| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
६. पठमसेखसुत्तं
6. Paṭhamasekhasuttaṃ
१६. वुत्तञ्हेतं भगवता, वुत्तमरहताति मे सुतं –
16. Vuttañhetaṃ bhagavatā, vuttamarahatāti me sutaṃ –
‘‘सेखस्स, भिक्खवे, भिक्खुनो अप्पत्तमानसस्स अनुत्तरं योगक्खेमं पत्थयमानस्स विहरतो अज्झत्तिकं अङ्गन्ति करित्वा नाञ्ञं एकङ्गम्पि समनुपस्सामि यं एवं बहूपकारं यथयिदं, भिक्खवे, योनिसो मनसिकारो। योनिसो, भिक्खवे, भिक्खु मनसि करोन्तो अकुसलं पजहति , कुसलं भावेती’’ति । एतमत्थं भगवा अवोच। तत्थेतं इति वुच्चति –
‘‘Sekhassa, bhikkhave, bhikkhuno appattamānasassa anuttaraṃ yogakkhemaṃ patthayamānassa viharato ajjhattikaṃ aṅganti karitvā nāññaṃ ekaṅgampi samanupassāmi yaṃ evaṃ bahūpakāraṃ yathayidaṃ, bhikkhave, yoniso manasikāro. Yoniso, bhikkhave, bhikkhu manasi karonto akusalaṃ pajahati , kusalaṃ bhāvetī’’ti . Etamatthaṃ bhagavā avoca. Tatthetaṃ iti vuccati –
‘‘योनिसो मनसिकारो, धम्मो सेखस्स भिक्खुनो।
‘‘Yoniso manasikāro, dhammo sekhassa bhikkhuno;
नत्थञ्ञो एवं बहुकारो, उत्तमत्थस्स पत्तिया।
Natthañño evaṃ bahukāro, uttamatthassa pattiyā;
योनिसो पदहं भिक्खु, खयं दुक्खस्स पापुणे’’ति॥
Yoniso padahaṃ bhikkhu, khayaṃ dukkhassa pāpuṇe’’ti.
अयम्पि अत्थो वुत्तो भगवता, इति मे सुतन्ति। छट्ठं।
Ayampi attho vutto bhagavatā, iti me sutanti. Chaṭṭhaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / ६. पठमसेखसुत्तवण्णना • 6. Paṭhamasekhasuttavaṇṇanā
