| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
३. पठमवेदनासुत्तं
3. Paṭhamavedanāsuttaṃ
५२. वुत्तञ्हेतं भगवता, वुत्तमरहताति मे सुतं –
52. Vuttañhetaṃ bhagavatā, vuttamarahatāti me sutaṃ –
‘‘तिस्सो इमा, भिक्खवे, वेदना। कतमा तिस्सो? सुखा वेदना, दुक्खा वेदना, अदुक्खमसुखा वेदना –
‘‘Tisso imā, bhikkhave, vedanā. Katamā tisso? Sukhā vedanā, dukkhā vedanā, adukkhamasukhā vedanā –
इमा खो, भिक्खवे, तिस्सो वेदना’’ति। एतमत्थं भगवा अवोच। तत्थेतं इति वुच्चति –
Imā kho, bhikkhave, tisso vedanā’’ti. Etamatthaṃ bhagavā avoca. Tatthetaṃ iti vuccati –
‘‘समाहितो सम्पजानो, सतो बुद्धस्स सावको।
‘‘Samāhito sampajāno, sato buddhassa sāvako;
वेदना च पजानाति, वेदनानञ्च सम्भवं॥
Vedanā ca pajānāti, vedanānañca sambhavaṃ.
‘‘यत्थ चेता निरुज्झन्ति, मग्गञ्च खयगामिनं।
‘‘Yattha cetā nirujjhanti, maggañca khayagāminaṃ;
वेदनानं खया भिक्खु, निच्छातो परिनिब्बुतो’’ति॥
Vedanānaṃ khayā bhikkhu, nicchāto parinibbuto’’ti.
अयम्पि अत्थो वुत्तो भगवता, इति मे सुतन्ति। ततियं।
Ayampi attho vutto bhagavatā, iti me sutanti. Tatiyaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ३. पठमवेदनासुत्तवण्णना • 3. Paṭhamavedanāsuttavaṇṇanā
