| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៦. បឋមសេខសុត្តំ
6. Paṭhamasekhasuttaṃ
១៦. វុត្តញ្ហេតំ ភគវតា, វុត្តមរហតាតិ មេ សុតំ –
16. Vuttañhetaṃ bhagavatā, vuttamarahatāti me sutaṃ –
‘‘សេខស្ស, ភិក្ខវេ, ភិក្ខុនោ អប្បត្តមានសស្ស អនុត្តរំ យោគក្ខេមំ បត្ថយមានស្ស វិហរតោ អជ្ឈត្តិកំ អង្គន្តិ ករិត្វា នាញ្ញំ ឯកង្គម្បិ សមនុបស្សាមិ យំ ឯវំ ពហូបការំ យថយិទំ, ភិក្ខវេ, យោនិសោ មនសិការោ។ យោនិសោ, ភិក្ខវេ, ភិក្ខុ មនសិ ករោន្តោ អកុសលំ បជហតិ , កុសលំ ភាវេតី’’តិ ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Sekhassa, bhikkhave, bhikkhuno appattamānasassa anuttaraṃ yogakkhemaṃ patthayamānassa viharato ajjhattikaṃ aṅganti karitvā nāññaṃ ekaṅgampi samanupassāmi yaṃ evaṃ bahūpakāraṃ yathayidaṃ, bhikkhave, yoniso manasikāro. Yoniso, bhikkhave, bhikkhu manasi karonto akusalaṃ pajahati , kusalaṃ bhāvetī’’ti . Etamatthaṃ bhagavā avoca. Tatthetaṃ iti vuccati –
‘‘យោនិសោ មនសិការោ, ធម្មោ សេខស្ស ភិក្ខុនោ;
‘‘Yoniso manasikāro, dhammo sekhassa bhikkhuno;
នត្ថញ្ញោ ឯវំ ពហុការោ, ឧត្តមត្ថស្ស បត្តិយា;
Natthañño evaṃ bahukāro, uttamatthassa pattiyā;
យោនិសោ បទហំ ភិក្ខុ, ខយំ ទុក្ខស្ស បាបុណេ’’តិ។
Yoniso padahaṃ bhikkhu, khayaṃ dukkhassa pāpuṇe’’ti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ ឆដ្ឋំ។
Ayampi attho vutto bhagavatā, iti me sutanti. Chaṭṭhaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៦. បឋមសេខសុត្តវណ្ណនា • 6. Paṭhamasekhasuttavaṇṇanā
