| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅-၇. ပဌမသုခသုတ္တာဒိဝဏ္ဏနာ
5-7. Paṭhamasukhasuttādivaṇṇanā
၆၅-၆၇. ပဉ္စမေ ဝဋ္ဋမူလကံ သုခဒုက္ခံ ပုစ္ဆိတံ, ဆဋ္ဌေ သာသနမူလကံ။ သတ္တမေ နဠကပာနန္တိ အတီတေ ဗောဓိသတ္တသ္သ ဩဝာဒေ ဌတ္ဝာ ဝာနရယူထေန နဠေဟိ ဥဒကသ္သ ပီတဋ္ဌာနေ မာပိတတ္တာ ဧဝံလဒ္ဓနာမော နိဂမော။ တုဏ္ဟီဘူတံ တုဏ္ဟီဘူတန္တိ ယံ ယံ ဒိသံ အနုဝိလောကေတိ, တတ္ထ တတ္ထ တုဏ္ဟီဘူတမေဝ။ အနုဝိလောကေတ္ဝာတိ တတော တတော ဝိလောကေတ္ဝာ။ ပိဋ္ဌိ မေ အာဂိလာယတီတိ ကသ္မာ အာဂိလာယတိ? ဘဂဝတော ဟိ ဆ ဝသ္သာနိ မဟာပဓာနံ ပဒဟန္တသ္သ မဟန္တံ ကာယဒုက္ခံ အဟောသိ, အထသ္သ အပရဘာဂေ မဟလ္လကကာလေ ပိဋ္ဌိဝာတော ဥပ္ပဇ္ဇိ။ ဥပာဒိန္နကသရီရသ္သ ဌာနနိသဇ္ဇာဒီဟိ အပ္ပမတ္တကေန အာဗာဓေန န သက္ကာ ကေနစိ ဘဝိတုံ။ တံ ဂဟေတ္ဝာပိ ထေရသ္သ ဩကာသကရဏတ္ထံ ဧဝမာဟ။ သင္ဃာဋိံ ပညာပေတ္ဝာ ဧကမန္တေ ပတိရူပဋ္ဌာနေ ပညတ္တသ္သ ကပ္ပိယမဉ္စသ္သ ဥပရိ အတ္ထရိတ္ဝာ။
65-67. Pañcame vaṭṭamūlakaṃ sukhadukkhaṃ pucchitaṃ, chaṭṭhe sāsanamūlakaṃ. Sattame naḷakapānanti atīte bodhisattassa ovāde ṭhatvā vānarayūthena naḷehi udakassa pītaṭṭhāne māpitattā evaṃladdhanāmo nigamo. Tuṇhībhūtaṃ tuṇhībhūtanti yaṃ yaṃ disaṃ anuviloketi, tattha tattha tuṇhībhūtameva. Anuviloketvāti tato tato viloketvā. Piṭṭhi me āgilāyatīti kasmā āgilāyati? Bhagavato hi cha vassāni mahāpadhānaṃ padahantassa mahantaṃ kāyadukkhaṃ ahosi, athassa aparabhāge mahallakakāle piṭṭhivāto uppajji. Upādinnakasarīrassa ṭhānanisajjādīhi appamattakena ābādhena na sakkā kenaci bhavituṃ. Taṃ gahetvāpi therassa okāsakaraṇatthaṃ evamāha. Saṅghāṭiṃ paññāpetvā ekamante patirūpaṭṭhāne paññattassa kappiyamañcassa upari attharitvā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya
၅. ပဌမသုခသုတ္တံ • 5. Paṭhamasukhasuttaṃ
၆. ဒုတိယသုခသုတ္တံ • 6. Dutiyasukhasuttaṃ
၇. ပဌမနဠကပာနသုတ္တံ • 7. Paṭhamanaḷakapānasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၇. အဝိဇ္ဇာသုတ္တာဒိဝဏ္ဏနာ • 1-7. Avijjāsuttādivaṇṇanā
