| Library / Tipiṭaka / တိပိဋက • Tipiṭaka / သံယုတ္တနိကာယ • Saṃyuttanikāya |
၂. ပဌမသူရိယူပမသုတ္တံ
2. Paṭhamasūriyūpamasuttaṃ
၁၉၃. ‘‘သူရိယသ္သ, ဘိက္ခဝေ, ဥဒယတော ဧတံ ပုဗ္ဗင္ဂမံ ဧတံ ပုဗ္ဗနိမိတ္တံ, ယဒိဒံ – အရုဏုဂ္ဂံ; ဧဝမေဝ ခော, ဘိက္ခဝေ, ဘိက္ခုနော သတ္တန္နံ ဗောဇ္ဈင္ဂာနံ ဥပ္ပာဒာယ ဧတံ ပုဗ္ဗင္ဂမံ ဧတံ ပုဗ္ဗနိမိတ္တံ, ယဒိဒံ – ကလ္ယာဏမိတ္တတာ။ ကလ္ယာဏမိတ္တသ္သေတံ, ဘိက္ခဝေ, ဘိက္ခုနော ပာဋိကင္ခံ – သတ္တ ဗောဇ္ဈင္ဂေ ဘာဝေသ္သတိ, သတ္တ ဗောဇ္ဈင္ဂေ ဗဟုလီကရိသ္သတိ။
193. ‘‘Sūriyassa, bhikkhave, udayato etaṃ pubbaṅgamaṃ etaṃ pubbanimittaṃ, yadidaṃ – aruṇuggaṃ; evameva kho, bhikkhave, bhikkhuno sattannaṃ bojjhaṅgānaṃ uppādāya etaṃ pubbaṅgamaṃ etaṃ pubbanimittaṃ, yadidaṃ – kalyāṇamittatā. Kalyāṇamittassetaṃ, bhikkhave, bhikkhuno pāṭikaṅkhaṃ – satta bojjhaṅge bhāvessati, satta bojjhaṅge bahulīkarissati.
‘‘ကထဉ္စ , ဘိက္ခဝေ, ဘိက္ခု ကလ္ယာဏမိတ္တော သတ္တ ဗောဇ္ဈင္ဂေ ဘာဝေတိ သတ္တ ဗောဇ္ဈင္ဂေ ဗဟုလီကရောတိ? ဣဓ, ဘိက္ခဝေ, ဘိက္ခု သတိသမ္ဗောဇ္ဈင္ဂံ ဘာဝေတိ ဝိဝေကနိသ္သိတံ။ပေ.။ ဥပေက္ခာသမ္ဗောဇ္ဈင္ဂံ ဘာဝေတိ ဝိဝေကနိသ္သိတံ ဝိရာဂနိသ္သိတံ နိရောဓနိသ္သိတံ ဝောသ္သဂ္ဂပရိဏာမိံ။ ဧဝံ ခော, ဘိက္ခဝေ, ဘိက္ခု ကလ္ယာဏမိတ္တော သတ္တ ဗောဇ္ဈင္ဂေ ဘာဝေတိ, သတ္တ ဗောဇ္ဈင္ဂေ ဗဟုလီကရောတီ’’တိ။ ဒုတိယံ။
‘‘Kathañca , bhikkhave, bhikkhu kalyāṇamitto satta bojjhaṅge bhāveti satta bojjhaṅge bahulīkaroti? Idha, bhikkhave, bhikkhu satisambojjhaṅgaṃ bhāveti vivekanissitaṃ…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ kho, bhikkhave, bhikkhu kalyāṇamitto satta bojjhaṅge bhāveti, satta bojjhaṅge bahulīkarotī’’ti. Dutiyaṃ.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁-၃. ပာဏသုတ္တာဒိဝဏ္ဏနာ • 1-3. Pāṇasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁-၃. ပာဏသုတ္တာဒိဝဏ္ဏနာ • 1-3. Pāṇasuttādivaṇṇanā
