| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. பட²மஉபக்க²டஸிக்கா²பத³வண்ணனா
8. Paṭhamaupakkhaṭasikkhāpadavaṇṇanā
பி⁴க்கு²ங் பனேவ உத்³தி³ஸ்ஸாதி எத்த² பனாதி நிபாதமத்தங், ததா² ஏவ-ஸத்³தோ³பி. தேனாஹ ‘‘இத்த²ன்னாமஸ்ஸா’’திஆதி³. அபதி³ஸித்வாதி கதெ²த்வா, ஆரப்³பா⁴தி வா அத்தோ². அஞ்ஞாதகஸ்ஸ க³ஹபதிஸ்ஸாதி அஞ்ஞாதகக³ஹபதினாதி அத்தோ². கரணத்தே² ஹி இத³ங் ஸாமிவசனங். அட்ட²கதா²யங் பன இத³ங் ஸுவிஞ்ஞெய்யந்தி ந விசாரிதங். சீவரங் சேதாபெந்தி பரிவத்தெந்தி ஏதேனாதி சீவரசேதாபன்னங் (ஸாரத்த²॰ டீ॰ 2.528-529), சீவரமூலங், ந-காரோ பனெத்த² ஆக³மோ, ‘‘சீவரசேதாபன’’ந்திபி பட²ந்தி. தங் பன யஸ்மா ஹிரஞ்ஞாதீ³ஸு அஞ்ஞதரங் ஹோதி, தஸ்மா ‘‘ஹிரஞ்ஞாதி³க’’ந்தி வுத்தங். தத்த² ஹிரஞ்ஞந்தி கஹாபணோ வுச்சதி. ஆதி³ஸத்³தே³ன ஸுவண்ணாதீ³னங் க³ஹணங். உபக்க²டந்தி உபட்டா²பிதங். தங் உபக்க²ரணங் தேஸங் ததா² ஸஜ்ஜிதந்தி ஆஹ ‘‘உபக்க²டங் ஹோதீதி ஸஜ்ஜிதங் ஹோதீ’’தி. ஸங்ஹரித்வா ட²பிதந்தி ராஸிங் கத்வா ட²பிதங். பரிவத்தனஞ்ச அகதஸ்ஸ காராபனங், கதஸ்ஸ கிணனந்தி ஆஹ ‘‘காரெத்வா வா கிணித்வா வாதி அத்தோ²’’தி. அச்சா²தெ³ஸ்ஸாமீதி பாருபெஸ்ஸாமீதி வுத்தங் ஹோதி. தேனாஹ ‘‘வோஹாரவசனமேத’’ந்தி. வோஹாரவசனந்தி ச உபசாரவசனந்தி அத்தோ².
Bhikkhuṃpaneva uddissāti ettha panāti nipātamattaṃ, tathā eva-saddopi. Tenāha ‘‘itthannāmassā’’tiādi. Apadisitvāti kathetvā, ārabbhāti vā attho. Aññātakassa gahapatissāti aññātakagahapatināti attho. Karaṇatthe hi idaṃ sāmivacanaṃ. Aṭṭhakathāyaṃ pana idaṃ suviññeyyanti na vicāritaṃ. Cīvaraṃ cetāpenti parivattenti etenāti cīvaracetāpannaṃ (sārattha. ṭī. 2.528-529), cīvaramūlaṃ, na-kāro panettha āgamo, ‘‘cīvaracetāpana’’ntipi paṭhanti. Taṃ pana yasmā hiraññādīsu aññataraṃ hoti, tasmā ‘‘hiraññādika’’nti vuttaṃ. Tattha hiraññanti kahāpaṇo vuccati. Ādisaddena suvaṇṇādīnaṃ gahaṇaṃ. Upakkhaṭanti upaṭṭhāpitaṃ. Taṃ upakkharaṇaṃ tesaṃ tathā sajjitanti āha ‘‘upakkhaṭaṃ hotīti sajjitaṃ hotī’’ti. Saṃharitvā ṭhapitanti rāsiṃ katvā ṭhapitaṃ. Parivattanañca akatassa kārāpanaṃ, katassa kiṇananti āha ‘‘kāretvā vā kiṇitvā vāti attho’’ti. Acchādessāmīti pārupessāmīti vuttaṃ hoti. Tenāha ‘‘vohāravacanameta’’nti. Vohāravacananti ca upacāravacananti attho.
