| Library / Tipiṭaka / තිපිටක • Tipiṭaka / ඉතිවුත්තකපාළි • Itivuttakapāḷi |
3. පඨමවෙදනාසුත්තං
3. Paṭhamavedanāsuttaṃ
52. වුත්තඤ්හෙතං භගවතා, වුත්තමරහතාති මෙ සුතං –
52. Vuttañhetaṃ bhagavatā, vuttamarahatāti me sutaṃ –
‘‘තිස්සො ඉමා, භික්ඛවෙ, වෙදනා. කතමා තිස්සො? සුඛා වෙදනා, දුක්ඛා වෙදනා, අදුක්ඛමසුඛා වෙදනා –
‘‘Tisso imā, bhikkhave, vedanā. Katamā tisso? Sukhā vedanā, dukkhā vedanā, adukkhamasukhā vedanā –
ඉමා ඛො, භික්ඛවෙ, තිස්සො වෙදනා’’ති. එතමත්ථං භගවා අවොච. තත්ථෙතං ඉති වුච්චති –
Imā kho, bhikkhave, tisso vedanā’’ti. Etamatthaṃ bhagavā avoca. Tatthetaṃ iti vuccati –
‘‘සමාහිතො සම්පජානො, සතො බුද්ධස්ස සාවකො;
‘‘Samāhito sampajāno, sato buddhassa sāvako;
වෙදනා ච පජානාති, වෙදනානඤ්ච සම්භවං.
Vedanā ca pajānāti, vedanānañca sambhavaṃ.
‘‘යත්ථ චෙතා නිරුජ්ඣන්ති, මග්ගඤ්ච ඛයගාමිනං;
‘‘Yattha cetā nirujjhanti, maggañca khayagāminaṃ;
වෙදනානං ඛයා භික්ඛු, නිච්ඡාතො පරිනිබ්බුතො’’ති.
Vedanānaṃ khayā bhikkhu, nicchāto parinibbuto’’ti.
අයම්පි අත්ථො වුත්තො භගවතා, ඉති මෙ සුතන්ති. තතියං.
Ayampi attho vutto bhagavatā, iti me sutanti. Tatiyaṃ.
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ඉතිවුත්තක-අට්ඨකථා • Itivuttaka-aṭṭhakathā / 3. පඨමවෙදනාසුත්තවණ්ණනා • 3. Paṭhamavedanāsuttavaṇṇanā
