. ទុតិយវិនយធរសោភនសុត្តំ • 6. Dutiyavinayadharasobhanasuttaṃ
៧. តតិយវិនយធរសោភនសុត្តំ • 7. Tatiyavinayadharasobhanasuttaṃ
៨. ចតុត្ថវិនយធរសោភនសុត្តំ • 8. Catutthavinayadharasobhanasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā)
១. បឋមវិនយធរសុត្តវណ្ណនា • 1. Paṭhamavinayadharasuttavaṇṇanā
២. ទុតិយវិនយធរសុត្តវណ្ណនា • 2. Dutiyavinayadharasuttavaṇṇanā
៣. តតិយវិនយធរសុត្តវណ្ណនា • 3. Tatiyavinayadharasuttavaṇṇanā