‘‘தத்ர சே ஸோ பி⁴க்கூ²’’திஆதீ³ஸு கோ பத³ஸம்ப³ந்தோ⁴தி ஆஹ ‘‘யத்ர ஸோ க³ஹபதி வா’’திஆதி³. புப்³பே³ அப்பவாரிதோதி ‘‘த³ஸ்ஸாமி, கீதி³ஸேன தே, ப⁴ந்தே, சீவரேன அத்தோ², கீதி³ஸங் தே சீவரங் சேதாபேமீ’’தி புப்³பே³ அவுத்தோ. உபஸங்கமித்வாதி க³ந்த்வா. பத³பா⁴ஜனே பசுரவோஹாரவஸேன ‘‘க⁴ரங் க³ந்த்வா’’தி (பாரா॰ 529) வுத்தங். எத்த² ச பசுரவோஹாரவஸேனாதி யேபு⁴ய்யவோஹாரவஸேன. யேபு⁴ய்யேன ஹி க⁴ரஸாமிகங் த³ட்டு²காமா தஸ்ஸ க⁴ரங் க³ச்ச²ந்தீதி ததே²வ ப³ஹுலவோஹாரோ. விகப்பந்தி விஸிட்டோ² கப்போ விகப்போ, வி-ஸத்³தோ³ செத்த² விஸிட்ட²த்தோ². தேனாஹ ‘‘விஸிட்ட²கப்ப’’ந்தி. இமினா வசனத்த²மாஹ. ‘‘அதி⁴கவிதா⁴ன’’ந்தி இமினா பன அதி⁴ப்பாயத்த²ங். யதா² பன தமாபஜ்ஜதீதி யேனாகாரேன தங் விகப்பங் ஆபஜ்ஜதி. தங் த³ஸ்ஸேதுந்தி தங் ஆகாரங் த³ஸ்ஸேதுங்.
‘‘Tatra ce so bhikkhū’’tiādīsu ko padasambandhoti āha ‘‘yatra so gahapati vā’’tiādi. Pubbe appavāritoti ‘‘dassāmi, kīdisena te, bhante, cīvarena attho, kīdisaṃ te cīvaraṃ cetāpemī’’ti pubbe avutto. Upasaṅkamitvāti gantvā. Padabhājane pacuravohāravasena ‘‘gharaṃ gantvā’’ti (pārā. 529) vuttaṃ. Ettha ca pacuravohāravasenāti yebhuyyavohāravasena. Yebhuyyena hi gharasāmikaṃ daṭṭhukāmā tassa gharaṃ gacchantīti tatheva bahulavohāro. Vikappanti visiṭṭho kappo vikappo, vi-saddo cettha visiṭṭhattho. Tenāha ‘‘visiṭṭhakappa’’nti. Iminā vacanatthamāha. ‘‘Adhikavidhāna’’nti iminā pana adhippāyatthaṃ. Yathā pana tamāpajjatīti yenākārena taṃ vikappaṃ āpajjati. Taṃ dassetunti taṃ ākāraṃ dassetuṃ.
‘‘ஸாதூ⁴’’தி அயங் ஸத்³தோ³ ஸம்படிச்ச²னஸம்பஹங்ஸனஸுந்த³ராயாசனாதீ³ஸு தி³ஸ்ஸதி. ததா² ஹேஸ ‘‘ஸாது⁴, ப⁴ந்தேதி கோ² ஸோ பி⁴க்கு² ப⁴க³வதோ பா⁴ஸிதங் அபி⁴னந்தி³த்வா அனுமோதி³த்வா’’திஆதீ³ஸு (ம॰ நி॰ 3.86) ஸம்படிச்ச²னே தி³ஸ்ஸதி, ‘‘ஸாது⁴ ஸாது⁴ ஸாரிபுத்தா’’திஆதீ³ஸு (தீ³॰ நி॰ 3.349; ம॰ நி॰ 1.340) ஸம்பஹங்ஸனே.
‘‘Sādhū’’ti ayaṃ saddo sampaṭicchanasampahaṃsanasundarāyācanādīsu dissati. Tathā hesa ‘‘sādhu, bhanteti kho so bhikkhu bhagavato bhāsitaṃ abhinanditvā anumoditvā’’tiādīsu (ma. ni. 3.86) sampaṭicchane dissati, ‘‘sādhu sādhu sāriputtā’’tiādīsu (dī. ni. 3.349; ma. ni. 1.340) sampahaṃsane.
