| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৬. পঠমসেখসুত্তং
6. Paṭhamasekhasuttaṃ
১৬. ৰুত্তঞ্হেতং ভগৰতা, ৰুত্তমরহতাতি মে সুতং –
16. Vuttañhetaṃ bhagavatā, vuttamarahatāti me sutaṃ –
‘‘সেখস্স, ভিক্খৰে, ভিক্খুনো অপ্পত্তমানসস্স অনুত্তরং যোগক্খেমং পত্থযমানস্স ৰিহরতো অজ্ঝত্তিকং অঙ্গন্তি করিত্ৰা নাঞ্ঞং একঙ্গম্পি সমনুপস্সামি যং এৰং বহূপকারং যথযিদং, ভিক্খৰে, যোনিসো মনসিকারো। যোনিসো, ভিক্খৰে, ভিক্খু মনসি করোন্তো অকুসলং পজহতি , কুসলং ভাৰেতী’’তি । এতমত্থং ভগৰা অৰোচ। তত্থেতং ইতি ৰুচ্চতি –
‘‘Sekhassa, bhikkhave, bhikkhuno appattamānasassa anuttaraṃ yogakkhemaṃ patthayamānassa viharato ajjhattikaṃ aṅganti karitvā nāññaṃ ekaṅgampi samanupassāmi yaṃ evaṃ bahūpakāraṃ yathayidaṃ, bhikkhave, yoniso manasikāro. Yoniso, bhikkhave, bhikkhu manasi karonto akusalaṃ pajahati , kusalaṃ bhāvetī’’ti . Etamatthaṃ bhagavā avoca. Tatthetaṃ iti vuccati –
‘‘যোনিসো মনসিকারো, ধম্মো সেখস্স ভিক্খুনো।
‘‘Yoniso manasikāro, dhammo sekhassa bhikkhuno;
নত্থঞ্ঞো এৰং বহুকারো, উত্তমত্থস্স পত্তিযা।
Natthañño evaṃ bahukāro, uttamatthassa pattiyā;
যোনিসো পদহং ভিক্খু, খযং দুক্খস্স পাপুণে’’তি॥
Yoniso padahaṃ bhikkhu, khayaṃ dukkhassa pāpuṇe’’ti.
অযম্পি অত্থো ৰুত্তো ভগৰতা, ইতি মে সুতন্তি। ছট্ঠং।
Ayampi attho vutto bhagavatā, iti me sutanti. Chaṭṭhaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৬. পঠমসেখসুত্তৰণ্ণনা • 6. Paṭhamasekhasuttavaṇṇanā