‘‘ஸாது⁴ த⁴ம்மருசி ராஜா, ஸாது⁴ பஞ்ஞாணவா நரோ;
‘‘Sādhu dhammaruci rājā, sādhu paññāṇavā naro;
ஸாது⁴ மித்தானமத்³து³ப்³போ⁴, பாபஸ்ஸாகரணங் ஸுக²’’ந்திஆதீ³ஸு. (ஜா॰ 2.18.101) –
Sādhu mittānamaddubbho, pāpassākaraṇaṃ sukha’’ntiādīsu. (jā. 2.18.101) –
ஸுந்த³ரே, ‘‘ஸாது⁴ மே, ப⁴ந்தே ப⁴க³வா, ஸங்கி²த்தேன த⁴ம்மங் தே³ஸேதூ’’திஆதீ³ஸு (ஸங்॰ நி॰ 3.64-68) ஆயாசனே, இதா⁴பி ஆயாசனேயேவ த³ட்ட²ப்³போ³தி (தீ³॰ நி॰ அட்ட²॰ 1.189; ம॰ நி॰ அட்ட²॰ 1.1 மூலபரியாயஸுத்தவண்ணனா; ஸு॰ நி॰ அட்ட²॰ 1.115 அக்³கி³கபா⁴ரத்³வாஜஸுத்தவண்ணனா; பு³॰ வங்॰ அட்ட²॰ 1.49) ஆஹ ‘‘ஸாதூ⁴தி ஆயாசனே நிபாதோ’’தி. தத்த² ஆயாசனேதி அபி⁴முக²ங் யாசனே, அபி⁴பத்த²னாயந்தி அத்தோ². பரிவிதக்கே நிபாதோதி ஸம்ப³ந்தோ⁴. ஆலபதீதி ஆமந்தேதி. ஆயதாதீ³ஸூதி எத்த² ஆதி³ஸத்³தே³ன வித்த²தஅப்பிதஸண்ஹானங் க³ஹணங். யஸ்மா பன ந இமஸ்ஸ ஆபஜ்ஜனமத்தேனேவ ஆபத்தி ஸீஸங் ஏதி, தஸ்மா ‘‘தஸ்ஸ வசனேனா’’திஆதி³ வுத்தங். பயோகே³தி ஸுத்தபரியேஸனாதி³பயோகே³.
Sundare, ‘‘sādhu me, bhante bhagavā, saṃkhittena dhammaṃ desetū’’tiādīsu (saṃ. ni. 3.64-68) āyācane, idhāpi āyācaneyeva daṭṭhabboti (dī. ni. aṭṭha. 1.189; ma. ni. aṭṭha. 1.1 mūlapariyāyasuttavaṇṇanā; su. ni. aṭṭha. 1.115 aggikabhāradvājasuttavaṇṇanā; bu. vaṃ. aṭṭha. 1.49) āha ‘‘sādhūtiāyācane nipāto’’ti. Tattha āyācaneti abhimukhaṃ yācane, abhipatthanāyanti attho. Parivitakke nipātoti sambandho. Ālapatīti āmanteti. Āyatādīsūti ettha ādisaddena vitthataappitasaṇhānaṃ gahaṇaṃ. Yasmā pana na imassa āpajjanamatteneva āpatti sīsaṃ eti, tasmā ‘‘tassa vacanenā’’tiādi vuttaṃ. Payogeti suttapariyesanādipayoge.
மஹக்³க⁴ங் சேதாபேதுகாமங் அப்பக்³க⁴ந்தி வீஸதிஅக்³க⁴னகங் சீவரங் சேதாபேதுகாமங் ‘‘அலங் மய்ஹங் தேன, த³ஸஅக்³க⁴னகங் வா அட்ட²க்³க⁴னகங் வா தே³ஹீ’’தி வத³ந்தஸ்ஸாதி அத்தோ². ஏவரூபந்தி ஏவங் ஸமபா⁴க³ங், இமினா ஸமகந்தி வுத்தங் ஹோதி. தஞ்ச கோ² அக்³க⁴வஸேனேவ, ந பமாணவஸேன. அக்³க⁴வட்³ட⁴னகஞ்ஹி இத³ங் ஸிக்கா²பத³ங்.
Mahagghaṃ cetāpetukāmaṃ appagghanti vīsatiagghanakaṃ cīvaraṃ cetāpetukāmaṃ ‘‘alaṃ mayhaṃ tena, dasaagghanakaṃ vā aṭṭhagghanakaṃ vā dehī’’ti vadantassāti attho. Evarūpanti evaṃ samabhāgaṃ, iminā samakanti vuttaṃ hoti. Tañca kho agghavaseneva, na pamāṇavasena. Agghavaḍḍhanakañhi idaṃ sikkhāpadaṃ.
பட²மஉபக்க²டஸிக்கா²பத³வண்ணனா நிட்டி²தா.
Paṭhamaupakkhaṭasikkhāpadavaṇṇanā niṭṭhitā.
